ពាក្យទាំង ៥ហាមនិយាយ ទៅកាន់មនុស្សកំពុងបាក់ទឹកចិត្ត

2020-01-30 10:00:00
ចំនួនមតិ 0 | ចំនួនចែករំលែក 0

អ្នកអាចនឹងមិនដឹងថានៅពេលមនុស្សក្បែរខ្លួនយើងមានរឿងខូចចិត្ត ឬកំពុងមានបញ្ហា ពាក្យសម្ដីខ្លះដែលយើងនិយាយដើម្បីលួងលោមគេអាចធ្វើឲ្យស្ថានការណ៍កាន់តែអាក្រក់លើសដើម ទាំងយើងមិនបានតាំងចិត្តសូម្បីបន្តិច។ ដូច្នេះថ្ងៃនេះ កញ្ញា សូមបង្ហាញតិចនិកដើម្បីជួយឲ្យអ្នកក្លាយជាអ្នកលួងលោមដ៏ល្អ ដោយគ្រាន់តែចៀសវាង ពាក្យចំនួន ៥ខាងក្រោមនេះ៖

១. ហាមនិយាយថា “កុំបាច់គិតច្រើនពេក”

ឧទាហរណ៍៖ នៅពេលផ្ទះមិត្តរបស់អ្នកត្រូវចោរប្លន់

A: ណ្ហើយ... កុំទៅគិតច្រើនអី

B: កុំឲ្យគិតច្រើនម៉េច ហ្អែងមិនជួបដូចគ្នា ចេះតែនិយាយបានហើយ

អ្វីដែលគួរធ្វើ៖ ផ្ដល់កម្លាំងចិត្ត

ខណៈពេលដែលមនុស្សជុំវិញខ្លួនយើងកំពុងពិបាកចិត្ត សូមកុំលួងលោមដោយប្រើពាក្យ “កុំ” ព្រោះពាក្យនេះធ្វើឲ្យគេមានអារម្មណ៍ថាត្រូវគេបង្ខំ ឬបញ្ជាច្រើនជាងលួងលោម។ ដូច្នេះហើយបើជួបស្ថានភាពបែបនេះ គួរតែផ្ដល់កម្លាំងចិត្ត និងសាកល្បងនាំគេធ្វើសកម្មភាពអ្វីមួយ ដែលអាចឲ្យគេចាកចេញពីការកើតទុក្ខបាន ដូចជាការធ្វើការងារស្ម័គ្រចិត្ត ធ្វើបុណ្យ ដាំដើមឈើ ឬទៅដើរលេងអីជាដើម។

២. ហាមនិយាយថា៖ ហ្អែងខុសខ្លួនឯងតើ!

ឧទាហរណ៍៖ មិត្តអ្នកកំពុងខូចចិត្តរឿងស្នេហា

A: អើ ហើយហ្អែងក្បត់ចិត្តគេមុនធ្វើអី... ដល់គេបោះបង់ចោលបានមកអង្គុយយំអីចឹង

B: ហ្អែងមិត្តភ័ក្ដិអញ ឬក៏អីឥលូវនេះ?

អ្វីដែលគួរធ្វើ៖ ប្រាប់ពីអ្វីដែលគួរធ្វើ

ការរកកំហុស ឬលើកកំហុសរបស់គ្នាមកនិយាយដដែលៗ គឺមិនអាចជួយអ្វីឡើយ ព្រោះភាគច្រើន មនុស្សដែលធ្វើខុសគឺគេបានដឹងពីកំហុសរបស់ខ្លួនស្រាប់ហើយ។ អ្វីដែលអ្នកគួរធ្វើនោះគឺប្រាប់ពីអ្វីដែលត្រឹមត្រូវដល់គេវិញ ដូចជាប្រាប់គេថា “ភាពស្មោះត្រង់ និងច្បាស់លាស់អាចធ្វើឲ្យឯងមានស្នេហាល្អមួយបាន”។

៣. ហាមនិយាយថា៖ “ខ្ញុំក៏ធ្លាប់អីចឹងដែរ”

ឧទាហរណ៍៖ សត្វចិញ្ចឹមដ៏គួរឲ្យស្រឡាញ់របស់មិត្តអ្នកទើបតែងាប់ ហើយអ្នកជួយលួងលោមគេដោយនិយាយថា

