អាវុធគ្រោះថ្នាក់ ៥ យ៉ាងអាចបំផ្លាញចំណងស្នេហ៍លឿនជាងការក្បត់គ្នាទៅទៀត
- 2019-01-14 09:00:00
- ចំនួនមតិ 0 | ចំនួនចែករំលែក 0
អាវុធគ្រោះថ្នាក់ ៥ យ៉ាងអាចបំផ្លាញចំណងស្នេហ៍លឿនជាងការក្បត់គ្នាទៅទៀត
នៅក្នុងរឿងភាគមនោសញ្ចេតនាជាច្រើន បានបញ្ចប់ទៅដោយភាពសប្បាយរីករាយគូស្នេហ៍ជួបជុំផ្អែមល្ហែម ធ្វើឲ្យនារីៗមើលហើយប្រាថ្នាចង់បានស្នេហាបែបនោះដែរ។ ផ្ទុយទៅវិញ នៅក្នុងជីវិតពិត មានភាពខុសស្រឡះពីគ្នា មិនអាចល្អឥតទាស់ដូចក្នុងរឿងឡើយ។ គូស្នេហ៍ខ្លះស្រលាញ់គ្នាខ្លាំង ប៉ុន្តែនៅមិនអាចជៀសផុតពីជម្លោះ ការអាក់អន់ស្រពន់ចិត្ត មិនយល់ពីគ្នា រហូតអាចឈានដល់ការបែកបាក់ក៏មាន។ ហេតុនេះហើយ ប្រសិនបើមិនចង់មានវិប្បដិសារី ស្តាយស្នេហ៍ខំសាងមករួមគ្នាជាយូរ គួរប្រុងប្រយ័ត្ននូវរឿង៥យ៉ាង ដែលអាចបំផ្លាញចំណងស្នេហ៍យ៉ាងស្ងៀមស្ងាត់លឿនជាងការក្បត់គ្នាទៅទៀត។
១. ឈ្លោះគ្នាមិនទុកមុខនៅកន្លែងសាធារណៈ
ទោះបីជាមានបញ្ហាធំប៉ុណ្ណាក៏ដោយ វាជារឿងឯកជនរបស់អ្នកទាំងពីរ មិនគួរលើកមកនិយាយវែកញែកនៅកន្លែងសាធារណដាច់ខាត។ ឈ្លោះគ្នាមុខគេមុខឯងបែបនេះ មិនត្រឹមតែឈឺខ្លាំងប៉ុណ្ណោះទេ ថែមទាំងអាប់អោនកិត្តិយស មិនឲ្យតម្លៃដល់ដៃគូ។ ទំហំក្តីស្រលាញ់ធំយ៉ាងណា ក៏គ្មាននរណាចង់ផ្សះផ្សាវិញដែរ ឲ្យតែធ្វើអីគ្មានហេតុផលដូច្នេះ។
២. គ្មានទំនុកចិត្ត សង្ស័យច្រើន
ទំនាក់ទំនងស្នេហារឹងមាំបានយូរអង្វែង អាស្រ័យលើការទុកចិត្តគោរពគ្នាទៅវិញទៅមក។ បើចូលចិត្តតែសង្ស័យហួសហេតុ អ្នកនឹងគ្មានថ្ងៃអាចនៅជាមួយគ្នាបានសុខឡើយ។ បើឆ្ងល់សួរបញ្ជាក់ឲ្យច្បាស់ បើមិនច្បាស់គួរតាមដានបន្ត កុំនៅស្រមើស្រមៃគិតអីតែឯង។
៣. មានគំនិតផ្ទុយគ្នាខ្លាំង
គូស្នេហ៍ភាគច្រើន ពេលស្រលាញ់គ្នាដំបូងតែងព្យាយាមធ្វើអ្វីសម្របតាមចិត្តគ្នា មើលទៅដូចជាចុះសម្រុងគ្មានអ្វីប្រៀបបាន។ ដល់ពេលរស់នៅជាមួយគ្នាយូរៗ គំនិតផ្ទុយគ្នាក៏បានលេចចេញឡើង បង្កឲ្យមានរឿងចម្រូងចម្រាសស្រាយ មានអារម្មណ៍ឃ្លាតឆ្ងាយពីគ្នា។ ដំណោះស្រាយដ៏ល្អ គឺត្រូវចេះបត់បែន រៀនយល់ពីគ្នា និងមិនត្រូវកាត់សេចក្តីថាគំនិតនរណាត្រូវជាងនរណាឡើយ។
៤. មិនស្តាប់គ្នា
បើអ្នកចេះស្តាប់គ្នាទៅវិញទៅមក នោះរឿងធំនឹងក្លាយជារឿងតូច ព្រោះអ្នកបានដឹងហេតុផលកាន់តែច្បាស់ ខុសស្រឡះពីគូស្នេហ៍ដែលតែងតែចង់ឈ្នះរៀងខ្លួន មិនស្តាប់គំនិតយោបល់ពីគ្នាជាមុន ប្រែក្លាយស្នេហាដូចគូប្រកួតលើសង្វៀន រកអាជ្ញាកណ្តាលមិនឃើញ។
៥. មិនចេះសម្របខ្លួនតាមកាលៈទេសៈ
គ្មានគូស្នេហ៍ណាមានអត្តចរិតដូចគ្នាទាំងស្រុងនោះទេ ដូច្នេះបើចង់ឲ្យស្នេហារឹងមាំ ឋិតថេរ គង់វង្ស មនុស្សពីរនាក់ត្រូវសម្របខ្លួន ទទួលយក ភាពខុសគ្នា និងបំពេញចន្លោះខ្វះខាតឲ្យគ្នាទៅវិញទៅមក។ ព្យាយាមផ្លាស់ប្តូរគំនិតខ្វែង ឲ្យទៅជាគំនិតស្របបន្តិចម្តងៗ ក្នុងគោលដៅគ្រួសារតែមួយ អនាគតតែមួយ ជោគជ័យរួមគ្នា៕
ចុចអានបន្ត៖ ស្រីៗពេលរើសសង្សារ ឬគូស្រករ គួរទន្ទេញពាក្យទាំងនេះក្នុងចិត្ត ទើបកម្រប៉ះមនុស្សខុស