តោះយើង! ចាប់ផ្ដើមតុបតែងផ្ទះត្រៀមចូលឆ្នាំចិន

2017-01-18 06:47:25
ចំនួនមតិ 0 | ចំនួនចែករំលែក 0

ចូលឆ្នាំចិននឹងចាប់ផ្ដើមអាទិត្យក្រោយនេះហើយ មានត្រៀមហើយឬនៅ? ឥឡូវនេះ សាកមកមើលរបស់សម្រាប់តុបតែងដើម្បីនាំលាភសំណាងធំៗចូលផ្ទះក្នុងឆ្នាំថ្មីនេះបន្តិចមើល៍៖

១. ក្រដាសបិទសងខាងទ្វារផ្ទះ៖ គឺជាការនាំសំណាងល្អសម្រាប់ឆ្នាំថ្មី។ ជាទូទៅគេបិទវាជាគូ ដោយក្រដាសនីមួយៗត្រូវគេសរសេរតួអក្សរចិន៧តួនៅលើក្រដាសក្រហម។ អត្ថន័យនៃអក្សរអាចជាកំណាព្យ ឬក៏ជាឃ្លាសិរីសួស្ដីជាដើម។ គេអាចទុកក្រដាសបិទនេះរហូតដល់ពេលចូលឆ្នាំថ្មីម្ដងទៀត។ បន្ថែមពីលើនោះ គេក៏បន្ថែមឃ្លា៤ អក្សរទៀតនៅខាងលើមាត់ទ្វារផងដែរ។

២. ដើមក្រូចឃ្វិច៖ សម្រាប់សុំទ្រព្យ និងសំណាងដោយសារក្នុងភាសាចិនដើមនេះមានសំឡេងស្រដៀងនឹងពាក្យ 'មាស' និង 'សំណាង'។

៣. ភ្ជួរគោមក្រហមនៅទ្វារ៖ ប្រជាជនចិនតែងជឿថាការភ្ជួរគោមក្រហមតាមមាត់ទ្វារផ្ទះ, ការិយាល័យ, ឬតាមផ្លូវគឺអាចបណ្ដេញសំណាងអាក្រក់ចេញបាន។

៤. កាត់ក្រដាសបិទនៅបង្អួច៖ ជាការនាំសំណាង និងសុភមង្គល។ អាចប្រើពណ៌ច្រើនបាន តែជាទូទៅគេប្រើពណ៌ក្រហម។ គេកាត់រូបតំណាងផ្កា, តួអក្សរចិន, រូបមាសប្រាក់ ឬសត្វទៅតាមឆ្នាំនីមួយៗជាដើម។ ឆ្នាំនេះប្រាកដជាពេញនិយមរូបមាន់មិនខាន។

៥. ផ្កាអង្គាសីលរីក៖ សម្រាប់សេចក្ដីសុខសប្បាយចូលឆ្នាំថ្មី។ បុណ្យចូលឆ្នាំចិនក៏អាចហៅម្យ៉ាងទៀតថាបុណ្យនិទាឃៈរដូវដែរព្រោះវាជាពេលផ្កាចាប់ផ្ដើមរីក។ ដូច្នេះហើយវាមិនចម្លែកទេដែលគេតុបតែងផ្ទះដោយប្រើផ្ការីកស្អាតៗ ដូចជាផ្កាអង្គាសីល ឬផ្កាអ័រគីដេជាដើម។ ម្យ៉ាងដើម្បីសុំសុខសប្បាយស្រស់ស្រាយឆ្នាំថ្មី និងម្យ៉ាងទៀតគឺជាការលម្អផ្ទះឲ្យស្អាត។

៦. បិទតួអក្សរបញ្ច្រាស៖ ប្រជាជនចិនក៏មានជំនឿលើការកាត់ក្រដាសរាងដូចគ្រាប់ពេជ្រដែលមានអក្សរ សំណាងល្អ (福 [fú /foo/]) ហើយគេបិទបញ្ច្រាសដើម្បីឲ្យសំណាងទាំងឡាយហូរចាក់មកលើសមាជិកគ្រួសារ និងអ្នកទាំងអស់ដែលចេញចូលតាមទ្វារនោះ៕