A: ហ៊ឺ... ឆ្កែឯងទើបងាប់ម្សិលមិញ

B: ខែមុន ឆ្កែឯងក៏ទើបឡានបុកងាប់ដូចគ្នា អាណិតវាដល់ហើយ ឆ្កែសំណព្វចិត្តឯងទៀត... (ហើយក៏បែកអូរហូរស្ទឹង)

អ្វីដែលគួរធ្វើ៖ ស្ដាប់ឲ្យច្រើនជាងនិយាយ

ការលួងលោមដែលល្អបំផុតគឺការទទួលស្ដាប់នូវអ្វីដែលគេនិយាយ ព្រោះពេលខ្លះមនុស្សដែលកំពុងកើតទុក្ខគឺមិនបានចង់បានវិធីដោះស្រាយបញ្ហាអ្វីនោះទេ គឺត្រូវការត្រឹមតែអ្នកដែលអង្គុយស្ដាប់រឿងរ៉ាវរបស់គេប៉ុណ្ណោះ។

៤. ហាមនិយាយថា៖ ហើយម៉េចក៏មិន…?

ឧទាហរណ៍៖ នៅពេលមិត្តភ័ក្ដិនិយាយពីបញ្ហាជីវិតឲ្យអ្នកស្ដាប់

A: ស្រ្តេសដល់ហើយអ្ហើយ ឯងត្រូវអ្នកនៅកន្លែងធ្វើការបំបិទ គ្មានអ្នកណានិយាយរកទេឥលូវ

B: ចុះហ្អែងម៉េចមិនទៅនិយាយជាមួយគេមុនទៅ គេនិយាយជាមួយហើយ

អ្វីដែលគួរធ្វើ៖ សួរពីអារម្មណ៍របស់គេ

គ្រប់ពេលដែលលួងលោមអ្នកដទៃ សូមព្យាយាមកុំប្រើសំណួរដែលចាប់ផ្ដើមដោយពាក្យថា “ម្ដេចក៏មិន...?” ព្រោះវានឹងធ្វើឲ្យអ្នកស្ដាប់មានអារម្មណ៍ថាត្រូវគេរិះគន់ដោយប្រយោល ប៉ុន្តែសូមសួរគេថា “មានអារម្មណ៍ដូចម្ដេចចំពោះហេតុការណ៍ហ្នឹង?” ដើម្បីឲ្យអ្នកដែលកំពុងកើតទុក្ខ អាចបញ្ចេញអារម្មណ៍ដែលកប់ក្នុងចិត្ត និងបានរំឭកពីអារម្មណ៍របស់ខ្លួនម្ដងទៀត។

៥. ហាមនិយាយថា៖ លួងហើយត្រូវឈប់កើតទុក្ខ

ឧទាហរណ៍៖ ក្រោយនិយាយលួងលោមមិត្តបាន ៣ថ្ងៃ

A: ហ៊ឺ ហ៊ឺ... ម៉េចក៏គេធ្វើបែបនេះដាក់យើង??

B: ស្រឡះចុះ ឯងខំនិយាយលួង ៣ថ្ងៃហើយអត់ទាន់បាត់ខូចចិត្តទៀត... ហើយពាក្យដែលអញណែនាំនោះ អត់មានស្ដាប់ទេអី?

កុំរំពឹងខ្លាំងពេកថាការលួងលោមរបស់យើងអាចធ្វើឲ្យមនុស្សក្បែរខ្លួនឈប់កើតទុក្ខបានភ្លាមៗ។ ជួនកាលមនុស្សយើងត្រូវការពេលវេលាដើម្បីភ្ញាក់ខ្លួន និងត្រូវរង់ចាំឲ្យអារម្មណ៍អស់សង្ឃឹមនោះបាត់ទៅដោយខ្លួនឯង ទើបអាចឆ្លងផុតពេលវេលាខូចចិត្តបាន។

អ្នកលួងលោមមាននាទីត្រឹមតែជួយគេតាមដែលយើងអាចជួយបានប៉ុណ្ណោះ បើវាមិនបានសម្រេចទេ ក៏បណ្ដោយតាមហ្នឹងចុះ មុននឹងខ្លួនឯងក្លាយជាមនុស្សបាក់ទឹកចិត្តម្នាក់ទៀត ៕

ប្រភព៖ goodlifeupdate ប្រែសម្រួល៖ ស្វាយ វ៉ាន់ថន