មនុស្សស្រីគិតខ្លីពេលត្រូវគេក្បត់ សួរថាបានអី ព្រោះពេលអ្នកស្លាប់ គេឈឺទេ?
- 2019-03-22 03:12:41
- ចំនួនមតិ 0 | ចំនួនចែករំលែក 0
មនុស្សស្រីគិតខ្លីពេលត្រូវគេក្បត់ សួរថាបានអី ព្រោះពេលអ្នកស្លាប់ គេឈឺទេ?
បណ្ដាញព័ត៌មានបានចុះផ្សាយជាបន្តបន្ទាប់ពីករណីយុវនារីយកឡាមអារដៃ ឬលេបថ្នាំសម្លាប់ខ្លួនក្រោយបែកបាក់ស្នេហា។ តែសួរថាទង្វើរបស់ពួកគេធ្វើទៅដើម្បីទាមទារយកអ្វីមកវិញ ហើយស័ក្ដិសមឬអត់?
នៅពេលស្នេហាកំពុងផ្អែមល្ហែម យើងមានសុភមង្គលជារឿងធម្មតា។ ពេលវាបញ្ចប់ទៅ គ្រាន់តែចាត់ទុកថាបាត់បង់អនុស្សាវរីយ៍មួយគឺគ្រប់គ្រាន់ហើយ។ ព្រោះលើលោកនេះមានអ្វីស្ថិតស្ថេរនោះ ចិត្តមនុស្សក៏ដូចគ្នា។ ត្រូវចងចាំឲ្យច្បាស់ថា នៅលើលោកនេះ គ្មានអ្នកណាម្នាក់ស្លាប់ដោយសារខ្វះអ្នកណានោះទេ។ ព្រោះនៅពេលអ្នកមានគុណរបស់យើងចាកចេញទៅ យើងនៅតែអាចបន្តរស់នៅបានទេតើ។ ហេតុអី ដោយសារតែមនុស្សអស់ចិត្តម្នាក់ យើងត្រូវគិតខ្លីនោះ?
យើងគិតដល់ការស្លាប់ខ្លួន នៅពេលដែលជីវិតលែងមានអ្វីឲ្យយើងអាល័យទៀត ហើយយើងក៏បាក់ទឹកចិត្ត។ មើលពីក្រៅមកដូចជាយើងម្នាក់ឯង កំពុងប្រឈមនឹងពិភពលោកទាំងមូល។ តែអ្នកដឹងទេថា បាក់ទឹកចិត្តគឺកើតឡើងពីអារម្មណ៍របស់យើង បើយើងធ្វើខ្លួនឲ្យរឹងមាំ ហើយជម្នះវាឲ្យបាននោះ អ្នកនឹងឆ្លងផុតវាដោយគ្មានបញ្ហា។
នៅពេលស្នេហាមួយធ្វើឲ្យអ្នកឈឺចាប់ដល់កំពូល វិធីដែលអាចធ្វើឲ្យស្រាកស្រាន្តនោះគឺកុំនឹកគិតពីមនុស្សដែលធ្វើឲ្យអ្នកឈឺទៀត។ ព្រោះរឹតតែនឹក រឹតតែឈឺ។ តែត្រូវគិតផ្ទុយមកវិញថា អ្នកពូកែយ៉ាងនេះ ស្អាតយ៉ាងនេះ គេចាកចោលអ្នកគឺជាកំហុសរបស់គេ ហើយគេនឹងស្ដាយក្រោយជាមួយការសម្រេចចិត្តបែបនេះ។
អ្វីដែលសំខាន់ជាងគេនោះគឺ វិនាទីដែលគេដើរចេញពីអ្នកមានន័យថា គេអស់ចិត្តលើអ្នកហើយ សូម្បីតែបន្តិចក៏គ្មានដែរ។ ដូចនេះហើយ ទោះបីជាអ្នកគិតខ្លីក្នុងគោលបំណងអ្វីក៏ដោយ ឧទាហរណ៍ដូចជា ទាក់ទាញចំណាប់អារ្មណ៍ ឬមកពីអ្នកអស់អាល័យលើលោកនេះហើយ ក៏គេមិនចាប់អារម្មណ៍នោះដែរ។ តែអ្នកដែលឈឺដូចគេយកកាំបិតចាក់បេះដូងនោះ គឺឪពុកម្ដាយយើងទៅវិញទេ។ ធំដឹងក្ដីប៉ុណ្ណេះ គ្រាន់តែស្រមោចខាំកូន ក៏ម្ដាយឈឺចិត្តដែរ តែហេតុអីកូនដោយសារតែមនុស្សប្រុសអស់ចិត្តម្នាក់បែរជាគិតខ្លី ចង់ទៅដោយម៉ែឪនោះ?
សូមគិតឡើងវិញ យុវនារីទាំងឡាយដែលកំពុងឈឺចាប់ដោយសារគេក្បត់ចិត្ត៕
ចុចអាន៖បែកស្នេហាមិនត្រឹមប៉ះពាល់ផ្លូវចិត្តទេ ថែមទាំងបង្កឲ្យមានបញ្ហានេះទៀត