មារយាទល្អ ៦យ៉ាងដែលមនុស្សថ្លៃថ្នូរម្នាក់តែងមាននៅកន្លែងធ្វើការ

2018-12-07 07:21:51
ចំនួនមតិ 0 | ចំនួនចែករំលែក 0

ការមានមារយាទល្អនៅកន្លែងធ្វើការចាត់ទុកថាជាអ្វីដែលយើងគួរយកចិត្តទុកដាក់ខ្លាំង មិនចាញ់រឿងផ្សេងៗឡើយ ព្រោះយើងមិនមែនមនុស្សសំខាន់ជាងគេលើលោកនោះទេ ដូច្នេះហើយធ្វើអ្វីគឺត្រូវគិតគូររឿងមារយាទសមមិនសមមុនជានិច្ច។ ថ្ងៃនេះកញ្ញាចង់នាំប្រិយមិត្តទាំងអស់គ្នាមកមើលថា មារយាទល្អថ្លៃថ្នូរដែលអ្នកធ្វើការគួរតែប្រកាន់ខ្ជាប់នៅកន្លែងធ្វើការមានអ្វីខ្លះ ដែលធានាថាបើសិនធ្វើបាន អ្នកណាៗក៏ស្រលាញ់រាប់អានអ្នកដែរ៖

រូបតំណាង

**១. មិននិយាយកាត់អ្នកដទៃ**

វាមិនមែនជារឿងល្អទេ នៅពេលការសន្ទនា ឬការនិយាយរបស់យើងត្រូវបានកាត់ចង្វាក់ដោយសារនរណាម្នាក់។ ការនិយាយកាត់ ឬរំខានការសន្ទនារបស់អ្នកដទៃ មិនមែនជាទង្វើប្រសើរនៅកន្លែងធ្វើការទេ ព្រោះក្រៅពីធ្វើឲ្យដាច់ចង្វាក់សន្ទនារបស់គេហើយ បរិយាកាសនៃការសន្ទនាក៏ត្រូវបំផ្លាញតាមនោះដែរ ហើយមិត្តរួមការងារអាចសម្លឹងមកអ្នកថាជាមនុស្សគ្មានមារយាទទៀតផង។ សាកគិតលមើល បើយើងកំពុងធ្វើបទបង្ហាញ Idea សំខាន់មួយ ប៉ុន្តែបែរជាមានមនុស្សម្នាក់និយាយកាត់ តើវានឹងមានអ្វីកើតឡើង? ក្នុងករណីជារឿងបន្ទាន់មែនទែន អ្នកក៏គួរសុំអនុញ្ញាតសិនដែរសឹមនិយាយ។

២. មិនញ៉ាំអាហារដែលមានក្លិនខ្លាំង

បើថ្ងៃណាមួយ អ្នកអង្គុយធ្វើការ ដោយត្រូវហិតក្លិនទុរេន ក្លិនប្រហុក ឬក្លិនអ្វីមួយដែលរំខានសមាធិការងាររបស់អ្នក តើអ្នកនឹងមានអារម្មណ៍បែបណាដែរ? ដូច្នេះហើយដើម្បីគោរពមិត្តរួមការងារ អ្នកមិនគួរញ៉ាំអាហារដែលមានក្លិនខ្លាំងៗក្នុងអូហ្វីសទេ ជាពិសេសក្នុងម៉ោងធ្វើការ។

៣. ដឹងរបស់ណារបស់រួម របស់ណារបស់ឯកជន

អ្នកប្រាកដជាមិនចូលចិត្តទេ បើមានមិត្តរួមការងារទាញកាសរបស់អ្នកយកទៅស្ដាប់ ឬយកកែវទឹករបស់អ្នកទៅប្រើដោយគ្មានការអនុញ្ញាត។ ដូច្នេះហើយអ្នកត្រូវបែងចែកឲ្យដាច់ថា អ្វីជារបស់ឯកជន អ្វីគឺជារបស់ប្រើរួមគ្នាបាន។ បើចាំបាច់ត្រូវប្រើរបស់ឯកជនរបស់អ្នកដទៃ គឺត្រូវសុំអនុញ្ញាតរបស់ម្ចាស់គេជាមុន។

៤. តែងខ្លួនសុភាពរៀបរយ

ចំពោះការតែងខ្លួន គួររៀបចំឲ្យមានភាពរៀបរយ និងឲ្យតម្លៃដល់កន្លែងធ្វើការរបស់អ្នក។ ប្រាកដជាគ្មានអ្នកណាពេញចិត្តទេបើអ្នកពាក់អាវវាលក្លៀកហើយស្លៀកសំពត់ឆែកជ្រៅដល់ណាណីមកធ្វើការ។ បើពិតជាមិនដឹងថាត្រូវស្លៀកបែបណាមែនទែន អាចសាកល្បងមើលទស្សនាវដ្ដី Search Google ឬវេបសាយនានាបាន។ មិនអីចឹងទេមើលផេក កញ្ញា ក៏បាន។ មិនត្រឹមតែរឿងស្លៀកពាក់ ប៉ុន្តែរឿងក្លិនខ្លួន ក្លិនមាត់អី ក៏គួរពិនិត្យខ្លួនឯងឲ្យបានត្រឹមត្រូវដែរ។

រូបតំណាង

៥. រក្សាអនាម័យ

មិនថានៅទីណា អ្វីដែលគ្រប់គ្នាត្រូវធ្វើគឺរក្សាអនាម័យទីកន្លែង។ បើអ្នកតែងខ្លួនស្អាត ប៉ុន្តែតុធ្វើការរញ៉េរញ៉ៃគ្មានសណ្ដាប់ធ្នាប់ ហើយមានភាពខ្ជីខ្ជារឿងសំរាមទៀតនោះ វាក៏មិនមែនជារឿងល្អដែរក្នុងខ្សែភ្នែកមិត្តរួមការងារ។

៦. កុំភ្លេចឲ្យក្រេឌីតមិត្តរួមការងារ

ការធ្វើការរួមគ្នា រមែងមានបញ្ហាចូលមកជារឿងធម្មតា ប៉ុន្តែបើអ្នកចេះសរសើរ និងនិយាយពាក្យអរគុណចំពោះមិត្តរួមការងារដែលជួយអ្នកឲ្យអាចឆ្លងកាត់បញ្ហាទាំងនោះបាន ក្រៅពីបង្កឲ្យមានទំនាក់ទំនងល្អហើយ អ្នកក៏ក្លាយជាមនុស្សគួរឲ្យស្រលាញ់រាប់អានដែរ។ ផ្ទុយទៅវិញ បើអ្នកនិយាយយកមុខតែម្នាក់ឯង មិនឲ្យក្រេឌីតដល់អ្នកដទៃ អ្នកនឹងក្លាយជាមនុស្សមិនល្អ ថែមទាំងធ្វើឲ្យមិត្តរួមការងារឈប់រាប់អាន ឬឈប់ចង់ជួយទៀតផង ៕

ប្រភព៖ Spiceee ប្រែសម្រួល៖ ស្វាយ វ៉ាន់ថន