រឿងសំខាន់ៗដែលគ្រប់គ្នាគួរដឹងពី សន្ទះព្រហ្មចារី

2017-03-20 06:44:34
ចំនួនមតិ 0 | ចំនួនចែករំលែក 0

តើអ្នកបានដឹងអ្វីខ្លះអំពីសន្ទះព្រហ្មចារី? គេនិយាយថាគេអាចមើលដឹងថាតើស្ដ្រីម្នាក់នៅក្រមុំ ព្រហ្មចារីឬមិនមែន បើសិនស្ត្រីម្នាក់នោះមានសន្ទះព្រហ្មចារីមួយនេះ។ នេះជាបញ្ហាសំខាន់មួយនៅក្នុងសង្គមខ្មែរក៏ដូចជាផ្នែកជាច្រើនទៀតលើពិភពលោក ដែលកូនកំឡោះតែងរកមើលតំណក់ឈាមដែលនឹងកំណត់ថាកូនក្រមុំរបស់គេនៅព្រហ្មចារីឬអត់ បន្ទាប់ពីការរួមដំណេកលើកដំបូងរបស់ពួកគេ។ ប៉ុន្តែពេលខ្លះស្ត្រីមិនចេញឈាមបន្ទាប់ពីមានការរួមដំណេកលើកដំបូងនោះឡើយ ហើយបញ្ហានេះបានបង្កឱ្យមានការយល់ច្រឡំសម្រាប់គូស្វាមីភរិយាជាច្រើន។

ការស្រាវជ្រាវជាច្រើនបានបង្ហាញថាការមានឈាមក្នុងអំឡុងពេលរួមភេទដំបូងរបស់ប្តីប្រពន្ធមិនអាចវាយតម្លៃលើការមានឬគ្មានព្រហ្មចារីយ៍នោះឡើយ ហើយបើទោះជាមានការហូរឈាម ក៏វាអាចនឹងមិនមែនដោយសារការរហែកសន្ទះព្រហ្មចារីយ៍តែម្យ៉ាងនោះដែរ។ ដើម្បីបានយល់កាន់តែច្បាស់បន្ថែមទៀត វិបសាយ Kanha បានប្រមូលផ្តុំព័ត៌មានសំខាន់ៗដែលអ្នកគួរតែដឹងអំពីសន្ទះព្រហ្មចារី។

អ្វីទៅជាសន្ទះព្រហ្មចារី?

សន្ទះព្រហ្មចារីគឺជាភ្នាសនៅជុំវិញទ្វារមាសរបស់ស្ត្រី ដែលជាធម្មតាមានរន្ធមួយដែលមានទំហំនិងរូបរាងខុសគ្នាពីស្ត្រីម្នាក់ទៅម្នាក់។ សន្ទះព្រហ្មចារីមានវត្តមាននៅក្នុងរាងកាយរបស់មនុស្សស្រីតាំងពីកំណើត ប៉ុន្តែវានឹងកាន់តែស្ដើង និងងាយដាច់រហែកពេលស្ត្រីចាប់ផ្ដើមពេញវ័យ។

តើសន្ទះព្រហ្មចារីមានរូបរាងដូចម្ដេច?

សន្ទះព្រហ្មចារីមានភាពខុសគ្នាពីស្ត្រីម្នាក់ទៅម្នាក់ និងត្រូវបានបែងចែកមាន៤ប្រភេទគឺ៖

- សន្ទះព្រហ្មចារីធម្មតា៖ នេះគឺជាប្រភេទសន្ទះព្រហ្មចារីទូទៅបំផុតក្នុងចំណោមស្ត្រី ដែលក្នុងនោះវាមានរូបរាងដូចព្រះច័ន្ទពាក់កណ្តាល ដែលគ្របដណ្តប់ផ្នែកខ្លះរបស់ទ្វារមាស។

- សន្ទះព្រហ្មចារី Microperforate៖ សន្ទះព្រហ្មចារីនេះគ្របដណ្តប់ទ្វារមាសទាំងមូលដោយមានតែរន្ធតូចមួយប៉ុណ្ណោះ។

- សន្ទះព្រហ្មចារី Septate៖ ប្រភេទនៃសន្ទះព្រហ្មចារីយ៍ដែលមានរន្ធពីរ។

- សន្ទះព្រហ្មចារី Imperforate៖ នេះគឺជាពេលសន្ទះព្រហ្មចារីគ្របដណ្តប់តំបន់ទ្វារមាសទាំងមូលដោយគ្មានរន្ធអ្វីទាំងអស់ ដែលធ្វើឲ្យឈាមរដូវមិនអាចហូរចេញបាន បណ្តាលឱ្យឈឺពោះញឹកញាប់ ហើយជាធម្មតាតម្រូវឱ្យមានការព្យាបាលដោយវះកាត់។

ស្ត្រីអាចដឹងថាសន្ទះព្រហ្មចារីនាងជាប្រភេទអ្វីបានឬទេ?

