មេដឹកនាំឆ្នើមដែលកូនចៅគោរពស្រឡាញ់ តែងមាន ៤ចំណុច

2018-11-16 12:00:00
ចំនួនមតិ 0 | ចំនួនចែករំលែក 0

អ្នកគ្រប់គ្រង ក៏គឺជាបុគ្គលិកថ្នាក់ក្រោម ដែលបានអភិវឌ្ឍខ្លួន និងសន្សំបទពិសោធន៍រយៈពេលជាយូរ រហូតបានទទួលការទុកចិត្ត តម្លើងតំណែងដើម្បីគ្រប់គ្រងក្រុមការងារ។ ប៉ុន្តែអ្នកដែលកំពុងធ្វើជាអ្នកគ្រប់គ្រង អ្នកចាត់ការ ឬម្ចាស់អាជីវកម្មដែលត្រូវមើលថែកូនចៅក្រោមបង្គាប់ជាច្រើននាក់ អាចនឹងភ្លេចពីកាលដែលខ្លួននៅជាកូនចៅរបស់គេពីមុន ឬមានចរិតធ្វើការផ្ទាល់ខ្លួនដែលផ្លាស់ប្ដូរខុសពីមុន ដោយសារបន្ទុកការងារ និងទំនួលខុសត្រូវកាន់តែច្រើន ឬភាពតានតឹងនៃការងារកាន់តែច្រើន ដែលអាចជះផលប៉ះពាល់ដល់ការគ្រប់គ្រងមនុស្ស និងការយកចិត្តទុកដាក់លើក្រុមការងារដែលខ្លួនកំពុងមើលថែ។ ថ្ងៃនេះគេហទំព័រ Kanha មានវិធីសាស្ត្រ ៤ចំណុចដើម្បីឲ្យក្លាយជាអ្នកគ្រប់គ្រងដ៏អស្ចារ្យ ដែលកូនចៅគោរព និងស្រឡាញ់កាន់តែខ្លាំង។ មកអានទាំងអស់គ្នាថាតើមានចំណុចអ្វីខ្លះ?

១. មានទំនាក់ទំនងល្អ

មិនថាការងាររបស់អ្នកមានទំនួលខុសត្រូវច្រើនគរដូចភ្នំក៏ដោយ ប៉ុន្តែអត្តចរិតដែលអាចឲ្យអ្នកដទៃងាយនឹងចុះសម្រុងជាមួយ ញញឹមញញែម និងមានអារម្មណ៍ថាជា “គ្នាឯង” នឹងជាទ្វារទីមួយដែលបើកឲ្យកូនចៅរបស់អ្នកអាចប្រឹក្សាជាមួយអ្នកនូវបញ្ហានានា បានយ៉ាងងាយស្រួល ដោយមិនចាំបាច់រង់ចាំទាល់តែពេលដែលអ្នកមានអារម្មណ៍ល្អ, ធ្វើឲ្យការងារដំណើរការរលូនយ៉ាងមានប្រសិទ្ធិភាព។ ការមានទំនាក់ទំនងល្អមិនមែនមានន័យថាបណ្ដោយឲ្យកូនចៅវាយស្មើ ឬអ្វីនោះទេ ប៉ុន្តែគឺការគ្រប់គ្រងអត្តចរិតខ្លួនឯងកុំឲ្យតឹង ឬក៏ធូររលុងខ្លាំងពេក ដើម្បីឲ្យការងារមានភាពរលូន។ អាចនិយាយបានថានេះជាមន្តស្នេហ៍មួយរបស់អ្នកដឹកនាំដែលអាចយកជាគំរូ ហើយក៏ជាការផ្ដល់តម្លៃឲ្យកូនចៅ ដែលត្រលប់មកវិញ កូនចៅនឹងផ្ដល់តម្លៃឲ្យអ្នកវិញកាន់តែច្រើន។

២. ចេះប្រើមនុស្ស ដឹងនិស្ស័យមនុស្ស

ការដែលធ្វើឲ្យការងារមួយជោគជ័យនឹងមិនមែនជាការលំបាកអ្វីឡើយប្រសិនបើអ្នកចេះដាក់មនុស្សឲ្យត្រូវនឹងការងារ ឬហៅថា Put the right man on the right job។ នៅពេលដែលអ្នកបានយល់ដឹងពីសមត្ថភាពរបស់កូនចៅហើយ រឿងមួយទៀតដែលអ្នកគួរយល់ដឹងគឺ ឧបនិស្ស័យរបស់ពួកគេម្នាក់ៗ ដែលនឹងអាចឲ្យអ្នកកាន់តែជឿជាក់ថាអ្នកអាចជ្រើសរើសមនុស្សឲ្យត្រូវនឹងការងារបានពិតប្រាកដ ព្រោះការដែលអ្នកកាន់តែស្គាល់កូនចៅដោយការ ចេះយកចិត្តកូនចៅដាក់ក្នុងចិត្តអ្នក នោះនឹងធ្វើឲ្យអ្នកកាន់តែងាយក្នុងការចាត់ចែងការងារ មិនថាជាការផ្ដល់ការងារ ការផ្ដល់រង្វាន់ ការផ្លាស់ប្ដូរតំណែង ឬការដាក់ទោស។

