គ្រោះថ្នាក់ធំបំផុតដល់ជីវិត ដែលអ្នកគួរតែផ្លាស់ប្តូរដើម្បីខ្លួនឯង
- 2017-06-09 07:24:04
- ចំនួនមតិ 0 | ចំនួនចែករំលែក 0
គ្រោះថ្នាក់ធំបំផុតដល់ជីវិត ដែលអ្នកគួរតែផ្លាស់ប្តូរដើម្បីខ្លួនឯង
ជាច្រើនឆ្នាំមកហើយ មនុស្សនៅតែបន្តធ្វើឲ្យមានការខូចខាតដល់បរិស្ថាន ដែលការធ្វើបែបនេះនឹងផ្ដល់ផលប៉ះពាល់ត្រលប់មកវិញជាបន្តបន្ទាប់ដូចក្នុងល្បែង ដូមីណូ ( Domino Effect ) ដែលវានឹងបង្កគ្រោះថ្នាក់ធំបំផុត ដល់អាយុជីវិតអ្នក។
សំណួរមួយសួរថា តើអ្នកជាប់ពាក់ព័ន្ធស្និទ្ធស្នាលនឹងបរិស្ថានដែរឬទេ? ចម្លើយជាការពិត អ្នកពិតជាជាប់ពាក់ព័ន្ធនឹងបរិស្ថានមែន។ និយាយដោយសាមញ្ញទៅ អ្វីដែលអ្នកបានធ្វើចំពោះប្រព័ន្ធបរិស្ថាន អ្នកនឹងទទួលបានវិញចំពោះខ្លួនឯងដែរ។
ជាក់ស្តែងការបំពុលបរិស្ថានវានឹងត្រលប់មករកអ្នកវិញ ហើយវានឹងជ្រាបចូលក្នុងអាហារដែលអ្នកបរិភោគ ខ្យល់ដែលអ្នកដកដង្ហើម និងទឹកដែលអ្នកញ៉ាំផងដែរ។ ដូចនឹងរបាយការណ៍ពិភពលោកបានបង្ហាញថាមានការស្លាប់ច្រើនរាប់មិនអស់ដោយសារតែមានជំងឺបណ្ដាលមកពីការបំពុលបរិស្ថាននេះ។
- អាហារ
ថ្នាំសម្លាប់សត្វល្អិត និងសារធាតុគីមីផ្សេងទៀតត្រូវបានប្រើជាទូទៅនៅក្នុងផលិតកម្មម្ហូបអាហារ។ ទោះជាយ៉ាងណា តើអ្នកដឹងទេថារបស់ទាំងនេះមិនត្រឹមតែផ្ដល់ផលប៉ះពាល់ចំពោះមនុស្សនោះទេ ប៉ុន្តែថែមទាំងប៉ះពាល់ចំពោះបរិស្ថានផងដែរ? វាធ្វើអោយគុណភាពដីនៃកសិដ្ឋានធ្លាក់ចុះ និងប៉ះពាល់ដល់ជីវជាតិដែលជួយទ្រទ្រង់ដល់ការរីកលូតលាស់នៃដំណាំ។ ជាពិសេសភាគច្រើន សារធាតុគីមីទាំងនេះបានបង្កើនហានិភ័យនៃការកើតជំងឺមហារីក និងភាពសុំានៃថ្នាំចំពោះប្រជាជន។
- ទឹក
តើអ្នកដឹងទេថា មានតែ ២,៥% នៃទឹកនៅលើភពផែនដីនេះត្រូវបានចាត់ទុកថាអាចប្រើប្រាស់បាន? អ្វីដែលហួសចិត្តនោះគឺ រាងកាយរបស់មនុស្សមានផ្ទុកជាតិទឹករហូតដល់ ៧០%ឯណោះ។ ជាទូទៅ ទឹកគឺជាសមាសភាគសំខាន់នៃរាងកាយ និងសុខភាពរបស់អ្នក។ វាជាហេតុផលសមរម្យមួយដែលអ្នកគួរផ្ដល់ការការពារដោយការផ្គត់ផ្គង់ទឹកអោយបានគ្រប់គ្រាន់ដល់រាងកាយ។
