រូបភាពបង្ហាញពីធាតុពិតនៃសង្គមមនុស្សសព្វថ្ងៃ
- 2019-03-05 01:30:00
- ចំនួនមតិ 0 | ចំនួនចែករំលែក 0
រូបភាពបង្ហាញពីធាតុពិតនៃសង្គមមនុស្សសព្វថ្ងៃ
បណ្តុំរូបភាពខាងក្រោមនេះ គឺជាស្នាដៃរួមទាំងគំនិតច្នៃប្រឌិតរបស់វិចិត្រករ Marco Melgrati ក្នុងគោលបំណងដើម្បីបង្ហា្ញពីទិដ្ឋភាពនិងជីវិតជាក់ស្តែងរបស់មនុស្សក្នុងសង្គមសព្វថ្ងៃនេះ។ ដោយសារសម័យបច្ចុប្បន្នអ្វីដែលអ្នកឃើញផ្ទាល់នឹងភ្នែក អាចផ្ទុយពីការពិត ទើបវិចិត្រករប៉ិនប្រសប់រូបនេះ ចង់គូរបង្ហាញតាមរយៈរូបភាពតែម្តង។
មិនបាច់ចាំលបមើល រសាកសួរពីអ្នកដទៃក៏បាន ព្រោះភាគច្រើនមនុស្សសម័យនេះ ចូលចិត្តបង្អួតគ្នាតាមរយៈបណ្តាញសង្គម ដូចជាលុយ ស្នេហា បញ្ហាជីវិតគ្រប់បែបយ៉ាង រួមទាំងបង្ហាញរាងកាយចេញមកគ្មានសល់ទេ។
ជីវិតហាក់គ្មានន័យពេលអ្នកគ្មានលុយ គ្មានលុយគឺគ្មានសំឡេង។
មានរូបរាងស្អាតសង្ហា បេះដូងស្មោះ ប៉ុន្តែគ្មានទ្រព្យ យសសក្ដិ ក៏មិនអាចក្លាយជាជម្រើសទី១របស់គេដែរ។
ឃើញអ្វីមួយភ្លាមកុំប្រញាប់វាយតម្លៃភ្លែត ហើយយកទៅបង្ហោះប្រាប់គេឯង ទាំងងងឹតងងុលមិនដឹងហេតុផលច្បាស់លាស់ ព្រោះមើលឃើញតែម្ខាង មិនអាចកាត់សេចក្តីបានឡើយ ពុំដូច្នោះទេ មនុស្សត្រូវអាចប្រែក្លាយទៅជាជនរងគ្រោះក៏ថាបាន។
នៅពេលមនុស្សម្នាក់រវល់តែអោនឈ្ងោកចុចទូរសព្ទគ្រប់ពេលវេលាគ្រប់ទីកន្លែងពេក គេមិនបានសម្លឹងមើលឃើញពិភពខាងក្រៅទេ។
មនុស្សមួយចំនួន ខំប្រឹងលាបពណ៌ខ្លួនឯងធ្វើជាសប្បាយនៅក្នុងបណ្តាញសង្គម ដើម្បីបន្លំភ្នែកអ្នកដទៃ ទាំងដែលការពិត នៅខាងក្រៅខុសគ្នាដាច់ស្រឡះ។
អ្នកខ្លះវិញ សុខចិត្តលះបង់សុខភាពព្រោះតែលុយ ហើយភ្លេចថាចុងក្រោយចង់យកលុយនោះទៅទិញសុខភាពវិញមិនបានផង។
មនុស្សខ្លះទៀត ស្លៀកពាក់ហំហាន មានមុខមានមាត់ ប៉ុន្តែជីវិតស្ថិតនៅក្រោមការគ្រប់គ្រងរបស់អ្នកដទៃ ចង់គេបញ្ជាឲ្យធ្វើអីក៏បាន។
មនុស្សស្រីខំប្រឹងប្រែងដើម្បីមានការងារធ្វើ ប៉ុន្តែពេលខ្លះក៏អាចធ្លាក់ចូលក្នុងអន្ទាក់របស់មនុស្សប្រុស ដោយសារតែការងារនេះដែរ។
បញ្ហានានាមិនអាចដោះស្រាយបានទេ បើគ្មានលុយហុចដល់ដៃ។
កញ្ចក់អាចឆ្លុះបញ្ចាំងពីការពិត ប៉ុន្តែជួនកាលដឹងការពិតកាន់តែច្រើន វាកាន់តែចាក់ដោតនិងធ្វើឲ្យខ្លួនឯងឈឺចាប់ទ្វេដង។
ឃើញគេសុំស្រលាញ់ ត្រូវចេះបែងចែកឲ្យច្បាស់រវាងស្នេហា និងចំណង់ (សម្លឹងឃើញតែខ្លួនប្រាណ)៕
ចុចអានបន្ត៖ ស្រីៗរកលុយមិនបាន កុំសង្ឃឹមមានសិទ្ធិស្មើជាមួយមនុស្សប្រុសក្នុងគ្រួសារឲ្យសោះ