អ្នកម្តាយនិយាយពីអារម្មណ៍ពេលមានកូនដំបូង….ឡើងរំភើប!!

2017-01-18 09:12:35
ចំនួនមតិ 0 | ចំនួនចែករំលែក 0

គេថាគ្រួសារមួយពេញលេញគឺជាគ្រួសារមួយដែលមាន ប្តីប្រពន្ធ ជាមួយនិងកូនតូចៗ។ ប្តីប្រពន្ធណាក៏ចង់មានកូនជារបស់ខ្លួនដែរ ព្រោះកូនគឺជាខ្សែចំណង ដែលនឹងមកចងរឹតចំណងអាពាហ៍ពិពាហ៍របស់គេកាន់តែរឹងមាំ ហើយកូនក៏ជាកម្លាំងចិត្តដ៏សំខាន់ក្នុងការជួយជំរុញពួកគេឲ្យខិតខំទៅមុខ ដើម្បីអនាគតក្រុមគ្រួសារ។

ចង់ដឹងថា គ្រួសារមួយ ជាពិសេស អ្នកម្តាយនៅពេលដឹងថាខ្លួនមានកូនដំបូងមានអារម្មណ៍យ៉ាងណា? តោះទៅស្តាប់មតិយោបល់អ្នកម្តាយជាមួយកញ្ញាទាំងអស់គ្នា!

អ្នកម្តាយដំបូងគេគឺ ស្រីណុច។ មិនត្រឹមតែជាអ្នកម្តាយ ស្រីណុចក៏ជាផលិតករព័ត៌មានរបស់ស្ថានីយ៍ទូរទស្សន៍ក្នុងស្រុកមួយផងដែរ។ ស្រីណុចបច្ចុប្បន្នកំពុងមានផ្ទៃពោះ៨ខែ។ រំលឹកទៅដល់ថ្ងៃដំបូងដែលដឹងថាខ្លួនមានផ្ទៃពោះនោះ ស្រីណុចថា «វាជាអារម្មណ៍រំភើប រកអ្វីថ្លែងមិនបាន ដើរ ដេក ឈរ អង្គុយ គឺញញឹមរហូត ព្រោះចិត្តខ្លួននិងស្វាមីចង់បានកូនតាំងតែពីរៀបការដំបូង។

អ្នកស្រី ស្រីណុចនិងស្វាមី

តែមនុស្សធ្លាប់នៅខ្លូនមួយ ដើរទៅណា មកណាភ្លាមៗ រហ័សរហួន ពេលចាប់ផ្តើមមានផ្ទៃពោះក៏មានការពិបាកបន្តិចបន្តួច ដែលជាទូទៅយើងហៅថាចាញ់កូន មានដូចជា ញាំមិនសូវបាន(អ្វីក៏មិនឆ្ងាញ់) គេងក៏មិនសូវលក់ ឧស្សាហ៍វិលមុខ មួម៉ៅច្រើន ហើយពេលកូនកាន់តែចាស់ខែ កាន់តែពិបាក ជាពិសេស រឿងដើរ អង្គុយតែម្តង ចុករោយគ្រប់កន្លែង ហើយមានពេលខ្លះទៀតពិបាកដកដង្ហើម ឬចង់ខ្យល់ចាប់ក៏មាន។

ដោយឡែក អ្នកនាង សន សុខឃាង ដែលទើបតែសម្រាលកូនរួចថ្មីៗនេះ បានប្រាប់ថា «រំភើបខ្លាំងស្ទើររកពាក្យអីនិយាយមិនត្រូវ ចង់តែឃើញមុខកូនឆាប់ៗ»។ អ្នកម្តាយវ័យក្មេងរូបនេះបន្តថា ពពោះមិនមែនជារឿងងាយស្រួលទេ ជាពិសេសគឺកូនដំបូងតែម្តង ឆ្លងកាត់ការលំបាកច្រើនណាស់ទម្រាំដល់ថ្ងៃសម្រាល ប៉ុន្តែអ្នកនាងសំណាងដែលបានស្វាមីយកចិត្តទុកដាក់ ថ្នាក់ថ្នមចិត្តមិនឲ្យទាស់។

ចំណែកអ្នកស្រី សូនីដា អ្នកម្តាយដែលកំពុងមានកូនបីនាក់នៅក្នុងបន្ទុកបាន ចែករំលែកថា «ពេលក្លាយជាម្តាយគេដំបូង រំភើបខ្លាំង រំភើបឡើងហោះ ព្រោះកាលនោះស្រលាញ់ក្មេងណាស់ ដើរពរតែកូនគេទេ»។ និយាយការលំបាកដែលអ្នកស្រីឆ្លងកាត់ ក៏មិនខុសពីអ្វីដែលស្រីណុចឆ្លងកាត់ដែរ គឺចាញ់កូន ល្ហិតល្ហៃ មិនស្រណុកខ្លួន រហូតដល់ថ្ងៃសម្រាល ជាថ្ងៃដែលអ្នកស្រីឆ្លងកាត់ការឈឺចាប់បំផុតក្នុងជីវិត ឈឺសឹងតែទ្រាំមិនបាន ប៉ុន្តែការឈឺចាប់ទាំងអម្បាលម៉ានរលាយបាត់ដូចគេបះ គ្រាន់តែបានឮសំឡេងកូនយំ គ្រាន់ត្រឹមតែបានឃើញមុខកូន។

និយាយដល់ត្រឹមនេះ អ្នកស្រីឈប់មួយស្របក់ហាក់ដូចជាកំពុងគិត មុននឹងប្រាប់យើងបន្តថា «កាលនោះដោយសារឈឺចាប់ពេក ពិបាកពេក សឹងតែស្បថជាមួយខ្លួនឯងថា តែហ្នឹងបានហើយ លែងចង់បាន លែងចង់មានហើយ។ តែមិនបាន២ឆ្នាំស្រួលបួលផង មានមួយទៀតបាត់ រហូតដល់ឥលូវមានបី ងាកទៅនេះម៉ាក់ ងាកទៅនោះម៉ាក់ ឲ្យពេញតែផ្ទះ»។ មានក្តីសុខមែនទែននៀក!!

អ្នកស្រី សូនីដានិងកូនប្រុស

ចុងក្រោយអ្នកម្តាយរបស់យើងទាំងបីបានផ្តាំតាមកញ្ញាដូចៗគ្នា ថាសូមឲ្យកូនៗគ្រប់រូបស្រលាញ់ម្តាយរបស់ខ្លូនឲ្យបានច្រើន ព្រោះពួកគាត់ស្រលាញ់យើងជាងអ្នកណាទាំងអស់។ ស្រលាញ់ទាំងមិនដឹង ទាំងមិនគិតថាយើងជាអ្វី ដឹងត្រឹមតែម្យ៉ាងយើងគឺកូន តបស្នងគាត់ឲ្យសមតម្លៃណា!!!

អត្ថបទៈ May