លួចស្រលាញ់នារីគិតលុយហាងកាហ្វេ បុរសម្នាក់ផឹកកាហ្វេឡើងកើតទឹកនោមផ្អែម
- 2019-07-08 03:00:00
- ចំនួនមតិ 0 | ចំនួនចែករំលែក 0
លួចស្រលាញ់នារីគិតលុយហាងកាហ្វេ បុរសម្នាក់ផឹកកាហ្វេឡើងកើតទឹកនោមផ្អែម
ដោយសារតែគិតថា ផឹកកាហ្វេដាក់ឲ្យផ្អែម នឹងធ្វើឲ្យមនោសញ្ចេតនាខ្លួន និងនារីគិតលុយ បានផ្អែមល្ហែមនឹងគ្នានោះ ជាលទ្ធផល បុរសនោះត្រូវធ្លាក់ខ្លួនឈឺតែម្ដង។
ស្នេហាមួយតែងត្រូវឆ្លងកាត់រសជាតិជាច្រើនដូចជាផ្អែមល្ហែម ល្វីង ជូរចត់ជាដើម។ ជាក់ស្ដែង បុរសមកពីតៃវ៉ាន់មួយរូប បានខំប្រឹងរត់តាមស្នេហារបស់ខ្លួន ដោយរំពឹងថា នឹងបានផលផ្អែមក៏ដោយ តែលទ្ធផលបែរជាត្រូវទទួលភាពល្វីងទៅវិញ។
តាមនោះដែរ កាលពីពេលថ្មីៗនេះ បុរសមកពីកោះតៃវ៉ាន់មួយរូប បានចែករំលែករឿងស្នេហាដ៏ក្រៀមក្រំរបស់ខ្លួន លើគេហទំព័រចែករំលែកល្បីឈ្មោះ Dcard ហើយទទួលបានការចែករំលែកបន្តរហូតដល់៤០០០ដង។ លោកបានឲ្យដឹងថា ចាប់តាំងពី២ឆ្នាំមុន នៅពេលជួបមនុស្សស្រីគិតលុយនៅក្នុងម៉ាតមួយនៅជិតផ្ទះ លោកក៏មានចិត្តលើនាងភ្លាមៗ។ ដើម្បីទទួលបានចំណាប់អារម្មណ៍ពីស្រីស្អាតគិតលុយ ថ្ងៃណាក៏លោកមកទិញកាហ្វេនៅទីនេះដែរ ថែមទាំងថែមស្ករដល់ទៅ៥ស្លាបព្រា។ នៅពេលឃើញដូចនេះ នារីគិតលុយក៏សួរថា បើដាក់បែបនេះមិនផ្អែមជ្រុលពេកទេឬ? ទើបលោកឆ្លើយថា ក៏មិនផ្អែមដល់អ្នកលក់ដែរ។ ក្រោយពេលឃើញដូចនេះ នារីគិតលុយក៏ញញឹម។
ចាប់តាំងពីពេលនោះ ចំនួនដងដែលលោកមកម៉ាត 7-Eleven កាន់តែកើនឡើង តែអ្នកទាំង២បានត្រឹមអូសក្រឡាទៅមក ដោយមិនបានឈានដល់ធ្វើជាសង្សារជាផ្លូវការឡើយ ហើយខាងប្រុសត្រូវបានវេជ្ជបណ្ឌិតប្រាប់ថា លោកមានរោគសញ្ញាកើតជំងឺទឹកនោមផ្អែមទៀតផង ព្រោះទទួលទានផ្អែមក្នុងរយៈពេលវែង។ ទោះបីជារឿងនេះមិនមែនរឿងកំប្លែងក៏ដោយ តែនៅតែធ្វើឲ្យទប់សំណើចមិនបាន៕
ចុចអាន៖ ហុងស៊ុយពាងអង្ករ កន្លែង និងវិធីត្រូវទុកដាក់ដើម្បីទទួលបានលាភហូរចូលដូចទឹក