គំនិតល្អៗ ជួយឲ្យអ្នកប្រើជីវិតរស់នៅស្រស់ស្រាយរាល់ថ្ងៃ
- 2019-02-08 09:35:00
- ចំនួនមតិ 0 | ចំនួនចែករំលែក 0
គំនិតល្អៗ ជួយឲ្យអ្នកប្រើជីវិតរស់នៅស្រស់ស្រាយរាល់ថ្ងៃ
ច្រើនលើកច្រើនសាររាប់មិនអស់ ដែលជីវិតបានឆ្លងកាត់រឿងខកបំណង ធ្វើឲ្យមនុស្សបាក់ទឹកចិត្ត ចង់នៅនឹងថ្កល់មួយកន្លែង ប៉ុន្តែបើអ្នកសាកងាកទៅមើលជ្រុងថ្មីមួយទៀត អ្នកច្បាស់ជាឃើញផ្លូវថ្មី ការគិតថ្មី និងមានសមត្ថភាពថ្មី អាចប្រើជីវិតរស់នៅពោរពេញដោយភាពស្រស់ស្រាយសប្បាយចិត្តជារៀងរាល់ថ្ងៃ។ ទន្ទឹមគ្នានឹងការដើរទៅកាន់ជ្រុងថ្មីនៃជីវិត មិនត្រូវភ្លេចពាំនាំនូវគំនិតល្អៗទៅជាមួយផង។
ពេលវេលាដើរទៅមុខលឿនណាស់ សូមកុំបណ្តោយឲ្យវាបញ្ចប់ទៅដោយឥតខ្លឹមសារដាច់ខាត។
មានរឿងចាំបាច់៣យ៉ាង ដែលអ្នកត្រូវធ្វើជាប្រចាំ ញញឹម អរគុណ សុំអភ័យទោស។
នៅឲ្យឆ្ងាយពៅមនុស្សណា ដែលមិនផ្តល់តម្លៃកិត្តិយស និងព្យាយាមកេងប្រយោជន៍ពីអ្នក។
គោរព ស្តាប់យោបល់ពីមនុស្សដែលមានអាយុតិចជាង មិនមែនមានន័យថាអ្នកអន់នោះទេ វាគឺជាការផ្លាស់ប្តូរមតិគ្នាទៅវិញទៅមក។
មិនបាច់យល់គ្រប់រឿងពេកក៏បាន ព្រោះរឿងខ្លះយល់កាន់តែច្បាស់ កាន់តែស្មុគស្មាញ។
មានចំណេះដឹងច្រើនដល់កម្រិតណា ក៏គួរចេះបន្ទាបខ្លួន ព្រោះសូម្បីតែអ្នកប្រាជ្ញ បណ្ឌិត ក៏មិនទាន់ដឹងគ្រប់រឿងដែរ។
បន្តគំនិតវិជ្ជមាន ទោះបីមានបញ្ហាកើតឡើងធំដូចភ្នំ អ្នកនៅតែអាចសប្បាយចិត្តនឹងប្រឈមជាមួយវា។ ចង់ឲ្យអ្នកដទៃមើលឃើញពីគុណតម្លៃរបស់ខ្លួន លុះត្រាតែអ្នកដឹងពីតម្លៃខ្លួនឯងជាមុនសិន។
កុំយល់ច្រឡំណា! មានលុយច្រើន មិនមែនបានន័យថា អាចមានសុភមង្គលឡើយ។
កុំគិតលើប្រាក់ខែតែមួយមុខ ត្រូវធ្វើការងារណាដែលអ្នកពេញចិត្តសប្បាយរីករាយនឹងធ្វើ ដោយមិនដាក់សម្ពាធលើខ្លួនឯងលើសកម្រិត។
កុំគិតថាខ្លួនឯងធ្វើមិនបាន បើមិនទាន់ព្យាយាមសាកល្បងនោះ។
ជម្រុះចោលឲ្យអស់ នូវប្រភេទមនុស្សដែលនាំឲ្យអ្នកឈឺក្បាលវិលមុខ។
ធ្វើការងារតែមួយមុខនៅមិនទាន់គ្រប់គ្រាន់ទេ ព្រោះវាប្រៀបបាននឹងមានទៀន មួយដើម កំពុងតែបំភ្លឺក្នុងផ្ទះ រលត់ពេលណាផ្ទះនឹងងងឹតស្លុបពេលនោះ បើគ្មានទៀនផ្សេងទុកបំរុង។
សន្សំតែមួយមុខមិនអាចក្លាយជាអ្នកមានបានទេ ចេះពីរបៀបវិនិយោគបន្ថែមទើបអាចក្លាយជាអ្នកមានបាន។
អានឃ្លា ឬសៀវភៅល្អៗរាល់ថ្ងៃ ដើម្បីជួយជាកម្លាំងចិត្តទ្វេដង។
គោរពមេនៅកន្លែងធ្វើការ មកដល់ផ្ទះកុំភ្លេចគោរពម្តាយឪពុកផង។
លុយសំខាន់ តែសុខភាពកាន់តែសំខាន់ ដូច្នេះត្រូវថែរក្សាឲ្យបានត្រឹមត្រូវ កុំប្រហែសឲ្យសោះ។
ត្រូវចាំថា ជីវិតស្ថិតនៅក្នុងកណ្តាប់ដៃរបស់អ្នក ចង់កើតទុក្ខឬសប្បាយ វាជាជម្រើស ផ្ទាល់ខ្លួនរបស់អ្នក គ្មានអ្នកក្រៅ អាចមកកាត់សេចក្តីបានឡើយ៕
ចុចអានបន្ត៖ ចង់បានជីវិតរីករាយ កុំភ្លេចធ្វើរឿងតូចតាច ៨យ៉ាង នេះឲ្យបានរាល់ថ្ងៃ