អ្នកអាចដឹងថាអ្នកមានសន្ទះព្រហ្មចារីប្រភេទណាបាន លុះត្រាតែមានការត្រួតពិនិត្យតាមវេជ្ជសាស្ត្រ។ ការពិនិត្យនេះក៏នឹងអាចឲ្យអ្នកដឹងដែរប្រសិនបើអ្នកមិនមានសន្ទះព្រហ្មចារី។

តើសន្ទះព្រហ្មចារីដាច់រហែកដោយសារអ្វី?

ជាធម្មតាសន្ទះព្រហ្មចារីនឹងត្រូវដាច់ក្នុងអំឡុងពេលរួមភេទ និងបណ្តាលឱ្យហូរឈាមតិចតួច។ ប៉ុន្តែសន្ទះព្រហ្មចារីខ្លះងាយនឹងដាច់រហែកតាមរយៈកត្តាផ្សេងៗដូចជាវ័យ ឬការធ្វើសកម្មភាពខ្លាំងៗ ក៏ដូចជាការលេងកីឡាមួយចំនួន (កាយសម្ព័ន្ធ, ជិះសេះ, ... )។

ក្នុងនោះដែរក៏មានសន្ទះព្រហ្មចារីមួយប្រភេទដែលមានសភាពយឺតយ៉ាងខ្លាំងផងដែរ។ សន្ទះព្រហ្មចារីយ៍ប្រភេទនេះអាចយឺតនៅពេលរួមភេទគ្មានការរហែក ប្រសិនបើរន្ធរបស់វាមានទំហំសមរម្យ។ តែប្រសិនបើរន្ធតូច មានន័យថាអ្នកនឹងមិនអាចរួមភេទឡើយ លុះត្រាតែមានការវះកាត់តិចតួចដើម្បីកាត់ផ្នែកខ្លះនៃសន្ទះព្រហ្មចារីនេះចេញ។

ហូរឈាមពេលរួមភេទបង្ហាញថាស្ត្រីមានព្រហ្មចារី?

នេះគឺជាការយល់ច្រឡំដ៏ធំមួយ។ ស្ត្រីម្នាក់អាចហូរឈាមក្នុងពេលរួមភេទលើកដំបូងរបស់នាងដោយសារតែមានហេតុផលជាច្រើន៖

១. ប្រសិនបើនាងមិនទទួលបានការដាស់អារម្មណ៍ ឬមិនមានទឹករំអិលគ្រប់គ្រាន់ក្នុងអំឡុងពេលរួមភេទ ដែលនាំឲ្យមានការដាច់ ឬរលាត់ជាលិកាយោនីរបស់ស្ត្រី។

២. នៅពេលដែលភាគីបុរសសម្រុកខ្លាំងក្នុងពេលរួមភេទដែលបណ្តាលឱ្យដាច់រលាត់ជាលិកាដែលនៅខាងក្នុងទ្វាមាសរបស់ស្ត្រី។

៣. ដោយសារការឆ្លងមេរោគ។

៤. ដោយសារការដាច់រហែកសន្ទះព្រហ្មចារី។

ទាំងនេះគឺជាចំណេះដឹងមូលដ្ឋានដែលអ្នកគួរតែដឹងអំពីសន្ទះព្រហ្មចារី។ ភាពបរិសុទ្ធគឺមិនអាចកាត់សេចក្ដីដោយភ្នាសស្ដើងដែលអាចបាត់បង់តាមពេលវេលា ឬឈាមប៉ុន្មានតំណក់ដែលអាចមកពីការរួមភេទខ្លាំងៗនោះទេ។ វាគឺជាការជឿទុកចិត្តគ្នាទៅវិញទៅមករវាងមនុស្សពីរនាក់ ៕

ប្រភព៖ Fustany

ប្រែសម្រួលៈ វ៉ាន់ថន