មុនចង់ក្លាយជាអ្នកបម្រើការលើយន្តហោះ គួរដឹងពីបម្រាមនិងលក្ខណៈសម្បត្តិចាំបាច់

2018-10-03 06:27:30
ចំនួនមតិ 0 | ចំនួនចែករំលែក 0

សព្វថ្ងៃនេះ ជើងយន្តហោះធ្វើដំណើរ មានដល់ទៅ៤២០០០ ទូទាំងពិភពលោក បានដឹកជញ្ជូនភ្ញៀវជាង ២,៥លាននាក់កាន់ទៅគ្រប់ទិសទីរៀងរាល់ថ្ងៃ។ ក្នុងនោះដែរ បាហុនិការ (អ្នកបម្រើការលើយន្តហោះ) ដើរតួនាទីយ៉ាងសំខាន់ ដើម្បីជួយសម្រួលនិងការពារដល់អ្នកដំណើរទាំងអស់គ្នា។ ការងារមួយនេះ មើលទៅហាក់បីដូចជាមិនសូវពិបាកខ្លាំង ប៉ុន្តែក៏ត្រូវទាមទារឲ្យអ្នកគោរពច្បាប់វិន័យ និងត្រៀមលក្ខណៈសម្បត្តិជាច្រើនផងដែរ។

កញ្ញា អ៊ីល ច័ន្ទពេជ្រលក្ខិណា

ពិតណាស់គោលការណ៍នៃក្រុមហ៊ុនអាកាសចរណ៍នីមួយៗតែងមានភាពខុសៗគ្នា។ យ៉ាងណាមិញ កញ្ញា ** អ៊ីល ច័ន្ទពេជ្រលក្ខិណា** ជា បាហុនិការនៅក្រុមហ៊ុនឯកជនមួយកន្លែង បានចូលរួមចែករំលែកបទពិសោធន៍ខ្លះៗ ទាក់ទងទៅនឹងការត្រៀមខ្លួននិងបម្រាម បន្ទាប់ពីក្លាយខ្លួនជាបាហុនិការ។

*លក្ខណៈសម្បត្តិដែលអ្នកត្រូវមាន៖

មានចំណេះវិជ្ជាគ្រប់គ្រាន់
ចេះនិយាយភាសាអង់គ្លេសស្ទាត់ជំនាញ (បើចេះចិនកាន់តែល្អ)
មានកម្ពស់ចាប់ពី ១,៦០ម៉ែត្រឡើងទៅសម្រាប់នារី និង១,៧០ម៉ែត្រ សម្រាប់បុរស

មានទម្ងន់សមាមាត្រនឹងកម្ពស់
អាចហែលទឹកបាន
មានអត្តចរិតល្អ រួសរាយរាក់ទាក់ ម៉ត់ចត់មានទំនួលខុសត្រូវជាមួយការងារ
អាចធ្វើការជាក្រុមបាន។

*បម្រាមដែលបាហុនិការត្រូវហាមផ្តាច់៖

៨ម៉ោងមុនពេលហោះហើរ មិនត្រូវផឹកគ្រឿងស្រវឹង
មិនអាចប្រើប្រាស់របស់របរក្រុមហ៊ុនដូចជា ឯកសណ្ឋាន វ៉ាលី ក្រៅពីម៉ោងធ្វើការ មិនអាចគេងនៅលើយន្តហោះ
មិនអាចញ៉ាំនៅមុខភ្ញៀវធ្វើដំណើរ
មិនអាចទទួលលុយធីប
មិនអាចប្តូរសម្លៀកបំពាក់ក្រៅពីឯកសណ្ឋានរបស់ក្រុមហ៊ុន
មិនអាចលើកវ៉ាលីរបស់ភ្ញៀវធ្វើដំណើរប៉ុន្តែអាចជួយសម្រួល
មិនអាចចូលទៅក្នុងកាប៊ីនយន្តហោះតាមចិត្តចង់
មិនអាចតុបតែងមុខក្រាស់ៗខ្លាំងពេក
មិនត្រូវធ្វើម៉ូដសក់រញ៉េរញ៉ៃក្រៅពីម៉ូដសក់ដែលក្រុមហ៊ុនបានបង្ហាត់បង្ហាញ
មិនអនុញ្ញាតិឲ្យពាក់គ្រឿងអលង្កាស្អេកស្កះ អាចពាក់ក្រវិលមួយគូនិងចញ្ចៀនមួយវង់ដែលតូចបំផុត អ្វីដែលចាំបាច់បំផុតគឺនាឡិកាដើម្បីទុកមើលផ្ទៀងម៉ោង។

និស្សិតបញ្ចប់ថ្នាក់បរិញ្ញាបត្រអក្សរសាស្ត្រអង់គ្លេសនិងពាណិជ្ជកម្មរូបនេះ បានបញ្ជាក់ទៀតថា "ទម្រាំបានក្រុមហ៊ុនហៅទៅសម្ភាសន៍និងជាប់ជាស្ថាពរ នាងត្រូវរង់ចាំអស់រយៈពេលមួយឆ្នាំឯណោះ ដូច្នេះហើយបើអ្នកមានបំណងប្រាថ្នាស្រលាញ់ការងារនេះមែន សូមព្យាយាម អត់ធ្មត់ កុំបោះបង់ចោលក្តីស្រមៃ"៕