២០ឆ្នាំហើយនៅតែស្រពិចស្រពិលរឿងអនាគតទៀត អ្នកគួរគិតលើ ៣ចំណុចនេះ
- 2018-09-25 08:16:15
- ចំនួនមតិ 0 | ចំនួនចែករំលែក 0
២០ឆ្នាំហើយនៅតែស្រពិចស្រពិលរឿងអនាគតទៀត អ្នកគួរគិតលើ ៣ចំណុចនេះ
ចន្លោះ ២៥ ទៅ ៣០ គឺជាវ័យមួយដែលមនុស្សត្រូវធ្វើអ្វីដែលខ្លួនចង់ធ្វើ ប៉ុន្តែមនុស្សភាគច្រើន មិនអាចសម្រេចការងារដែលខ្លួនចង់ធ្វើឡើយ។ មនុស្សមួយចំនួនបានធ្វើការងារផ្ទុយពីអ្វីដែលខ្លួនចង់បាន នេះអាចប្រហែលមកពីកត្តាជាច្រើនដែល ធ្វើឲ្យគេដើរខុសគោលដៅបែបនេះ។ យ៉ាងណាមិញការស្រពិចស្រពិលលើរឿងអនាគតគឺជាបញ្ហាចោទមួយសម្រាប់យុវវ័យបច្ចុប្បន្ន ពិសេសបីពេលពួកគេឈានចូលវ័យ ២០ឆ្នាំតែម្ដង ដូច្នេះបើអ្នកកំពុងស្ថិតក្នុងក្នុងស្ថានភាពនេះអ្នកត្រូវគិតលើ ៣ចំណុចនេះ៖
១. កំណត់គោលដៅ
សព្វថ្ងៃមានយុវជនច្រើនណាស់ ដែលកំពុងដើរលើផ្លូវមួយដែលគ្មានគោលដៅច្បាស់លាស់ និយាយឲ្យចំគឺដើរមួយថ្ងៃគិតមួយថ្ងៃ។ ពួកគេមិនដឹងថាខ្លួនឯងចង់អីឲ្យប្រាកដ ដូច្នេះអ្វីដែលគេកំពុងធ្វើរាល់ថ្ងៃក៏គ្មានទិសដៅច្បាស់លាស់ដែរ។ អ្វីដែលអ្នកត្រូវធ្វើគឺអង្គុយសួរខ្លួនឯងឲ្យច្បាស់ថា ខ្លួនឯងចង់ធ្វើអី ចង់បានអី ហើយចង់ដើរទៅណា ហើយកំណត់គោលដៅនោះឲ្យជាក់លាក់។ បើខ្លួនឯងច្បាស់ហើយ នោះអ្នកនឹងអាចដឹងថាអ្នកត្រូវចាប់ផ្ដើមពីណាទៅមុនហើយ។
២.ស្វែងយល់ពីចំណូលចិត្តខ្លួនឯង
អ្នកត្រូវអង្គុយសួរខ្លួនថាអ្នកចូលចិត្តអ្វី? អ្នកមានដុងទៅខាងអី ហើយពូកែអី? នេះជាអ្វីដែលអ្នកត្រូវដឹង ព្រោះបើអ្នកចូលចិត្តនេះ ហើយទៅធ្វើនោះ អ្នកនឹងស្ដាយក្រោយជាមិនខាន។ បើអ្នកចូលចិត្តខាងកុំព្យូទ័រ អ្នកគួរចាប់យកខាង IT បើអ្នកចូលចិត្តថតរូប ឬវីដេអូ អ្នកគួររៀនជំនាញហ្នឹង ទើបអ្នកមិនមានសម្ពាធ។ អ្នកត្រូវដឹងណានៅពេលអ្នកដែលធ្វើអ្វីដែលអ្នកមិនចង់ធ្វើហើយ អ្នកនឹងគ្មានអារម្មណ៍ធ្វើនោះទេ ហើយអ្នកនឹងគ្មានកម្លាំង គ្មានឆន្ទៈធ្វើវា។ អ្នកនឹងត្រូវបង្ខំខ្លួនឯងរហូត ហើយអ្នកនឹងចាប់ផ្ដើមធុញទ្រាន់ជាមួយអ្វីដែលអ្នកមាន។
៣. រៀបចំពេលវេលាឲ្យបានត្រឹមត្រូវ
នៅពេលអ្នកដឹងពីគោលដៅ និងចំណង់ចំណូលចិត្តអ្នកហើយ អ្វីដែលសំខាន់នោះគឺការរៀបចំពេលវេលា ជាមួយអ្វីដែលអ្នកត្រូវធ្វើ ព្រោះបើរញ៉េរញ៉ៃ អ្នកអាចខាតពេល។ អ្នកត្រូវបែងចែកពេលវេលា ថាអ្នកត្រូវធ្វើអីមុន ធ្វើការងារណាក្នុងអំឡុងពេលណា ហើយត្រូវចំណាយពេលប៉ុន្មាន។ ការរៀបចំពេលត្រឹមត្រូវនឹងធ្វើឲ្យអ្នកដើរបានយ៉ាងរលូន ហើយមិនយឺតយ៉ាវ។ បែបនេះហើយអ្នកត្រូវប្រើពេលឲ្យបានល្អបំផុត ព្រោះបើអ្នកប្រើពេលមិនត្រឹមត្រូវ អ្នកនឹងបាត់បង់ឱកាសក៏ថាបាន៕
ចុចអាន៖៦យ៉ាងត្រូវធ្វើឲ្យបានមុនអាយុ ៣០ឆ្នាំ ដើម្បីជីវិតកាន់តែមានន័យ