កាកសំណល់ គឺជាបញ្ហាគំរាមកំហែងចម្បងដល់គុណភាពនៃទឹកដែលអ្នកមាន។ ប្លាស្ទិកជាង ៣០០ លានតោន ត្រូវបានផលិតនៅគ្រប់ទីកន្លែង និងក្នុងចំណោមនោះ ៨ លានតោន ត្រូវបានគេបោះចោលទៅក្នុងសមុទ្រ។ អ្នកបានប្រើប្រាស់ទឹកភាគច្រើនដែលបានពីប្រភពទឹកដោយមានការបំពុលពីទីក្រុង និងកសិដ្ឋានបង្ហូរចូលទៅក្នុងទន្លេ លទ្ធផលចុងក្រោយសារធាតុទាំងអស់នោះនឹងជ្រាបចូលក្នុងរាងកាយរបស់អ្នកវិញ។
- ខ្យល់អាកាស
ឧស្សាហូបនីយកម្ម គឺជាសមាសភាគវិជ្ជមាននៅក្នុងសេដ្ឋកិច្ចរបស់ប្រទេសមួយ។ ទោះជាយ៉ាងណា ការបំភាយឧស្ម័នពីឧស្សាហកម្មនេះបានប៉ះពាល់ដល់សុខភាពរបស់មនុស្សយ៉ាងខ្លាំង។ ភាគច្រើននៃឧស្ម័នដែលបានភាយចេញពីរោងចក្រគឺ មានផ្ទុកជាតិបារត និងស្ពាន់ធ័រឌីអុកស៊ីតដែលជាជាតិពុលខ្លាំងដល់រាងកាយរបស់មនុស្ស។ អត្រាប្រេវ៉ាឡង់នៃជំងឺសួត បេះដូង មហារីក និង ហឺតត្រូវបានកើនឡើងដោយសារតែបញ្ហានៃជាតិពុលក្នុងបរិស្ថានខាងក្រៅ។
ជាតិពុលនៃខ្យល់ក្នុងផ្ទះគឺទទួលបានពីការប្រើប្រាស់ផលិតផលប្រចាំថ្ងៃក្នុងផ្ទះ។ លើសពីការជ្រើសសម្រាប់អ្វីដែលអ្នកត្រូវបរិភោគ ការជៀសវាងពីកន្លែងមានការបំពុលខ្យល់ ខ្លាំង ឬធ្វើតេស្តរកសារធាតុគីមីក្នុងទឹក ដែលអ្នកប្រើប្រាស់ដើម្បីធានាដល់សុខុមាលភាពនៃការរស់នៅ អ្នកក៏ត្រូវមានការគិតគូរឲ្យបានម៉ត់ចត់ចំពោះទីតាំងដែលអ្នកត្រូវរស់នៅផងដែរ។ អនុវត្តរបៀបនៃការចោលសំរាមឱ្យបានត្រឹមត្រូវ ឬ ប្រើថង់ក្រដាសជំនួសឱ្យប្លាស្ទិក គឺគ្រប់គ្រាន់ដើម្បីចាប់ផ្តើមការផ្លាស់ប្ដូរយ៉ាងចម្បងក្នុងការកើនឡើងនៃការបំពុលបរិស្ថាន។
ដូច្នេះចាប់ផ្ដើមពីខ្លួនអ្នក និងធ្វើវាដោយចេញពីចិត្ត ហើយធ្វើរឿងត្រឹមត្រូវដើម្បីការពារបរិស្ថាន៕
បើមានសំណួរពាក់ព័ន្ធនឹងអត្ថបទនេះ ឬការថែរក្សាសុខភាព អាចទាក់ទងតាម៖
ផេកហ្វេសប៊ុក Healthwise Digest
អ៊ីមែល healthwisedigest@dksh.com.kh
វិបសាយ www.healthwise-digest.com
ចំណាំ៖ រាល់ថ្ងៃសុក្រ Kanha នឹងចេញផ្សាយអត្ថបទសុខភាព ពីអ្នកជំនាញផ្នែកសុខភាពរបស់ទស្សនាវដ្តី Healthwise Digest ពី DKSH៕