៩ អាហារបំប៉នសម្រាប់សក់ខ្មៅភ្លឺស្អាត និងមានសុខភាពល្អ
- 2018-12-31 05:00:00
- ចំនួនមតិ 0 | ចំនួនចែករំលែក 0
៩ អាហារបំប៉នសម្រាប់សក់ខ្មៅភ្លឺស្អាត និងមានសុខភាពល្អ
សរសៃសក់ទន់ភ្លឺរលោងស្អាត គឺជាក្ដីប្រាថ្នារបស់នារីគ្រប់រូប តែគ្រប់គ្នាមិនមែនសុទ្ធតែអាចមានបែបនេះឡើយ។ ដូចនេះហើយពេលមានបញ្ហាសក់ខូច ស្រួច ស្រីៗបានខិតខំស្វែងរកគ្រឿងសម្អាងជាច្រើនមកបំប៉ន តែនៅមិនបានដូចចិត្ត។ ប្រសិនបើមានបញ្ហានេះមែន កញ្ញា សូមណែនាំអាហារជំនួយនេះវិញ ដែលអាចជួយឲ្យសក់ស្អាតពីខាងក្នុងឫសមកតែម្ដង។
១.ត្រីសាម៉ុង
ត្រីសមុទ្រប្រភេទនេះ សម្បូរទៅដោយអាស៊ីដខ្លាញ់អូមេហ្គា 3 ដែលល្អក្នុងការចិញ្ចឹមឫសសក់ និងធ្វើឲ្យសក់ភ្លឺ មានសុខភាពល្អ ដូច្នេះសូមញ៉ាំត្រីសាម៉ុង ១០០ ក្រាមពីរដងក្នុងមួយសប្ដាហ៍។
២.គ្រាប់ល្ពៅ
គ្រាប់ល្ពៅវាជាប្រភពនៃស័ង្កសី ប្រូតេអ៊ីន ខ្លាញ់ល្អ កាល់ស្យូម ផូស្វ័រ ដែក វីតាមីន A សារធាតុរ៉ែជាច្រើន និងជាតិសរសៃ។ ទាំងនេះគឺជាសារធាតុចិញ្ចឹមដែលនឹងជួយការពារស្បែកក្បាលពីការស្ងួតបណ្ដាលធ្វើឲ្យស្បែកក្បាលរលោង ដូច្នេះគួរតែញ៉ាំគ្រាប់ល្ពៅលីង ១/២ ពែងបានទៀងទាត់។
៣.សាច់មាន់
សាច់មាន់គ្មានស្បែក ត្រូវបានចាត់ថ្នាក់ជាប្រភពប្រូតេអ៊ីនខ្ពស់ផងដែរ។ ការញ៉ាំសាច់មាន់នឹងជួយពន្លឿនការបង្កើតសក់ថ្មីជំនួសឲ្យសក់ចាស់ដែលបាត់។
៤.ស្ត្រប៊េរី
ផ្លែឈើនេះសម្បូរវីតាមីន C ដែលជួយពង្រឹងប្រូតេអ៊ីន និងកូឡាជែន។ ដូច្នេះការធ្វើឲ្យសក់មានសុខភាពល្អ និងរឹងមាំ មិនងាយខូច ជ្រុះ គ្រាន់តែញ៉ាំផ្លែស្ត្រប៊េរីស្រស់ ១ ពែងតែស្មើ ១១៣% នៃសារធាតុចិញ្ចឹម។
៥.ការ៉ុត
បន្លែពណ៌ទឹកក្រូចគឺ សម្បូរវីតាមីន A ដែលជួយឲ្យស្បែកក្បាលមានសុខភាពល្អ។ លើសពីនេះទៀតវាក៏ជួយផងដែរក្នុងការចិញ្ចឹមស្បែកឲ្យស្រស់ស្អាតផងដែរ។
៦.គ្រាប់អាល់ម៉ុង
គ្រាប់អាល់ម៉ុងវីតាមីន E ខ្ពស់ ហើយក៏មានអង់ទីអុកស៊ីដង់ដែលអាចជួយចិញ្ចឹម និងជួសជុលស្បែកក្បាលឲ្យមានសុខភាពល្អ និងមានសំណើម។
៧.ផ្សិត
ប្រភពចំណីអាហារដែលមានផ្ទុកទង់ដែង និងជួយមិនឲ្យសក់ប្រែជាស្កូវ។ លើសពីនេះទៀតផ្សិតពោរពេញដោយវីតាមីន។
៨.បន្លែស្លឹកបៃតង
បន្លែស្លឹកបៃតង គឺជាប្រភពមួយផ្សេងទៀតនៃវីតាមីន A និងវីតាមីន C ដែលជួយដល់ការបង្កើតខ្លាញ់នៅលើស្បែកក្បាល។ វាជាថ្នាំធម្មជាតិដែលអាចជួយបំប៉នសក់ឲ្យទន់ ភ្លឺ រលោង មិនងាយខូច និងទប់ស្កាត់ការជ្រុះ។
៩.ស៊ុត
ស៊ុតមានតម្លៃថោក និងងាយស្រួលបរិភោគដែលជាប្រភពសម្បូរប្រូតេអ៊ីន។ វីតាមីន B12 ជាសារធាតុចិញ្ចឹមជួយពង្រឹងឫសសក់ ហើយក៏ជួយបង្កើនសំណើមដល់ស្បែកក្បាល និងសក់ផងដែរ ទប់ស្កាត់សក់ស្ងួត៕
ចុចអាន៖ងាយៗ! បណ្ដុះរោមភ្នែកឱ្យវែង ក្រាសជាងមុន មួយសប្ដាហ៍អាចដឹងលទ្ធផល