វិធីស្រោចស្រង់ជីវិតលិចលង់ព្រោះបែកបាក់ស្នេហារបស់មិត្តភ័ក្ដិ ឲ្យប្រសើរវិញ
- 2019-06-06 09:00:00
- ចំនួនមតិ 0 | ចំនួនចែករំលែក 0
វិធីស្រោចស្រង់ជីវិតលិចលង់ព្រោះបែកបាក់ស្នេហារបស់មិត្តភ័ក្ដិ ឲ្យប្រសើរវិញ
ប្រសិនបើអ្នកឃើញសម្លាញ់ជួបរឿងបែកបាក់ស្នេហា ហើយជីវិតកំពុងញាំញីដោយទុក្ខសោក អ្នកមិនគួរឈរឱបដៃមើលនោះទេ។ ខាងក្រោមនេះ ជាវិធី៧យ៉ាងជួយស្រោចស្រង់មិត្តរបស់អ្នក ឲ្យក្លាយជាមនុស្សរីករាយដូចមុនបាន។
១. ធ្វើជាអ្នកស្ដាប់ដ៏ល្អ
នៅពេលបែកបាក់ស្នេហា ចិត្តគំនិតរបស់នាងមិនសូវរឹងមាំល្អ ។ ដូច្នេះអ្វីដែលយើងអាចជួយបាន គឺនៅក្បែរមិនទៅណាចោលនាង ហើយស្ដាប់នាងនិយាយអ្វីដែលនាងចង់និយាយ។ វិធីនេះជួយអ្នកជួបវិបត្តិស្នេហ៍ ឲ្យបានធូរស្រាលជាងមុន។ មនុស្សជួបរឿងខ្ទេចខ្ទាំបេះដូង ងាយរងសម្ពាធផ្លូវចិត្តណាស់ ហើយបើបណ្ដោយឲ្យនៅឯកាម្នាក់ឯង ពេលខ្លះអាចធ្វើអត្តឃាត ឬធ្វើរឿងល្ងង់ៗជាដើម។
២. ឲ្យនាងយំឲ្យធូរចិត្តចុះ
កុំបង្ខំ ឬហាមនាងឲ្យឈប់យំភ្លាមៗអី ឲ្យនាងយំឲ្យធូរចិត្តទៅ ព្រោះការក្រៀមក្រំមិនអាចបំភ្លេចបានក្នុងរយៈពេលខ្លីនោះទេ។ វិធីល្អបំផុត គឺឲ្យនាងយំឲ្យអស់ចិត្ត តែមិនមែនទុកនាងចោលម្នាក់ឯងឡើយ គឺនៅក្បែរនាង ឬអ្នកអាចឱបនាងថ្នមៗ ធ្វើជាស្មាបង្អែកឲ្យនាងមានភាពរឹងមាំឡើងវិញ។
៣. នាំទៅដើរលេង
ទៅដើរលេង ជាជម្រើសល្អប្រសើរដើម្បីបំបាត់ទុក្ខសោក ព្រោះអាចលំហែចិត្ត រីករាយនឹងទេសភាព ព្រមទាំងឆាប់ភ្លេចរឿងឈឺចាប់ថែមទៀតផង។ កុំភ្លេច នាំនាងទៅកន្លែងសប្បាយៗ កន្លែងដែលអាចបន្ធូរអារម្មណ៍ ឬកន្លែងណាមួយដែលនាងប្រាថ្នាជាយូរមកហើយ។
៤ ជំរុញឲ្យធ្វើនេះ ធ្វើនោះ
គេថា "ធ្វើខ្លួនកាន់តែរវល់ នឹងកាន់តែអាចបំភ្លេចរឿងមិនសប្បាយចិត្តចោលបាន" ឃ្លានេះមិនខុសទេ។ ព្យាយាមហៅនាងឲ្យចេញក្រៅជាមួយមិត្តភ័ក្កិ ដូចជាលេងកីឡា ហាត់ប្រាណ លេងហ្គេម គូរគំនូរ ដើរផ្សារ ជាដើម។ នេះជារឿងល្អ ដែលជួយឲ្យនាងមានអារម្មណ៍កក់ក្ដៅជាងមុន។
៥. បន្ថែមថាមពលវិជ្ជមាន
