ស៊ីលុយ១រឿង ៤៣លានដុល្លារ Angelababy ត្រូវរិះគន់លាន់ព្រោះសម្ដែងអន់ពេក

2018-10-22 04:07:34
ចំនួនមតិ 0 | ចំនួនចែករំលែក 0

ទោះបីជាមានតម្លៃខ្លួនខ្ពស់កប់ពពក និងច្រើនជាងមិត្តរួមសម្ដែងរបស់ខ្លួនដាច់ តែក្នុងខ្សែភាពយន្តភាគ “Entrepreneurial Age” តារាសម្ដែងស្រីជួរមុខចិន Angelababy ត្រូវគេបញ្ចេញមតិអវិជ្ជមានយ៉ាងខ្លាំងពេលគ្មានធ្វើអ្វីក្រៅជ្រួញចិញ្ចើម និងបើកភ្នែកឲ្យធំៗ។

ខ្សែភាពយន្តភាគ “Entrepreneurial Age” គឺជាវណ្ណកម្មថ្មីបំផុតរបស់តារាសម្ដែងស្រីជួរមុខចិន Angelababy ក្រោយពេលនាងសម្រាលកូនដំបូងរួច។ ដោយទទួលរងការរិះគន់ពីរឿងមុនៗច្រើនពេក សម្រាប់រឿងថ្មីនេះ ស្រីស្អាតវ័យ២៩ឆ្នាំបានជួលគ្រូសម្ដែងមកបំប៉នបន្ថែមដល់ផ្ទះ។ មិនត្រឹមតែប៉ុណ្ណោះ កំឡុងពេលថត ប្រពន្ធរបស់ Huang Xiaoming បានឈឺពោះ និងក្ដៅខ្លួនដល់៤០អង្សារតែនៅតែប្រឹងថតដល់ចប់។

ខ្សែភាពយន្តថ្មីនេះ គឺនិយាយពីជីវិតយុវវ័យដែលចេញពីសាលាហើយចាប់ផ្ដើមអាជីពសម្រាប់ខ្លួនឯង។ រ៉ាប់រងតួអគ្គនាយកស្រស់ស្អាត វ័យក្មេង និងមានឥទ្ធិពល Angelababy បានធ្វើឲ្យគេមិនសរសើរមិនបានជាមួយរូបសម្បត្តិរបស់ខ្លួន។ យ៉ាងណាក្ដី ការសម្ដែងរបស់នាងត្រូវគេវាយតម្លៃថាគ្មានទៅមុខសូម្បីបន្តិច នៅតែជ្រួញចិញ្ចើម ហើយប្រឹងក្រឡឹងភ្នែកដូចមុនដដែល។ ទស្សនិកជនតាមដានរឿងបានបញ្ចេញមតិថា សម្រាប់តម្លៃខ្លួន៥លានយាន់១ភាគ ហើយរឿងមានប្រវែង៦០ភាគនោះ អ្នកម្ដាយកូន១បានយកលុយរបស់អ្នកវិនិយោគដល់ទៅ ៣០០លានយាន់ (៤៣លានដុល្លារ) តែនាងមិនស័ក្ដិសមនឹងតម្លៃនេះសោះ ព្រោះនៅមានតារាផ្សេងដែលស៊ីតិចជាងហើយសម្ដែងបានល្អជាងឆ្ងាយណាស់។

ទន្ទឹមនឹងគ្នានោះដែរ ចំនួនអ្នកទស្សនារបស់រឿងក៏ធ្លាក់ចុះដែរ ដោយភាគថ្មីបំផុតមានអត្រាតែ០,២% តែប៉ុណ្ណោះ។ រីឯពិន្ទុវិញបានធ្លាក់ពី៣,៩ មកសល់ត្រឹម ៣,៦ តែប៉ុណ្ណោះ ដោយភាគដែលមានពិន្ទុទាបជាងគេគឺ២ពិន្ទុគត់លើ១០ពិន្ទុ។ មុននោះដែរ រឿងរបស់តារាស្រីកើតឆ្នាំ ១៩៨៩ ក៏មិនដែលទទួលបានពិន្ទុលើសពី៥នោះដែរ៕