មនុស្សបែកគ្នាហើយអាចជួបគ្នាវិញបានទេ?

2017-04-21 04:00:21
ចំនួនមតិ 0 | ចំនួនចែករំលែក 0

រឿងរ៉ាវកន្លងផុតទៅយូរហើយ ប៉ុន្តែអារម្មណ៍នៅតែដិតដាម ហើយរឹតតែមិនអាចបំភ្លេចមនុស្សដែលធ្លាប់ស្រឡាញ់ មនុស្សដែលធ្លាប់ក្បែរ។ ទោះបីពេលវេលាដើរទៅមុខ តែការឈឺចាប់នៅតែមាន ទឹកភ្នែកក៏នៅតែស្រក់ពេលដែលនឹកឃើញ ព្រោះអារម្មណ៍ស្រឡាញ់នៅតែមាន ក្ដីនឹករលឹកនៅតែដិតជាប់ក្នុងខួរក្បាល។

តើមនុស្សដែលបែកគ្នាហើយអាចជួបគ្នាវិញបានទេ?

គីមឡេង ៖ « វាពិបាកណាស់ ពេលដែលបែកគ្នាហើយចង់ត្រូវគ្នាវិញ ទោះពេលខ្លះនៅស្រឡាញ់នៅនឹក ប៉ុន្តែនៅតែពិបាកក្នុងការត្រឡប់ ព្រោះដូចដែលគេធ្លាប់និយាយអីចឹង កែវដែលបែកហើយ ទោះផ្គុំវិញក៏មិនដូចដើមដែរ។»

យូណា ៖ « ជួបគ្នាវិញបាន បើសិនជាយើងនៅតែស្រឡាញ់គ្នា ហើយមានរឿងតិចតួច ប៉ុន្តែបើមានចិត្តតែម្ខាង និង ធ្ងន់ធ្ងរ វាច្បាស់ហើយគឺមិនអាចតែម្ដង ព្រោះយើងអត់អាចបង្ខំគេមកវិញទាំងគេអត់ចង់នោះទេ។ ម្យ៉ាងទៀតពេលខ្លះយើងមានរឿងដែលអាចត្រឡប់រកគ្នាវិញ អីចឹងគួរតែត្រឡប់ជាជាងសោកស្ដាយ។»

រូបតំណាង

**ហុងលី ៖** « ទោះបីជាបែកគ្នាក្នុងហេតុផលណាក៏ដោយ ក៏ខ្ញុំគិតថាមិនអាចជួបគ្នាវិញបានដែរ ព្រោះខ្ញុំមើលឃើញបែបហ្នឹងជាច្រើនហើយ ឲ្យតែបែកគ្នាគឺមិនអាចត្រឡប់មកស្រឡាញ់គ្នាវិញទេ អីចឹងគួរតែថែរក្សាពេលដែលមាននៅក្នុងដៃ កុំចាំដល់បាត់បង់បានស្ដាយក្រោយ។»

លីតា ៖ « ពេលខ្លះបន់ឲ្យតែជួបគ្នាដែរ តែពិបាកណាស់ព្រោះពេលដែលដាច់ចិត្តបែកគ្នាគឺសុទ្ធតែមានមូលហេតុហើយ ដូច្នេះទោះត្រូវគ្នាវិញក៏នៅតែដដែល អីចឹងស៊ូមិនជួបគ្នាចុះ ព្រោះទោះបីជាជួបក៏នៅតែឈឺចាប់។»

ថាឡុង ៖ « គឺអាចជួបគ្នាវិញបាន ប៉ុន្តែទាល់តែនៅមានចិត្តទាំងសងខាង ព្រោះបើពីមុនពេលបែកគ្នាអាចថាមានរឿងអីមិនល្អ តែបើយើងចេះកែប្រែគឺនៅតែអាចមានឱកាស។ ម្យ៉ាងទៀតអាចជួបគ្នាវិញក៏ប្រហែលជាមានអ្នកដែលឈឺចាប់អត់ទាន់ដល់កម្រិតអីចឹងហើយនៅតែចង់បន្ត តែបើអ្នកដែលឆ្អែតគឺគេលែងត្រឡប់ហើយ។»

ជួបគ្នាវិញឬមិនជួបគឺអាស្រ័យទៅលើស្ថានភាព និងរឿងដែលយើងធ្លាប់បានធ្វើ។

អត្ថបទ៖ ផេង ផលធិតា