ទម្លាប់៥ សាមញ្ញៗដែលអ្នកធ្វើជាប្រចាំ អាចធ្វើឱ្យអ្នកឈឺខ្នងដោយមិនដឹងខ្លួន
- 2020-02-03 07:50:00
- ចំនួនមតិ 0 | ចំនួនចែករំលែក 0
ទម្លាប់៥ សាមញ្ញៗដែលអ្នកធ្វើជាប្រចាំ អាចធ្វើឱ្យអ្នកឈឺខ្នងដោយមិនដឹងខ្លួន
ការឈឺឆ្អឹងខ្នងស្របពេលដែលអ្នកមានអាយុច្រើនជារឿងធម្មតា ព្រោះរាងកាយមានសភាពទ្រុឌទ្រោមជាងក្មេង។ យ៉ាងណាមិញ បច្ចុប្បន្នគឺសង្កេតឃើញថាក្មេងៗក៏ជួបប្រទះបញ្ហាឈឺចង្កះ និង ខ្នងញឹកញាប់ណាស់ដែរ ស្របពេលដែលអាយុនៅតិចសោះ។ ពេលខ្លះ ការចុករោយនោះគឺបណ្តាលមកពីកាយវិការមួយចំនួនរបស់អ្នកដែលធ្វើជាប្រចាំ ហើយវាអាចនាំឱ្យអ្នកឈឺឆ្អឹងឆ្អែងដោយមិនដឹងខ្លួន កាយវិការទាំងនោះរួមមាន៖
១. អង្គុយ ឬ ឱនចុចទូរសព្ទ
ដូចដែលបានដឹងស្រាប់ នេះគឺជាសម័យទូរសព្ទ ដូច្នេះហើយម្នាក់ៗគឺតែងមានទូរសព្ទជាន់នឹងដៃជានិច្ច។ យ៉ាងណាមិញ ការប្រើប្រាស់ទូរសព្ទខុសទំនង និង ក្នុងរយៈពេលយូរគឺបង្កឱ្យមានបញ្ហាដល់រាងកាយដូចជាការឈឺឆ្អឹងខ្នងជាដើម។ ពេលអ្នកអង្គុយ ហើយ ឱនចុចទូរសព្ទគឺធ្វើឱ្យអ្នកប្រឹងផ្នែកឆ្អឹងខ្នង និង ក ខ្លាំង។ ដូចនេះ បើអ្នកទម្លាប់មានកាយវិការបែបនេះរយៈពេលយូរ មិនយូរមិនឆាប់ អ្នកនឹងប្រឈមទៅនឹងការឈឺផ្នែកឆ្អឹងខ្នងជាមិនខាន។
២. គេងផ្កាប់លេងទូរសព្ទ ឬ អានសៀវភៅ
សម្រាប់មនុស្សមួយចំនួនគឺគាត់ចូលចិត្តការគេងផ្កាប់នៅលើពូកដើម្បីចុចទូរសព្ទ មើលរឿង ឬ អានសៀវភៅព្រោះ គាត់គិតថាវាធ្វើឱ្យស្រួលខ្លួន និងមិនចាំបាច់ក្នុងការកាន់នាំចុកដៃ។ យ៉ាងណាមិញ កាយវិការគេងបែបនេះ វាមានផលវិបាករបស់វាដូចគ្នា ព្រោះការគេងបែបនេះធ្វើឱ្យអ្នកប្រឹងផ្នែកកខ្លាំងដើម្បីទប់លំនឹង ដូច្នេះហើយទើបការគេងបែបនេះរយៈពេលយូរនឹងធ្វើឱ្យខ្នងរបស់អ្នកប្រឹងដូចគ្នា ហើយ អាចប៉ះពាល់រហូតដល់មានការឈឺចុកចាប់។
៣. អង្គុយប្រើកុំព្យូទ័រលើសពី២ម៉ោង
ក្នុងពេលបច្ចុប្បន្ន ដោយសារការមមាញឹកនៃការងារ ឬ ការសិក្សា ធ្វើឱ្យយុវជន យុវនារីម្នាក់ៗដកខ្លួនមិនរួចពីមុខកុំព្យូទ័រ រហូតភ្លេចខ្លួនអង្គុយច្រើនម៉ោងជ្រុល។ ការអង្គុយបែបនេះរយៈពេលយូរ គឺប៉ះពាល់ខ្លាំងដល់ផ្នែកខាងក្រោមនៃឆ្អឹងខ្នង និង អាចបង្កឱ្យមានការចុករោយខ្លាំង។ ដូច្នេះ បើអ្នកមិនចង់ទទួលការឈឺចាប់នោះ អ្នកគួរងើបឈរ ឬ ដើរចេញពីកុំព្យូទ័រ រយៈពេល៣០-៤០នាទីម្តង។
៤. អង្គុយកៅអីទាបផ្ទាល់ដី (បែបជប៉ុន)
មានមនុស្សមួយចំនួនចូលចិត្តអង្គុយកៅអីទាបៗផ្ទាល់ដី ដែលត្រូវបានប្រជាជនជប៉ុននិយមប្រើប្រាស់ ពីព្រោះវាមានភាពងាយស្រួលក្នុងការទុកដាក់ ជាពិសេសស័ក្តិសមជាមួយនឹងទីធ្លាតូចចង្អៀត។ កៅអីប្រភេទនេះមានរូបរាងតូចច្រឡឹង ស្អាត និង ងាយស្រួលអង្គុយ ក៏ប៉ុន្តែវាពិតជាមានផលវិបាករបស់វា ពោលគឺបើអ្នកឧស្សាហ៍អង្គុយលើវាញឹកញាប់ ឬ ក្នុងរយៈពេលយូរ វានឹងផ្តល់ផលប៉ះពាល់ដល់ឆ្អឹងខ្នងរបស់អ្នកជាមិនខាន។
៥. អង្គុយគងទាក់ខ្លា
សុភាពនារីភាគច្រើនគឺនិយមក្នុងការអង្គុយគងលើជើងម្ខាង ឬ គងទាក់ខ្លានេះឯង។ ការអង្គុយបែបនេះក៏អាចធ្វើឱ្យអ្នកឈឺឆ្អឹងខ្នងបានដែរ ព្រោះវាមានសម្ពាធដល់ផ្នែកខ្នង និង ជើងម្ខាងដែលត្រូវទ្រាំទ្រទម្ងន់ធ្ងន់។ ហេតុដូចនេះហើយ អ្នកគួរទម្លាប់កាត់បន្ថយនូវរបៀបអង្គុយគងទាក់ខ្លានេះចោលខ្លះ បើមិនចង់ឱ្យឆ្អឹងខ្នងរបស់អ្នកមានបញ្ហាច្រើនជាងនេះ៕
អានបន្ត៖ គន្លឹះ ៦ យ៉ាងធ្វើឱ្យអ្នកគេងលក់ស្រួល ស្កប់ស្កល់ល្អ គ្មានការរំខាន