កើតមុនក្នុងអំឡុងពេលមានផ្ទៃពោះ ត្រូវដឹងពីវិថីទប់ស្កាត់ ដែលមិនធ្វើឲ្យប៉ះពាល់ដល់គភ៌

2019-07-18 10:50:00
ចំនួនមតិ 0 | ចំនួនចែករំលែក 0

សម្រស់បានធ្លាក់ចុះបន្តិចក្នុងអំឡុងពេលមានផ្ទៃពោះ។ អ្នកម៉ាក់តែងតែឡើងគីឡូនិងចេញមុនលើផ្ទៃមុខ ជៀសមិនផុត។ ដើម្បីតតាំងជាមួយបញ្ហាមុន មិនឲ្យរីករាលដាលកាន់តែខ្លាំង និងមិនប៉ះពាល់ដល់គភ៌ក្នុងផ្ទៃ គួរជ្រើសរើសវិធីត្រឹមត្រូវដូចខាងក្រោម។

១. ហាមយកដៃប៉ះមុខ

ក្នុងអំឡុងពេលនេះ អ្នកមិនគួរយកដៃទៅប៉ះលើមុខដាច់ខាត ព្រោះវាអាចចម្លងបាក់តេរី ទៅលើស្បែកបណ្តាលឲ្យចេញមុនបានយ៉ាងងាយ។ មុនលាងសម្អាតមុខ ត្រូវលាងដៃឲ្យបានស្អាតជាមុនសិន ទើបអាចកម្ចាត់មេរោគនិងបាក់តេរីផ្សេងៗបានល្អ។

២. ប្រើហ្វូមលាងមុខបែបស្រាលស្រទន់

ហ្វូមលាងមុខបែបស្រាលស្រទន់ គ្មានជាតិកាត់ គ្មានជាតិប្រេង ល្អបំផុតសម្រាប់ស្រ្តីមានផ្ទៃពោះ។ កុំលាងមុខយូរពេក ព្រោះវាអាចធ្វើឲ្យមុខកាន់តែស្ងួត ប៉ុន្តែឡើងប្រេង និងធ្វើឲ្យកើតមុន។

៣. ជៀសវាងលេបថ្នាំមានជាតិវីតាមីន A

អ្វីដែលអ្នកអាចធ្វើបានគឺការព្យាបាល ដោយវិធីធម្មជាតិ មិនមែនលេបថ្នាំ ដែលមានជាតិវីតាមីន A។ ជាពិសេស ហាមប្រើពពួកវីតាមីនប្រភេទនេះ នៅពេលយប់ ព្រោះវាអាចប៉ះពាល់ដល់ការលូតលាស់របស់គភ៌ ឬអាចធ្វើឲ្យកូនកើតមកមិនគ្រប់លក្ខណៈ បើអ្នកប្រើប្រាស់ក្នុងរយៈពេលយូរ។

៤. កុំលាងមុខជាមួយទឹកក្តៅឧណ្ណៗ

ការលុបលាងមុខដោយទឹកក្តៅឧណ្ណៗ អាចបណ្តាលឲ្យមុខ ឡើងក្រហម ងាយនឹងចេញមុនបំផុត។ គួរប្រើទឹកត្រជាក់ល្មម ដើម្បីលាងមុខនៅពេលកើតមុន ហើយកុំភ្លេច លាងដោយប្រើដៃថ្នមៗ ការពារមុខកុំរោលប្រតិកម្ម។

៥. ចងសក់ឲ្យស្រឡះពីមុខ

ដើម្បីទប់ស្កាត់ មិនឲ្យមុនរោលពេញមុខ គួរចង់សក់ឬបួងឡើង ឲ្យផុតស្រលះ ព្រោះសូម្បីតែសក់ក៏មានជាតិប្រេង អាចបណ្តាលឲ្យកើតមុនបានដែរ។ អ្វីដែលខ្វះមិនបាន គឺត្រូវផឹកទឹកឲ្យបានច្រើន យ៉ាងហោចណាស់៨កែវ ក្នុងមួយថ្ងៃ ដើម្បីជួយឲ្យស្បែកមានសំណើមស្រស់ថ្លា៕

ចុចអានបន្ត៖ នារីកូរ៉េម្នាក់ចេញមុខមកចែករំលែក វិធីស្រកទម្ងន់ជោគជ័យនិងមិនឡើងមកវិញ

ប្រភព៖ Sanook ប្រែសម្រួល៖ ដេត ឈុនអ៉ី