"ផ្កាស្រទាប់ពេជ្រ" មេរៀនមនុស្សស្រីក្រោយលែងលះរបស់ Aff ដែលធ្វើឲ្យអ្នកគាំទ្រសរសើរនាងស្ទើរពេញប្រទេស

2018-11-12 05:05:48
ចំនួនមតិ 0 | ចំនួនចែករំលែក 0

ព័ត៌មានអំពីការបើកចំហទំនាក់ទំនងស្នេហារវាងតារាសម្ដែងស្រី Matt Peeranee និងសេដ្ឋីពោះម៉ាយ Songkran ដែលជាអតីតស្វាមីរបស់តារាសម្ដែង Aff Taksaorn បានក្លាយជាប្រធានបទពេញនិយមជាងគេក្នុងប្រទេសថៃថ្មីៗនេះ។ មានការលើកឡើងជាច្រើនថា Matt និង Songkran បានទាក់ទងគ្នាតាំងពី Songkran និង Aff មិនទាន់លែងលះ ដែលធ្វើឲ្យមហាជនមានការអាណិតអាសូរខ្លាំងដល់ Aff ដែលត្រូវចុះចេញមករស់នៅម្នាក់ឯងជាមួយកូនតូច។ ខាងក្រោមនេះជាអត្ថបទមួយដែលអ្នកគាំទ្រម្នាក់បានសរសេររៀបរាប់ពាក់ព័ន្ធអំពី Aff Takasorn និងត្រូវបានចែកចាយរាប់សែនដងលើបណ្ដាញ Facebook៖

មើលឃើញស្នាមញញឹមស្រគត់ស្រគំរបស់មនុស្សស្រីដែលមានឈ្មោះ Aff Taksaorn ហើយទឹកភ្នែកខ្ញុំក៏ហូរ។ ខ្ញុំស្រលាញ់នារីម្នាក់នេះខ្លាំងណាស់ នារីដែលមានលើសពីពាក្យថា “រឹងមាំ”។ នាងស្គាល់ពីតម្លៃរបស់ខ្លួនឯង អាចនាំខ្លួនឯង និងបេះដូងខ្លួនឯងមកកន្លែងសុវត្ថិភាពល្អ ពេលដឹងថា ទីកន្លែងណាមួយមិនមែនជាទីកន្លែងសម្រាប់នាង។ នាងមិនបានយំសោក នាងគ្រាន់តែញញឹមតិចៗ ហើយដើរចេញពីកន្លែងដែលនាងបានរកឃើញថា មិនមែនជាកន្លែងរបស់នាង ហើយក៏មិនសក្ដិសមឲ្យនាងនៅតទៀតដែរ។ នៅក្នុងបទសម្ភាសន៍មួយដែលអ្នកកាសែតបានសួរថា នៅថ្ងៃចុះចេញពីផ្ទះរបស់ស្វាមី Aff មានយំឬអត់? Aff មានសម្ងំយំតែឯងអីឬអត់?

នាងឆ្លើយត្រឹមថា “អត់ទេ! ខ្ញុំអត់បានយំទេ ធម្មតាខ្ញុំត្រូវទៅផ្ទះខ្ញុំមួយអាទិត្យម្ដងស្រាប់ហើយ គ្រាន់តែពេលនេះខ្ញុំទៅផ្ទះខ្ញុំ ហើយលែងត្រលប់វិញប៉ុណ្ណឹងឯង”។ ខ្ញុំមើលឃើញភាពរឹងមាំដូចពេជ្ររបស់នាងតាមរយៈប្រយោគនេះ។

គ្មាននរណាមិនចង់ជោគជ័យក្នុងជីវិតស្នេហាទេ ជាពិសេសចំពោះស្នេហាដែលបានឆ្លងកាត់អាពាហ៍ពិពាហ៍ និងមានបុត្រទៅហើយ។ វាជាស្នេហាដែលមានលើសពីមនុស្សពីរនាក់។ អ្នកណាទៅដែលមានចង់មានគ្រួសារពេញលេញ។ ក្នុងនាមខ្ញុំជាម្ដាយដូចគ្នា ខ្ញុំដឹងថាវាពិបាក និងហត់នឿយកម្រិតណា បើយើងត្រូវចិញ្ចឹមកូនតែម្នាក់ឯង។ រាល់ថ្ងៃនេះ ខ្ញុំធ្លាប់បិទភ្នែកហើយស្រមៃថា បើគ្មានប្ដីនៅជាមួយ តើយើងអាចឆ្លងកាត់រាល់ថ្ងៃបានដោយរបៀបណា?

