ស្រីៗគិតឃើញម៉េចបានចូលចិត្តស្លៀកពាក់សិចស៊ី?
- 2017-02-03 02:57:04
- ចំនួនមតិ 0 | ចំនួនចែករំលែក 0
ស្រីៗគិតឃើញម៉េចបានចូលចិត្តស្លៀកពាក់សិចស៊ី?
សព្វថ្ងៃនេះហាក់មានការប្រែប្រួលច្រើនដោយសង្កេតឃើញមាននារីមួយចំនួនចូលចិត្តស្លៀកពាក់និងតុបតែងកាយទៅតាមចំណង់ចំណូល ហើយមួយចំនួនចូលចិត្តបែបសិចស៊ី។ ចង់ដឹងថាចំណាប់អារម្មណ៍របស់ពួកគេយ៉ាងណាទាក់ទាក់ការស្លៀកពាក់ស៊ិចស៊ី តោះ! ទៅស្តាប់ការអះអាង របស់នារី៤រូបដែលនិយមស្លៀកពាក់សិចស៊ីទាំងអស់គ្នា៖
មិន ចេនី ជានិស្សិតឆ្នាំទី២ ផ្នែកគណនេយ្យ នៅសាលា CamEd និងជាម្ចាស់ Online Shop- Beauty and Clothing និយាយថាការតុបតែងខ្លួនជាសិល្បៈលម្អខ្លួនរបស់បុគ្គលម្នាក់ៗ មិនមែនជាមធ្យោបាយបំពេញភ្នែកបុគ្គលណាម្នាក់ទ្បើយ តែយុវតីវ័យ២០ឆ្នាំរូបនេះក៏មានដែនកំនត់ក្នុងការស្លៀកពាក់ និង ដឹងថាទៅណាត្រូវស្លៀកពាក់បែបណាផងដែរ។ «សម្រាប់ខ្ញុំមនុស្សដែលបំពេញចិត្តខ្ញុំគឺខ្ញុំខ្លួនឯង ចឹងហេតុអីត្រូវខ្លាចចំពោះការស្លៀកពាក់តាមចំណង់ខ្លួនឯង? «ខ្ញុំគិតថាស្តាយនេះ (ស៊ិចស៊ី) វាស័ក្តិសមនឹងខ្ញុំ វាធ្វើឲ្យខ្ញុំមានភាពជឿជាក់ រាល់ថ្ងៃមានសម្ពាធពីការងារខាងក្រៅច្រើនហើយ ហេតុអីត្រូវឲ្យការវាយតម្លៃរបស់អ្នកដទៃមករំខានអារម្មណ៍យើងទៀត?»។
ងាកមក វង្ស ដាណែត ឯណេះវិញក៏មិនខុសពី ចេនី ប៉ុន្មានដែរគឺចូលចិត្តការស្លៀកពាក់សិចស៊ី។ ស្រ្តីវ័យ២៤ឆ្នាំ ដែលជាបុគ្គលិកក្រុមហ៊ុនរូបនេះអះអាងថា «សម្រាប់ខ្ញុំវាជាចំណង់ចំណូលចិត្តតាំងពីក្មេង ហើយការស្លៀកពាក់បែបនោះធ្វើឲ្យខ្ញុំមានការជឿជាក់លើខ្លួនឯង ហើយចង់បង្ហាញពីភាពសិចស៊ីនៃរាងកាយរបស់ខ្ញុំ ដែលខិតខំហាត់ប្រាណដើម្បីឲ្យរាងស្អាតមិនមែនដើម្បីទាក់ទាញចិត្តមនុស្សប្រុសទេ» ។ «ការស្លៀកពាក់ស៊ីចស៊ី មិនមែនជាដើមចងដែលធ្វើឲ្យកើតមានការរំលោភ ឬបៀតបៀនកេរ្តិ៍ខ្មាស់ឡើយ!» ដាណែត បញ្ជាក់។
ចំណង់ចំណូលចិត្តរបស់និសិ្សតឆ្នាំទី៤ ផ្នែកច្បាប់ នាម ស្រីលាក់ គឺស្លៀកសំពត់ខ្លី ពាក់អាវបញ្ចេញដើមទ្រូង ស្រីលាក់ថា «ធ្វើបែបនេះធ្វើឲ្យខ្ញុំមានអារម្មណ៍ស្រស់ស្រាយ ខ្ញុំបានធ្វើអ្វីដែលជាចំណូលចិត្តពីធម្មជាតិរបស់ខ្ញុំ ខ្ញុំអត់ដែលខ្វល់ថាអ្នកដទៃគិតម៉េចចំពោះខ្ញុំទេ សំខាន់ខ្ញុំស្គាល់ខ្លួនឯងជានរណា បុគ្គលមួយចំនួនគិតថាការស្លៀកពាក់ចឹងគឺដើម្បីទាក់ឲ្យប្រុសៗមើល ប៉ុន្តែពាក្យទាំងនោះមិនអាចបញ្ឈប់ចំណូលចិត្តខ្ញុំទេ»។
ស៊ុន លីម៉ី អាយុ២៤ឆ្នាំ ជាម្ចាស់ហាងលក់ស្បែកជើងបុរសនារី FiiT Cambodia បកស្រាយថា មិនមែនសិចស៊ីរហូតទេ គឺទៅតាមកាលៈទេសៈ ដើម្បីបង្ហាញពីការស្រលាញ់ និងយកចិត្តទុកដាក់ ចំពោះរូបរាងកាយពីកំណើតរបស់ខ្លួន។«ខ្ញុំចូលចិត្តស្លៀកពាក់ឲ្យចេញផ្នែកណាមួយនៃរាងកាយខ្ញុំដែលខ្ញុំចង់បង្ហាញ ព្រោះវាធ្វើឱ្យខ្ញុំមានអារម្មណ៍ល្អ រឹតតែគិតគូរពីសុខភាព និងរូបកាយថែមទៀត»។
មិត្តនារីដទៃទៀតមានយោបល់យ៉ាងណាដែរ? ហេតុអ្វីបានជាចូលចិត្តស្លៀកពាក់សិចស៊ី?