DJ Na Na: យុទ្ធសាស្ត្រទីផ្សារខ្ញុំគឺឲ្យអតិថិជនមករក មិនមែនទៅរកអតិថិជនទេ
- 2017-02-17 06:20:27
- ចំនួនមតិ 0 | ចំនួនចែករំលែក 0
DJ Na Na: យុទ្ធសាស្ត្រទីផ្សារខ្ញុំគឺឲ្យអតិថិជនមករក មិនមែនទៅរកអតិថិជនទេ
«ចំពោះខ្ញុំ និយាយតាមត្រង់ទៅ យុទ្ធសាស្ត្រទីផ្សារគឺឲ្យអតិថិជនជាអ្នករត់មករកប៉ុណ្ណោះ។ » នេះជាការបញ្ជាក់របស់ DJ Nana ម្ចាស់ហ្វេសប៊ុកផេកល្បី DJ Nana TV និង DJ Nana Tips ក្នុងឱកាសចូលរួមសិក្ខាសាលាស្ដីពីការស្ថាបនាធនធាន កាលពីម្សិលមិញ។
ឆ្លើយទៅនឹងសំណួរថាតើកញ្ញាមានយុទ្ធសាស្ត្រអ្វីឲ្យជោគជ័យលើជំនួញ e-commerce? DJ Nana បានបញ្ជាក់ថា ដំបូងឡើយ កញ្ញាធ្វើ clip គ្រាន់តែដើម្បីបង្កើនប្រជាប្រិយភាពក៏ដូចជាផ្ញើសារទៅកាន់ប្រិយមិត្តប៉ុណ្ណោះ ដោយមិនសូវខ្វល់រឿងមានអ្នកឧបត្ថម្ភឬអត់ទេ។ ក្រោយមកចំនួនអ្នកមើលកើនច្រើនខ្លាំងដល់ ១លាន ទៅ១លានកន្លះក្នុងមួយសប្ដាហ៍ ហើយអ្នកឧបត្ថម្ភផ្សេងៗក៏មកទាក់ទងជាបន្តបន្ទាប់ទៅតាមហ្នឹងដែរ។
ថ្លែងទាំងអស់សំណើច កញ្ញាប្រាប់ឲ្យដឹងថា «ខ្ញុំចាប់ផ្ដើមមកដោយសារតែឱកាសហុចឲ្យទេ។ដល់ពេលអ្នកមើលកើនច្រើនអញ្ចឹង ឃើញលុយនៅនឹងមុខហើយ បើមិនយកវាមិនកើត។ មែនទែនទៅ មិនដែលនឹកឃើញថាចង់រកស៊ីខាង e-commerce អីទេ។»
ទោះយ៉ាងណា កញ្ញាក៏បានបញ្ជាក់ដែរថា ភាពជោគជ័យលើជំនួញ e-commerce នេះម្យ៉ាងដោយសាតែការងាររបស់កញ្ញា ជាអ្នកថតឲ្យកម្មវិធីទូរទស្សន៍ និងផលិតកម្មវិធីស្រាប់ដែលងាយស្រួលក្នុងការទាក់ទងក្រុមផលិតផ្សេងៗ និងម្យ៉ាងទៀតក៏កញ្ញាមិនផ្ដោតសំខាន់តែលើពាណិជ្ជកម្មពេកព្រោះមិនចង់ឲ្យអ្នកមើលធុញ។
«និយាយទៅមិនមែនឫកធំអីទេ ខ្ញុំមិនចង់ឲ្យផេកហ្នឹងក្លាយទៅជាផេកពាណិជ្ជកម្មសុទ្ធទេ។ អ្នកខ្លះគាត់អត់យល់ ហើយដាក់ពាណិជ្ជកម្មច្រើនពេក ដែលធ្វើឲ្យផេកធ្លាក់ប្រជាប្រិយភាព ហើយបាត់បង់ទីផ្សារទៅតាមហ្នឹង។ ផេកយើងមានពាណិជ្ជកម្មតែពាក់កណ្ដាលប៉ុណ្ណោះ ហើយពាណិជ្ជកម្មនោះក៏មិនត្រង់ៗពេកដែរគឺតែងធ្វើបែបជាសាច់រឿង។» DJ Nana បន្ថែម៕