មនុស្សជួបស្នេហ៍ខកចិត្ត តែងចូលចិត្តគិតអីអវិជ្ជមាន ហើយសោកសៅខ្លាំង។ សំដីដែលនាងនិយាយចេញមក អាចមើលឃើញតែរឿងមិនល្អ ហើយពេលខ្លះស្ដីបន្ទោសខ្លួនឯងទៀតផង។ ដូច្នេះអ្នកគួរធ្វើយ៉ាងណាជួយនាងឲ្យគិតអ្វីសុទិដ្ឋិនិយម ព្រមទាំងលើកទឹកចិត្តនាង ឲ្យមើលឃើញពីគុណសម្បត្តិនៃជីវិត និងប្រាប់នាងថា នាងមិនមែនមិនល្អដូចអ្វីនាងគិតនោះទេ។ ប្រសិនបើអ្នកមិនសូវពូកែក្នុងការនិយាយឃ្លាទាំងនេះ អ្នកអាចទិញសៀវភៅបែបលើកទឹកចិត្តឲ្យនាងអាន ដើម្បីឲ្យអារម្មណ៍នាងបានធូរស្រាលខ្លះ។
៦. ប្រាប់ឲ្យនាងតុបតែងខ្លួនឲ្យស្អាត
មានមនុស្សច្រើនណាស់បានទុកសម្រស់ខ្លួនឯងចោល លែងរវីរវល់តុបតែងខ្លួនឲ្យស្អាត ដោយសារតែខូចចិត្តខ្លាំងពេក។ បើអ្នកពិតជាមិនចង់ឃើញនាងស្ថិតក្នុងសភាពមើលមិនយល់បែបនេះទេ ត្រូវហៅនាងឲ្យទៅហាងថែរក្សាសម្រស់ ម៉ាស្សាមុខ ឬទៅហាងកាត់សក់យកម៉ូដស្ទីលស្អាតៗជាដើម។
៧. បង្កើតភាពសប្បាយរីករាយ
មនុស្សកំពុងកើតទុក្ខ ត្រូវការណាស់ភាពរីករាយ ម្ល៉ោះហើយអ្នកមិនត្រូវភ្លេចបង្កើតរឿងកំប្លែងៗ ឬនិយាយអីឲ្យគាត់ស្ដាប់ហើយសើចនោះទេ។ តែចាំថា មិនត្រូវនិយាយបែបចំអែចំអន់ខ្លាំងពេក ឬនិយាយសុខៗចូលរឿងឈឺចាប់នាង ធ្វើឲ្យនាងកាន់តែខូចចិត្តខ្លាំងឡើងឡើយ។ អ្វីដែលគួរធ្វើខានមិនបាន គឺញញឹមរកនាងគ្រប់ពេល ដែលជាឱសថឲ្យនាងឆាប់មានអារម្មណ៍ល្អ។
មនុស្សជួបរឿងបែកបាក់ស្នេហាគឺឈឺចាប់ណាស់ ហើយបើបែកបាក់ចំពេលបេះដូងកំពុងស្រលាញ់ខ្លាំង គឺកាន់តែធ្ងន់ធ្ងរបំផុត។ ដូច្នេះបើអ្នកឃើញនាងសម្រក់ទឹកភ្នែក ឃើញនាងក្រៀមក្រំ ហើយនាងដាច់ចិត្តប្រាប់អ្នកថា នាងជួបរឿងខូចចិត្តព្រោះស្នេហាបែកបាក់ សូមកុំបោះបង់នាង កុំស្តីបន្ទោសនាងថាល្ងង់ ងប់ស្រលាញ់សង្សារ។ តែគួរលើកទឹកចិត្តនាង និងបន្ថែមកម្លាំងចិត្តឲ្យនាង ដើម្បីឆាប់បានដើរចេញពីភាពខ្មៅងងឹតនៃស្នេហាដែលគេទុកនាងត្រឹមមនុស្សលេងសើច៕
ចុចអាន៖ វិធីសម្របខ្លួនជាមួយ Ex ដោយជឿជាក់ ទោះធ្លាប់ឈឺចាប់រាប់ពាន់ដងដោយសារគេក៏ដោយ