ប្តីចូលចិត្តដើរលេងយប់ តើគួរធ្វើយ៉ាងណាល្អ?
- 2017-01-19 04:43:25
- ចំនួនមតិ 0 | ចំនួនចែករំលែក 0
ប្តីចូលចិត្តដើរលេងយប់ តើគួរធ្វើយ៉ាងណាល្អ?
តើស្រីៗយើងធា្លប់ជួបបញ្ហានេះទេ? ប្តីមិនសូវចំណាយពេលនៅផ្ទះ គាត់ឧស្សាហ៍ដើរលេងយប់ជាមួយមិត្តភក្តិ។ តើរាល់ពេលដែលវាកើតឡើង អ្នកពិបាកនឹងទ្រាំក្នុងចិត្តហើយព្យាយាមខល ទៅគាត់ជាច្រើនដងត្រូវទេ?ពេលជួបរឿងបែបនេះ តើស្រីៗយើងមានអារម្មណ៍បែបណា? ដោះស្រាយដូចម្តេចទៅ?
ខ្ញុំតែងគិតថាខ្លួនមិនសំខាន់ចំពោះប្តី ហើយយល់ថានៅពេលដែលគេចេញក្រៅ អាចនឹងមានស្រីផ្សេង។ នេះជាការគិតរបស់អ្នកស្រី រស្មី ជាស្រ្តីមេផ្ទះ អ្នកស្រីថា «ប្តីខ្ញុំគឺជាមនុស្សមា្នក់ចូលចិត្តសប្បាយ គាត់ចូលចិត្តចេញដើរយប់ ពេលខ្លះធា្លប់ឈ្លោះគា្នដែរ ដោយសារគាត់មកផ្ទះយប់ៗពេក ហើយពេលខ្លះទៀតខ្ញុំខឹងឡើងចេញទៅតាមរកទៀត។
នៅពេលដែលសួរថា អ្នកស្រីមានដែលជជែកជាមួយស្វាមីពីរឿងនេះទេ? ស្រ្តីកូន២ វ័យ៤០ឆ្នាំរូបនេះឆ្លើយថា ពេលខ្លះគ្មានអ្វីច្រើនទេសម្រាប់ឃាត់ឲ្យប្តីឲ្យនៅផ្ទះ គ្រាន់តែឧស្សាហ៍ទូរស័ព្ទសួរ និងឲ្យឆាប់ត្រលប់មកផ្ទះវិញ ប្រាប់ពីការបារម្ភរបស់ប្រពន្ធកូន បារម្ភពីសុខភាព និងសុវត្ថិភាព។ «និយាយយូរៗទៅគាត់កាត់បន្ថយដែរ តែឲ្យឈប់ដាច់គឺអត់ម៉ង ចរិតគាត់ចូលចិត្តដើរលេងយប់ ពិបាកកែណាស់អូនអើយ»។
មិនខុសគ្នាប៉ុន្មានទេ អ្នកស្រី គន្ធា អាយុ ៣៨ ឆាំ្ន ក៏បានរ៉ាយរ៉ាប់ឲ្យដឹងថាគាត់ជួបបញ្ហាបែបនេះដែរ។ «ប្តីខ្ញុំក៏ធ្លាប់ចេញដើរយប់ដែរ គ្រាន់តែមិនសូវជាញឹកញាប់ប៉ុន្មាន យ៉ាងច្រើនម៉ាអាទិត្យម្តងអីហ្នឹង ណាស់តែពួកម៉ាកហៅ» ។ ស្រ្តីកូន៤ក្នុងបន្ទុករូបនេះ គិតថាស្រីណាក៏ដូចស្រីណាដែរ ឲ្យតែប្តីដើរយប់មិនដែលសប្បាយចិត្តទេ បើមិនគិតរឿងនេះ ក៏គិតរឿងនោះដែរ តែសំខាន់យើងចេះនិយាយពន្យល់ប្រាប់ ហេតុផលគាត់ យូរៗគាត់នឹងឈប់ដោយឯកឯង។
វាជារឿងធម្មតាទេព្រោបើឃាត់មិនឲ្យប្តីចេញក្រៅ ឲ្យនៅតែផ្ទះរហូតក៏មិនបានដែរ ត្រូវចាំថាមនុស្សប្រុសគេក៏ចង់មានពេលវេលាសម្រាប់ខ្លួនគេដែរ នេះជាការលើកឡើងរបស់អ្នករៀបការថ្មីថ្មោង អ្នកនាង ចាន់ណា។ «សម្រាប់ខ្ញុំមិនហាម ហើយក៏មិនធូរលុងពេកដែរ តែត្រូវមានលក្ខខណ្ឌ និងហេតុផលច្បាស់លាស់ថាទៅធ្វើអី? ជួបជុំមិត្តភក្តិ ចៅហ្វាយនាយ ម៉ោងប៉ុន្មានត្រូវម៉ោវិញ តែមិនមែនញឹកញាប់ពេកទេ»។
ចុះគ្នាយើងផ្សេងទៀត គិតម៉េចដែរចំពោះរឿងនេះ? មានវិធីអីល្អចរចាជាមួយប្តី?