យកប្ដីពេលណាគឺរឿងរបស់ខ្ញុំ ម៉េចក៏ចង់ដឹងឮម្ល៉េះ?
- 2019-07-19 03:05:00
- ចំនួនមតិ 0 | ចំនួនចែករំលែក 0
យកប្ដីពេលណាគឺរឿងរបស់ខ្ញុំ ម៉េចក៏ចង់ដឹងឮម្ល៉េះ?
នៅក្នុងសង្គមមួយដែលទាន់សម័យដូចសព្វថ្ងៃ ការយកប្ដីឆាប់ ឬយឺតគឺលែងចោទជាបញ្ហាហើយ តែអ្វីដែលសំខាន់នោះគឺ យកត្រូវមនុស្សឬអត់។
ល្អសើចត្រង់ថា អ្នកដែលមិនយល់ពីយើងជាច្រើនដូចជា អ្នកជិតផ្ទះ ឬអ្នកធ្វើការជាមួយគ្នា និយាយជាមួយយើងដូចការរៀបការជាការដើរលេងមួយជុំចឹង។ សួរឡើងដូចជា អាយុម្ភៃជាងហើយ ម៉េចមិនប្រញាប់យកប្ដីទៅ? ពាក្យ “ប្រញាប់” របស់ពួកគេ និយាយចេញមកហាក់ដូចគ្មានទម្ងន់សូម្បីបន្តិច។ ប្រៀបបានដូចជា យកប្ដីហើយ មិនត្រូវគ្នាក៏លែងចោលទៅ មានបញ្ហាធំដុំអី។
ខ្ញុំមិនវាយតម្លៃទាំងអស់ឡើយ តែចាស់ពីដើម ក៏ដោយសារមិនមានជម្រើសច្រើន ក៏ដូចជាមកពីសិក្សាពីគ្នាមិនច្បាស់ ទើបធ្វើឲ្យពួកគាត់មិនអាចទទួលសុភមង្គលបានពេញលេញ។ ចុះបើយើងឃើញឧទាហរណ៍ជាក់ស្ដែងបែបនេះហើយ សួរថាយើងចាំបាច់ដើរជាន់ដានគាត់ធ្វើអ្វីទៀត?
ទោះបីជាពួកយើងឈានចូលដល់វ័យណាក៏ដោយ ក៏នៅមានជម្រើសសម្រាប់ខ្លួនឯងដែរ។ ឯអ្នកមិនស្គាល់យើងវិញ ហាឡើងសុទ្ធតែ បើមិនឆាប់យកទេ នឹងអេជាមិនខាន គ្មានអ្នកណាយកឡើយ។ អាណិតមនុស្សស្រីមួយចំនួន ដោយសារតែខ្លាចសម្ដីគេ គួបផ្សំនឹងមិនសូវមានជំនឿចិត្តផងនោះ ក៏ប្រញាប់លោតចូលរោងការ ទាំងខ្លួនមិនទាន់រួចរាល់។ ហើយលទ្ធផលដែលទទួលបាន បើមិនឆាប់បែកគ្នា ក៏ត្រូវទទួលទុក្ខផ្លូវចិត្ត ផ្លូវកាយដែរ។
សម័យនេះទៅហើយ ឲ្យតែចេះធ្វើខ្លួន និងមានចំណូលខ្លួនឯង អាយុសាមជាង ក៏អាចនៅខ្ញង់ដូចក្រមុំបានដែរ។ ដូចនេះហើយ សូមសន្សឹមៗក្នុងការរកគូស្រករ។ កុំចាប់អារម្មណ៍នឹងមនុស្សដែលមិនមែនជាអ្វីនឹងយើង និងសម្ដីនិយាយហើយ ហោះតាមខ្យល់របស់គេ។ ព្រោះនៅទីបំផុត ប្ដីគឺជារបស់យើង មិនមែនរបស់ពួកគេឡើយ៕
ចុចអាន៖ បានប្រពន្ធឆ្លាត មនុស្សប្រុសនឹងទទួលបានគុណសម្បត្តិ៥យ៉ាងនេះ