ទម្លាប់ ៧យ៉ាងរបស់នារីៗដែលធ្វើឲ្យជើងធំ ខូចរាងដោយមិនដឹងខ្លួន
- 2019-02-07 08:00:00
- ចំនួនមតិ 0 | ចំនួនចែករំលែក 0
ទម្លាប់ ៧យ៉ាងរបស់នារីៗដែលធ្វើឲ្យជើងធំ ខូចរាងដោយមិនដឹងខ្លួន
មនុស្សស្រីណាក៏ដូចគ្នា គឺតែងចង់បានជើងស្រឡូនស្អាត ស្លីម ដើម្បីពេលស្លៀកខោ សំពត់ខ្លី ឬឈុតហែលទឹកអី មើលទៅសិចស៊ី។ ប៉ុន្តែដឹងអត់ថា សកម្មភាពប្រចាំថ្ងៃខ្លះរបស់អ្នក មិនត្រឹមតែធ្វើឲ្យប៉ះពាល់សុខភាព ប៉ុន្តែអាចជាមូលហេតុដែលធ្វើឲ្យជើងរបស់អ្នកកាន់តែធំដោយមិនដឹងខ្លួនថែមទៀតផង។ ថាតើសកម្មភាពនោះមានអ្វីខ្លះ ហើយគួរមានវិធីដោះស្រាយយ៉ាងណា សូមតាមដានជាមួយ កញ្ញា ខាងក្រោមនេះ៖
១. អង្គុយធ្វើការជាប់រយៈពេលយូរ
នេះគឺជារឿងដែលពិបាកចៀសវាងបន្តិចសម្រាប់នារីៗដែលធ្វើការងារការិយាល័យ។ ការអង្គុយធ្វើការយូរនឹងធ្វើឲ្យឈាមដែលស្ថិតនៅបរិវេណជើងរបស់យើងរត់មិនស្រួល និងជាចំណុចចាប់ផ្ដើមដែលធ្វើឲ្យជើងធំបាន។ ដំណោះស្រាយ គឺគួរឧស្សាហ៍ផ្លាស់ប្ដូរឥរិយាបថ ឬក្រោកឈរ ដើរចុះឡើង ចូលបន្ទប់ទឹក ឆុងកាហ្វេ ដើម្បីឲ្យរាងកាយបានយឺតសរសៃសសូងខ្លះ។
២. អង្គុយគងអន្ទាក់ខ្លាញឹកញាប់
នៅពេលអង្គុយយូរ ឬអង្គុយលើកៅអីខ្ពស់ពេក ស្រីៗយើងខ្លះក៏ទម្លាប់អង្គុយគងអន្ទាក់ខ្លាដើម្បីកុំឲ្យរោយជើងពេក ហើយខ្លះក៏ទម្លាប់បែបនេះតែម្ដង។ ប៉ុន្តែការអង្គុយបែបនេះនឹងធ្វើឲ្យជើងយើងត្បៀតគ្នា ជាពិសេសនៅបរិវេណភ្លៅ ដែលអាចធ្វើឲ្យឈាមរត់មិនបានល្អ ជាមូលហេតុនាំឲ្យជើងធំដែរ។
៣. ពាក់ស្បែកជើងកែងញឹកញាប់
បើទោះជាការពាក់ស្បែកជើងកែងនឹងធ្វើឲ្យអ្នកមើលទៅមានរាងស្អាត កាន់តែខ្ពស់ ប៉ុន្តែបើអ្នកពាក់វាញឹក ឬយូរខ្លាំងពេក វាក៏មិនល្អចំពោះសុខភាពរាងកាយដូចគ្នា ជាពិសេសស្បែកជើងដែលមានកែងស្រួចខ្ពស់ ព្រោះវានឹងធ្វើឲ្យចុងជើងរបស់យើងរងទម្ងន់ខ្លួនរយៈពេលយូរ ហើយក៏ធ្វើឲ្យកំភួនជើងរបស់យើងរីកធំដែរ។ យកល្អគួរកាត់បន្ថយកម្ពស់កែងស្បែកជើង ឬជ្រើសរើសស្បែកជើងដែលមានកែងធំល្មម ដើម្បីកុំឲ្យចុងជើងយើងរងទម្ងន់ច្រើនពេក ឬអាចផ្លាស់មកពាក់ស្បែកជើងប៉ាតាតែម្ដងក៏បាន។
៤. មិនហាត់ប្រាណ
ស្រីៗមួយចំនួនអាចនឹងគិតថា ឲ្យទៅហាត់ប្រាណយ៉ាងម៉េច បើរវល់រៀន និងធ្វើការរកពេលសម្រាកមិនបានផង? ប៉ុន្តែការពិតទៅ មានក្បាច់ហាត់ប្រាណជាច្រើន ដែលយើងអាចហាត់ខ្លួនឯងនៅផ្ទះ ដោយមិនបាច់ប្រើឧបករណ៍ជំនួយ ដូចជាក្បាច់ជិះកង់ ឬហាត់យូហ្កាក៏បាន។
៥. ផឹកទឹកតិច ហើយទប់នោមយូរៗ
ពេលខ្លះនៅពេលដែលយើងរវល់វក់វីនឹងការងារមួយចំនួនខ្លាំងពេក ក៏ធ្វើឲ្យយើងភ្លេចធ្វើអ្វីមួយដែលចាំបាច់ចំពោះសុខភាពរាងកាយ ដូចជាភ្លេចផឹកទឹក ភ្លេចចូលបន្ទប់ទឹក ដែលសុទ្ធតែផ្ដល់ផលអាក្រក់ដល់សុខភាព។ ការផឹកទឹកច្រើនៗ នឹងជួយជំរុញឲ្យប្រព័ន្ធធ្វើការរបស់រាងកាយយើងដំណើរការបានប្រក្រតី និងមានការបម្លែងជាតិពុលចេញមកតាមរយៈទឹកនោម។
៦. ឈរយូរៗ
នារីដែលត្រូវឈរយូរៗក្នុងពេលធ្វើការងារ នឹងធ្វើឲ្យសាច់ដុំតឹង ហើយក្រៅពីនេះ អាចនាំឲ្យមានបញ្ហាសរសៃឈាមទៀតផង។ ដំណោះស្រាយ នោះគឺគួរធ្វើការម៉ាស្សាក្រោយចប់ការងារ ឬហាត់ប្រាណបែបយូហ្កា ដើម្បីឲ្យសាច់ដុំជើងបានសម្រាក និងកាត់បន្ថយការរីកសាច់ដុំជើងផង។
៧. ញ៉ាំអាហាររសជាតិខ្លាំងពេក
អាហាររសជាតិខ្លាំង ជាពិសេសអាហារប្រៃៗក៏មានចំណែកធ្វើឲ្យជើងអ្នកកាន់តែធំដែរ ព្រោះនៅពេលជាតិសូដ្យូមក្នុងរសជាតិប្រៃមានកាន់តែច្រើនក្នុងកោសិការាងកាយយើង វានឹងធ្វើឲ្យកោសិកាស្រូបទឹកចូលកាន់តែច្រើន ជាពិសេសត្រង់អវយវៈផ្នែកខាងក្រោម (ជើង)។ ដូច្នេះគួរ ញ៉ាំសាបៗល្មមទៅ ព្រោះវានឹងការពារជំងឺលើសឈាមដែរ ៕