Aff និងស្វាមីកាលមិនទាន់ចែកផ្លូវគ្នា

បើទោះបីភាគច្រើនខ្ញុំជាអ្នកមើលកូន ប៉ុន្តែប្ដីគឺជាភាពកក់ក្ដៅ។ ការដែលមានគេ ធ្វើឲ្យគ្រួសារមានភាពពេញលេញមិនខ្វះខាត ធ្វើឲ្យយើងមានអារម្មណ៍ថាយើងមិនបានឯកោ យើងមានដៃគូគំនិតដែលនឹងរួមសុខ រួមទុក្ខជាមួយគ្នា។ គ្រប់បញ្ហាពាក់ព័ន្ធនឹងកូន យើងមានអ្នកដែលជួយចែករំលែក។ នេះហើយដែលហៅថា “គូជីវិត”។

អារម្មណ៍បែបនេះហើយ ដែលធ្វើឲ្យមនុស្សស្រីដែលមិនសូវមានសំណាងក្នុងជីវិតគូជាច្រើន មិនរឹងមាំគ្រប់គ្រាន់នឹងដើរចេញពីជីវិតដែលគ្មានក្ដីសុខសម្រាប់នាង ដោយគិតថាចង់ថែរក្សាឲ្យគ្រួសារនៅពេញលេញ ចង់ឲ្យកូនមានឪពុកម្ដាយជួបជុំគ្នា ដោយភ្លេចគិតថាភាពពេញលេញនៃគ្រួសារមិនមែនអាស្រ័យលើចំនួនសមាជិកនោះទេ ប៉ុន្តែវាអាស្រ័យលើចង្វាក់បេះដូងរបស់យើងទៅវិញ។ នៅកន្លែងណាមួយហើយធ្វើឲ្យបេះដូងយើងលោតត្រូវចង្វាក់ មិនឈឺចាប់ មិនប៉ះទង្គិច មិនធ្វើឲ្យបេះដូងអស់កម្លាំងរហូតលែងចង់លោតបន្ត ទីនោះហើយដែលយើងគួរផ្ញើខ្លួន។ បេះដូងរបស់កូនបានភ្ជាប់ជាមួយបេះដូងរបស់ម្ដាយតាំងពីនៅក្នុងផ្ទៃ ដូច្នេះមានតែម្ដាយទេដែលដឹងច្បាស់ថា នឹងព្យាបាលបេះដូងរបស់កូនដោយវិធីបែបណាទើបល្អបំផុត។

មែនហើយ ម្ដាយគ្រប់រូបដឹងច្បាស់ ហើយម្ដាយដូចជា Aff ក៏ដូចគ្នា។ យើងមិនដឹងទេថា ពីក្រោយផ្ទៃមុខស្រស់ស្រទន់ និងស្នាមញញឹមស្រគត់ស្រគំនោះត្រូវឆ្លងកាត់ស្នាមទឹកភ្នែក ភាពលំបាកលំបិន ភាពឯកោកម្រិតណា ទម្រាំនាងសម្រេចចិត្តក្រោកឡើងមកឱបខ្លួនឯង ឱបកូនតូច ហើយកាន់ដៃគ្នាដើរចេញមកដោយខ្សែភ្នែកជឿជាក់ថា នឹងគ្មានអ្វីដូចដើមតទៀតឡើយ។

នាងមិនដែលនិយាយអ្វីច្រើនក្រៅពីឆ្លើយតបសំណួរដែលនាងអាចឆ្លើយតបបាន សូម្បីការនិយាយដែលធ្វើឲ្យប៉ះពាល់ដល់កិត្តិយសភាគីម្ខាងទៀត ក៏នាងមិនដែលធ្វើ។ នាងមិនចាប់អារម្មណ៍ទ្រព្យសម្បត្តិ មិនចាប់អារម្មណ៍ក្ដីស្រលាញ់ដែលធ្លាប់មាន ឬអតីតកាលអ្វីលើសពីថាតើត្រូវរក្សាបេះដូងខ្លួនឯង និងកូនស្រីតូចយ៉ាងណានោះទេ។

នេះគឺជាមនុស្សស្រីដ៏មានតម្លៃក្នុងកែវភ្នែករបស់ខ្ញុំ

មនុស្សស្រីដែល “រឹងមាំ” ដោយមិនបាច់និយាយអួតអាងពីតម្លៃរបស់ខ្លួនឯង។

មនុស្សស្រីដែល "ស្រស់ស្អាត" ទាំងរូបរាង និងបេះដូងរបស់នាង។ នាងមានគុណសម្បត្តិជា "ផ្កាស្រទាប់ពេជ្រ" ដែលមានទាំងសម្រស់ និងភាពរឹងមាំ។ នាងមិនបណ្ដោយខ្លួនរងទុក្ខតាមបញ្ហាជីវិត នាងមានតែក្រោកឡើងហើយតែងខ្លួនចេញទៅធ្វើការ បំពេញតួនាទីជាម្ដាយដោយមិនឲ្យខ្វះចន្លោះ។ នៅពេលមានព័ត៌មានផ្ទុះឡើងលើជីវិតនាងម្ដងទៀត នាងក៏មិននិយាយអ្វីក្រៅពីញញឹមនិងអរគុណសម្រាប់គ្រប់កម្លាំងចិត្តចំពោះនាង ៕