វីដេអូ «រីករាយថ្ងៃបុណ្យនៃក្ដីស្រឡាញ់ប្រកបដោយសុវត្ថិភាព» គាំពារស្ត្រីពីការបៀតបៀនផ្លូវភេទ

2017-02-13 09:56:44
ចំនួនមតិ 0 | ចំនួនចែករំលែក 0

ទូរសព្ទ, គ្រឿងអលង្ការ, តុក្កតាធំៗ,បាច់ផ្កា សុទ្ធតែជាកាដូដែលបុរសៗប្រគល់ជូនសង្សារថ្ងៃបុណ្យនៃក្ដីស្រឡាញ់។ តែបុរសទាំងនោះតែងទាមទារការតបស្នងវិញ។ នោះជាអ្វី? គឺជាការប្រគល់ខ្លួន? តើនារីទាំងនោះសុទ្ធតែពេញចិត្ត ក្នុងការលះបង់ខ្លួនប្រាណជូនសង្សារមែនទេ?

ចម្លើយនឹងបង្ហាញក្នុងវីដេអូដែលមានរយៈពេលជាង ១ នាទី ដែលប្រមូលផ្ដុំដោយតារាល្បី មាស សុខ សោភា, ភិន សុដាលីស, ឌីជេ ណាណា ,ស៊ៀន សៀវម៉ី និង សកម្មជនសិស្ស ស្ត្រីបម្រើការផ្លូវភេទ ជាដើម។ កញ្ញា Kate Seewald ទីប្រឹក្សាអង្គការ Safe Cities for Women ដែលផលិតវីដេអូ «រីករាយថ្ងៃបុណ្យនៃក្ដីស្រឡាញ់ប្រកបដោយសុវត្ថិភាព »បានឲ្យដឹង "វីដេអូនោះក្រុមយើងខ្ញុំធ្វើឡើងដើម្បីគាំពារស្ត្រីពីការប្រើបៀតបៀនផ្លូវភេទ និងជួយបង្វែរការគិតខុសរបស់យុវជនមួយចំនួនថ្ងៃ ១៤ កុម្ភៈ"។

កញ្ញា Kate Seewald

ទីប្រឹក្សាអង្គការរូបនេះបានបន្តថា ថ្ងៃ ១៤ កុម្ភៈបើទោះជាមានការរួមភេទក៏ដោយ តែមិនមែនជាការបង្ខិតបង្ខំឡើយ គឺមានការស្ម័គ្រចិត្តពីស្រ្តី។ នាងបន្ថែមថា វីដេអូនោះមិនត្រឹមតែបង្ហោះក្នុង Facebook ប៉ុណ្ណោះទេ។ តែមានគ្រូបង្រៀនមួយចំនួននៅតាមមហាវិទ្យាល័យក្នុងទីក្រុងភ្នំពេញ ក៏បានយកវីដេអូនោះទៅបង្រៀន នឹងបន្ថែមជាមេរៀនសុខភាពផ្លូវភេទ ការព្រមព្រៀងគេងជាមួយគ្នាដោយស្ម័គ្រចិត្តជូនដល់និស្សិតខ្មែរទៀតផង។

Kate បានថ្លែងអំណរគុនដល់ក្រុមការងារ និងអ្នកចូលរួមថតទាំងអស់បានស្ម័គ្រចិត្តដើម្បីជួយដល់សង្គម ដោយមិនត្រូវការថវិកាអ្វីទាំងអស់។៕

កុំឲ្យខាតពេលយូរ តោះមើលវីដេអូនេះទាំងអស់គ្នា!

អត្ថបទៈ ឆដាភា