ឈ្លោះគ្នាច្រើនស្នេហាកាន់តែរឹងមាំ បើគូស្នេហ៍ចេះពីវិធីការពារនិងដំណោះស្រាយ ៥ យ៉ាងនេះ
- 2020-02-10 05:20:00
- ចំនួនមតិ 0 | ចំនួនចែករំលែក 0
ឈ្លោះគ្នាច្រើនស្នេហាកាន់តែរឹងមាំ បើគូស្នេហ៍ចេះពីវិធីការពារនិងដំណោះស្រាយ ៥ យ៉ាងនេះ
រាល់បញ្ហានិងជម្លោះទាំងឡាយដែលតែងតែកើតមានរវាងគូស្នេហ៍ វាជារឿងទូទៅដែលគ្មាននរណាម្នាក់អាចជៀសផុត។ អ្នកអាចនឹងខឹងឪពុកម្តាយ មិត្តភ័ក្តិ ចៅហ្វាយនាយ ឬមនុស្សស្គាល់គ្នា ប៉ុន្តែអ្វីដែលធ្វើឲ្យអារម្មណ៍តានតឹងបំផុត គឺនៅពេលអ្នកមានបញ្ហាខឹងអន់ចិត្តជាមួយនឹងដៃគូដែលខ្លួនស្រលាញ់ ហើយក៏ជាមនុស្សម្នាក់ដែលត្រូវចំណាយពេលរស់នៅជាមួយគ្នាពេញមួយជីវិតដែរ។ ប្រសិនបើអ្នកមិនចង់ឲ្យជម្លោះកើតឡើងដដែលៗខ្លាំងពេក និងដើម្បីការពារមិនឲ្យស្នេហាដាច់រហែក គួរដឹងពីវិធី ៥ យ៉ាងនេះ។
១. ជ្រើសរើសពេលវេលាដោយប្រុងប្រយ័ត្នបំផុតដើម្បីនិយាយគ្នា
នេះគឺជាគន្លឹះសំខាន់ក្នុងការថែរក្សាចំណងស្នេហាឲ្យបានរឹងមាំ។ ប្រសិនបើអ្នកនិយាយជាមួយដៃគូនៅពេលខឹងខ្លាំង ពាក្យសម្តីគ្រប់ម៉ាត់ដែលមិនសមគួរ អាចនឹងរបូតចេញពីមាត់ដោយអចេតនា។ ពេលនោះហើយ ដែលអាចបង្កក្តីឈឺចាប់ទាំងសងខាងទ្វេដង។
ព្យាយាមរង់ចាំយ៉ាងហោចណាស់ ២ ម៉ោងសិន ដើម្បីឲ្យចិត្តត្រជាក់បន្តិច មុននឹងនិយាយវែកញែករកខុសត្រូវ និងអាចដឹងពីហេតុផលច្បាស់លាស់។ ដាច់ខាតមិនត្រូវយកម៉ោងដែលអ្នកកំពុងតែស្រ្តេសអស់កម្លាំង ដូចជាពេលមុនចូលគេង ឬចេញពីធ្វើការ ដើម្បីមកតតាំងប្រឈមមុខដាក់គ្នាឡើយ។ គួរជ្រើសរើសពេលវេលាណាមួយ ដែលអ្នកទាំងពីរមានថាមពលពេញលេញ អាចបន្ធូរអារម្មណ៍រៀងខ្លួន ទើបដំណោះស្រាយមានប្រសិទ្ធភាព។
២. មិនវាយប្រហារគ្នា
នេះជាដំណាក់កាលសំខាន់មួយទៀត ដែលមនុស្សភាគច្រើនពុំសូវបានគិតដល់។ ពេលខ្លះអ្នកមិនពេញចិត្តនូវទង្វើរបស់ដៃគូ និងចង់ឲ្យគាត់មានការកែប្រែ។ ហេតុនេះហើយ ជំនួសឲ្យការស្តីប្រទេចដោយពាក្យពេចន៍មិនសមរម្យ អ្នកគួរនិយាយពន្យល់តាមសម្រួល បញ្ជាក់ពីអារម្មណ៍មិនសប្បាយចិត្ត ចេញពីបេះដូងពិត ដល់ពេលណាមួយ គាត់នឹងយកគំនិតរបស់អ្នកទៅពិចារណាឡើងវិញមិនខានទេ។
៣. ស្តាប់ហេតុផលពីគ្នា
ជាក់ស្តែងនៅពេលខឹង ចិត្តក៏ក្តៅ អារម្មណ៍ក៏ឆាបឆួល ពិបាកតាំងស្មារតី ថែមទាំងមិនចង់ស្តាប់មិនចង់ឭការបកស្រាយអ្វីទាំងអស់។ យ៉ាងណាមិញ អ្នកមិនអាចបន្តឫកពា បណ្តោយតាមចិត្តដូចក្មេងបានទៀតឡើយ ពុំដូច្នោះទេ រឿងរ៉ាងនឹងកាន់តែស្មុគស្មាញស្រាយមិនចេញ។ ជួនកាល វាអាចជាការយល់ច្រឡំពីគ្នា ដូច្នេះគួរចេះទុកពេលវេលា ស្តាប់ហេតុផលនិងការបកស្រាយរបស់ដៃគូ ឲ្យបានត្រឹមត្រូវជាមុនសិន។
៤. ត្រូវចាំថានរណាក៏អាចមានកំហុសដែរ
គ្រប់គ្នាសុទ្ធតែធ្លាប់ធ្វើខុស គ្រាន់តែច្រើនឬតិចប៉ុណ្ណោះ។ ការរំពឹងទុក ឬទាមទារខ្ពស់ពេក អាចធ្វើឲ្យអ្នកស្រងាកចិត្តដោយមិនដឹងខ្លួន។ គ្មាននរណាម្នាក់ល្អឥតខ្ចោះឡើយ បើអង្គុយចាំតែចាប់កំហុស ដោយមិនជួយលើកទឹកចិត្តនិងកែលម្អគ្នាទៅវិញទៅមក ព្យាយាមយ៉ាងណាក៏ទៅមុខមិនរួចដែរ។
៥. មិនខ្លាចនឹងនិយាយពាក្យសុំទោស និងអត់ឱន
មនុស្សដែលមិនហ៊ានប្រើពាក្យ "សុំទោស” នៅពេលមានកំហុស ព្រោះគេខ្លាចដៃគូរបស់ខ្លួន គិតថាអន់ មានភាពអៀនខ្មាស និងខ្វះភាពក្លាហាន។ ក្នុងហេតុផលណាមួយក៏ដោយ គួររៀននិយាយ "សុំទោស" ប្រសើរជាងពាក្យថា "ប៉ុន្តែ” ដើម្បីនិយាយតវ៉ា រកលេសចង់ឈ្នះ។ សុំទោស មិនមែនមានន័យថាអន់ មានតែអាចធ្វើឲ្យគ្រប់យ៉ាងល្អប្រសើរឡើង៕
ចុចអានបន្ត៖ ពេលមនុស្សប្រុសចាប់អារម្មណ៍លើនារីណាម្នាក់ គេនឹងសង្កេតរឿងទាំងនេះ