៣. ជួយកូនចៅឲ្យបានរីកចម្រើន

មនុស្សគ្រប់គ្នាសុទ្ធតែត្រូវការអភិវឌ្ឍ មិនចង់នៅកន្លែងដដែល ហើយកូនចៅរបស់អ្នកក៏ដូចគ្នា។ បើទោះជាគេអាចនឹងមិននិយាយចេញឲ្យអ្នកបានឮ ប៉ុន្តែវាមិនមែនជាហេតុផលដែលអ្នកត្រូវបង្ខាំងគេនៅតំណែងដដែលនោះទេ។ បើសិនបុគ្គលិករបស់អ្នកមានសមត្ថភាព និងធ្វើឲ្យអ្នកបានឃើញយ៉ាងច្បាស់ហើយថាគេអាចនឹងអភិវឌ្ឍខ្លួនទៅមុខបានបន្តទៀត អ្នកគួរតែគាំទ្រ និងបណ្ដុះបណ្ដាលកូនចៅឲ្យបានទទួលឱកាស។ កត្តាសំខាន់ៗដែលអ្នកអាចពិចារណាមុននឹងដំឡើងតំណែងកូនចៅមានដូចជា មានសក្ដានុពលអាចធ្វើឲ្យស្ថាប័នរីកចម្រើន មានទស្សនៈវិស័យល្អក្នុងការគ្រប់គ្រងមនុស្ស មានសមត្ថភាពដែលអាចវាស់វែងតាមលទ្ធផលការងារ និងមានភាពម៉ឺងម៉ាត់ក្នុងការធ្វើការឲ្យបានជោគជ័យជាដើម។

៤. យល់ដឹងពីជីវិតកូនចៅក្រៅម៉ោងធ្វើការ និងបង្កើនភាពស្និទ្ធស្នាល

អត្តចរិតពេលធ្វើការ និងក្រៅពេលធ្វើការរបស់បុគ្គលិក ប្រាកដជាមានភាពខុសប្លែក ទោះមិនច្រើន ក៏តិច។ បើទោះបីពេលវេលាក្រៅម៉ោងធ្វើការគឺជាពេលឯកជនក៏ពិតមែន ប៉ុន្តែប្រសិនបើក្នុងឋានៈអ្នកជាមេដឹកនាំមានឱកាសបានស្គាល់ និងបានឃើញពីបុគ្គលិកលក្ខណៈតាមជ្រុងមួយទៀតរបស់បុគ្គលិកខ្លះ វានឹងបង្កឲ្យមានការជឿជាក់គ្នា និងការធ្វើការកាន់តែសប្បាយរីករាយ ដូចជាការណាត់គ្នាញ៉ាំអីក្រោយចប់ម៉ោងធ្វើការ ឬទៅជប់លៀងនៅតំបន់រមណីយដ្ឋានណាមួយជាមួយគ្នា ដែលធ្វើឲ្យកូនចៅរបស់អ្នកនឹងអាចបើកចិត្ត និងទទួលយកអ្នកកាន់តែច្រើន។ ទោះយ៉ាងណាការធ្វើបែបនេះក៏ត្រូវធ្វើក្នុងកម្រិតដែលគួរសម ពុំដូច្នោះទេការដែលជប់លៀងច្រើនពេក ឬការសប្បាយរហូតភ្លេចខ្លួន ក៏អាចធ្វើឲ្យអ្នកបាត់បង់ការជឿជាក់បានដូចគ្នា។ ការស្គាល់ពីបុគ្គលិកអ្នកកាន់តែច្រើន នឹងធ្វើឲ្យអ្នកនិងកូនចៅមានបទពិសោធន៍រួមគ្នា និងបង្កើតភាពរួមគ្នាជាក្រុម ក្នុងក្រុមការងារអ្នកបានថែមទៀតផង។

ការធ្វើជាអ្នកដឹកនាំគេនោះមិនលំបាកនោះទេ ប៉ុន្តែការធ្វើជាអ្នកដឹកនាំដែលទទួលបានការគោរព ឬជឿជាក់ពីកូនចៅទើបជារឿងពិបាក ដែលទាំងនោះគឺស្ថិតនៅលើខ្លួនអ្នកផ្ទាល់ថារៀបចំខ្លួនឲ្យចូលជាមួយពួកគេយ៉ាងណាឲ្យសមរម្យ ដើម្បីធ្វើឲ្យបុគ្គលិករបស់អ្នកព្រមទទួលស្គាល់អ្នក និងធ្វើការឲ្យអ្នកបានយ៉ាងពេញប្រសិទ្ធិភាពដោយពេញចិត្តខ្លាំងបំផុត ៕

ប្រភព៖ yengobuzz ប្រែសម្រួល៖ ស្វាយ វ៉ាន់ថន