ទម្លាយប្រវត្តិរូបសាហាវកប់របស់អគ្គនាយកស្រី Huawei ដែលកំពុងត្រូវគេចាប់

2018-12-13 02:23:25
ចំនួនមតិ 0 | ចំនួនចែករំលែក 0

រឿងរ៉ាវលោកស្រី ម៉េង វ៉ាន់ចូវ (Meng Wanzhou) អគ្គនាយកហិរញ្ញវត្ថុរបស់សហព័ន្ធទូរសព្ទធំទី២ពិភពលោក Huawei ដែលទើបតែត្រូវបានចាប់ខ្លួនកាលពីថ្មីៗនេះ បានធ្វើឲ្យគេភ្ញាក់ផ្អើលជាខ្លាំង។

លោកស្រី Meng Wanzhou ត្រូវបានគេវាយតម្លៃថាមិនត្រឹមតែមានសមត្ថភាពនោះទេ ថែមទាំងមានសម្រស់ទៀតផង។ ក្នុងវ័យទើបតែ៤៦ឆ្នាំ លោកស្រីបានក្លាយជា CFO (អគ្គនាយកហិរញ្ញវត្ថុ) របស់ក្រុមហ៊ុនយក្ស Huawei ហើយ។ លោកស្រីត្រូវបានគេសន្និដ្ឋានថា អាចជាបេក្ខភាពស្នងតំណែងដ៏មានសក្ដានុពលបំផុត ពីឪពុករបស់ខ្លួន។

និយាយពីកម្រិតវប្បធម៌វិញ នារីមានឥទ្ធិពលរូបនេះ បានបញ្ជប់ថ្នាក់បណ្ឌិតផ្នែកវិទ្យាសាស្ត្រនៃមហាវិទ្យាល័យប៉េកាំង។ លោកស្រី ចាប់ផ្ដើមចូលធ្វើការឲ្យ Huawei នៅឆ្នាំ១៩៩៣។ គួរបញ្ជាក់ផងដែរថា លោកស្រី Meng គឺជាកូនស្រីបង្កើតរបស់នាយកក្រុមហ៊ុន Huawei ផ្ទាល់គឺលោក Ren Zhengfei។ ក្នុងឆ្នាំ២០០៥ និង២០១៣ ឪពុករបស់លោកស្រីត្រូវបានទស្សនាវដ្ដី Time ជ្រើសរើសជាមនុស្សម្នាក់ក្នុងចំណោមមនុស្ស១០០នាក់ដែលជះឥទ្ធិពលខ្លាំងជាងគេលើពិភពលោក។

មូលហេតុដែលកូនៗរបស់អគ្គនាយក Huawei មិនព្រមយកត្រកូលឪពុក តែយកត្រកូលម្ដាយនោះគឺ ជៀសវាងការចាប់អារម្មណ៍របស់អ្នកដទៃលើត្រកូលមួយនេះ។ ក្រៅពីមានឥទ្ធិពលនៅក្នុងប្រទេស នារីកើតឆ្នាំ១៩៧២ ក៏មានទឹកមាត់ប្រៃលើឆាកអន្តរជាតិដូចគ្នា ដោយលោកស្រីតែងតំណាងក្រុមហ៊ុនខ្លួនទៅប្រជុំជាមួយថ្នាក់កំពូលពិភពលោកក្នុងរាល់សន្និសីទធំៗទាំងឡាយ។

គួររំឭកថា លោកស្រី ត្រូវបានចាប់ខ្លួនតាមសំណើរបស់សហរដ្ឋអាមេរិក កាលពីថ្ងៃទី១ខែធ្នូ នៅពេលដែលលោកស្រីធ្វើដំណើរឆ្លងកាត់ប្រទេសកាណាដា។ មកទល់ពេលនេះ ទាំងកាណាដា ទាំងអាមេរិកមិនបានបញ្ជាក់ឲ្យដឹងនៅឡើយទេថា តើលោកស្រីត្រូវចាប់ខ្លួន ដោយជាប់ចោទពីបទល្មើសអ្វីពិតប្រាកដ។ យ៉ាងណាមិញ កាលពីខែមេសាកន្លងទៅនេះ បណ្តាញសារព័ត៌មានធំៗអាមេរិកបានចុះផ្សាយថា ក្រុមហ៊ុន Huawei កំពុងស្ថិតក្រោមការស៊ើបអង្កេតរបស់អាជ្ញាធរអាមេរិក ជុំវិញការសង្ស័យពីការរំលោភទណ្ឌកម្ម ដែលអាមេរិកដាក់លើអ៊ីរ៉ង់ និងកូរ៉េខាងជើង ៕

ប្រភព៖ Eva ប្រែសម្រួល៖ Caramel