រឿងដែលយើងគួរតែចៀសវាងមុន និងក្រោយពេលហាត់ប្រាណ

2017-04-19 08:16:52
ចំនួនមតិ 0 | ចំនួនចែករំលែក 0

ការហាត់ប្រាណជារឿងល្អចំពោះសុខភាព ប៉ុន្តែយើងក៏ត្រូវដឹងពីប្រការដែលគួរតែចៀសវាងដែរព្រោះបើយើងមិនដឹងវាអាចនឹងធ្វើឲ្យមានបញ្ហាឲ្យសុខភាព ៖

១. កុំហាត់ប្រាណភ្លាមៗក្រោយពេលក្រោកពីដំណេក ៖ ក្រោយពេលក្រោកពីគេងភ្លាមៗរាងកាយយើងមិនទាន់សមស្របនឹងការផ្លាស់ប្ដូរឥរិយាបថភ្លាមៗនោះទេ ដូច្នេះបើសិនជាអ្នកក្រោកភ្លាមហាត់ភ្លាមវាអាចធ្វើឲ្យរាងកាយយើងទទួលការឈឺចាប់។

២. កុំហាត់ប្រាណពេលព្រឹកព្រហាមពេក ៖ មិនបាច់ព្យាយាមក្រោកពីព្រលឹមអុលហាត់ប្រាណ ខណៈពេលព្រះអាទិត្យមិនទាន់រះនោះទេ ព្រោះពេលព្រះអាទិត្យមិនទាន់រះ គឺដើមឈើនៅបញ្ចេញឧស្ម័នកាបូនិចនៅឡើយ។ ដូច្នេះបើយើងហាត់ប្រាណពេលនេះវាអាចឲ្យយើងស្រូបយកឧស្ម័នកាបូនិចចូលទៅក្នុងសួត យើងគួរតែរង់ចាំឲ្យព្រះអាទិត្យរះសិនទើបល្អចំពោះសុខភាព។

៣. ផឹកទឹកមួយកែវមុនពេលហាត់ប្រាណ ៖ ទឹកសំខាន់ណាស់សម្រាប់អ្នកដែលចូលចិត្តហាត់ប្រាណនៅពេលព្រឹក ព្រោះក្នុងរយៈពេលដែលយើងគេងលក់កំហាប់របស់ឈាមនឹងកើនឡើង ហើយស្បែកនឹងបញ្ចេញជាតិទឹកជាប់ជានិច្ច។ ដូច្នេះបើយើងប្រញាប់ហាត់ប្រាណដោយមិនបានបន្ថែមជាតិទឹកវាអាចធ្វើឲ្យរាងកាយបាត់បង់ជាតិទឹក អាចបណ្ដាលឲ្យវិលមុខ។

រូបតំណាង

**៤. កុំហាត់ប្រាណពេលកំពុងចុះអ័ព្ទ ៖** ពេលចុះអ័ព្ទសម្ពាធក្នុងបរិយាកាសចុះទាបធ្វើឲ្យមានជាតិពុលក្នុងបរិយាកាសច្រើនជាងធម្មតា ដូច្នេះអ្នកគួរតែចៀសវាងពេលដែលមានអ័ព្ទ។

៥. កុំងូតទឹកភ្លាមៗក្រោយពីហាត់ប្រាណហើយ ៖ ក្រោយពេលហាត់ប្រាណរួច ហាមងូតទឹកភ្លាមៗ ព្រោះពេលកំពុងហាត់ប្រាណរន្ធញើសបើកចំហដើម្បីបញ្ចេញញើស។ បើសិនយើងស្រោចទឹកទៅលើសរសៃឈាមវានឹងរួមខ្លួនតូចភ្លាមៗធ្វើឲ្យប្រព័ន្ធការពាររាងកាយចុះខ្សោយ ងាយកើតជំងឺផ្ដាសាយ និងអាចធ្វើឲ្យយើងដង្ហក់ទៀតផង។

៦. កុំផឹកទឹកត្រជាក់ពេលក្រោយពេលហាត់ប្រាណ ៖ ការដែលញ៉ាំទឹកត្រជាក់ពេកក្រោយពេលហាត់ប្រាណភ្លាមៗអាចធ្វើឲ្យក្រពះរួញខ្លួន ហើយបណ្ដាលឲ្យឈឺពោះ និងរាករូស។

៧. កុំញ៉ាំអាហារភ្លាមៗក្រោយពេលហាត់ប្រាណ ៖ ខណៈពេលដែលហាត់ប្រាណចលនាឈាមរត់សព្វពេញសារពាង្គកាយដែលធ្វើឲ្យក្រពះ និង ទឹករំលាយអាហារមានប្រសិទ្ធភាពទាប ដូច្នេះអាហារដែលយើងញ៉ាំទៅ មិនរលាយហើយធ្វើឲ្យហើមពោះ ឬឆ្អល់ពោះ។

ដូច្នេះយើងត្រូវទទួលយកការហាត់ប្រាណដ៏ត្រឹមត្រូវមួយ។

ប្រភព ៖ សៀវភៅថែទាំសម្រស់ និង សុខភាព

អត្ថបទ៖ ផេង ផលធិតា