ទស្សនិកជនមិនគាំទ្រគម្រោងរឿង “ព្រះនាងយេយេ” ជំនាន់ថ្មីឆ្នាំ២០១៩

2018-09-24 02:38:24
ចំនួនមតិ 0 | ចំនួនចែករំលែក 0

ក្រោយពេលកំពូលអ្នកសរសេរប្រលោមលោក Chiung Yao ប្រកាសពីគម្រោងថតរឿងភាគ “ព្រះនាងយេយេ” ឡើងវិញ ទស្សនិកជនចិនបានបង្ហាញពីមតិខុសៗគ្នាចំពោះគំនិតមួយនេះ។

កាលពីយប់ថ្ងៃទី១៨ ខែកញ្ញាកន្លងទៅនេះ សន្និសីទកាសែតរបស់ប៉ុស្តិ៍ទូរទស្សន៍អ៊ីនធឺណិត Tencent របស់ចិនត្រូវបានធ្វើឡើងនៅទីក្រុងប៉េកាំងដើម្បីនិយាយពីគម្រោងផលិតរឿងរបស់ខ្លួននៅក្នុងឆ្នាំ២០១៩ខាងមុខ។ ដោយសារតែជាប់ធុរៈផ្ទាល់ខ្លួន អ្នកនិពន្ធប្រលោមលោក Chiung Yao ដែលជាម្ចាស់វណ្ណកម្ម “ព្រះនាងយេយេ” ដ៏ល្បីឈ្មោះនោះ បានត្រឹមបង្ហាញខ្លួនតាមវីដេអូ។ លោកស្រីបានឲ្យដឹងថា សាច់រឿងរបស់ខ្សែភាពយន្តភាគ “ព្រះនាងយេយេ” ជំនាន់ថ្មីបានរួចរាល់ហើយ ហើយនៅក្នុងស៊េរីថ្មីនេះ គឺលាយឡំឈុតឆាកកំប្លែង និងរ៉ូមេនទិកច្រើន។

ក្រោយពេលដឹងពីគម្រោងនេះ មតិទស្សនិកជនភាពយន្តបានចែកចេញជា២បក្សយ៉ាងដាច់ស្រឡះ ខណៈអ្នកខ្លះគាំទ្រពេញទំហឹង មួយចំនួនទៀតហាក់មិនចង់ឲ្យមានគម្រោនេះឡើយ។ មូលហេតុនៃការបដិសេធនេះនោះគឺ គិតមកទល់ពេលនេះ រឿង “ព្រះនាងយេយេ” បានមាន៣ជំនាន់ហើយ ដោយជំនាន់ ១ និង២គឺជោគជ័យលើសពីការរំពឹងទុក លើកតម្កើងកេរ្តិ៍ឈ្មោះតារាសម្ដែង Zhao Wei, Ruby Lin និង Fan Bingbing ឡើងលំដាប់ជួរមុខទាំងអស់។ យ៉ាងណាក្ដីជំនាន់ទី៣ ផលិតឆ្នាំ២០១១ បរាជ័យខ្លាំងរហូតដល់ថ្នាក់ធ្វើឲ្យគេមិនចង់នឹកដល់។ ដោយសារតែភាពបរាជ័យនេះបានធ្វើឲ្យទស្សនិកជនគ្មានជំនឿចិត្តនឹងរឿងឆ្នាំ២០១៩ខាងមុខ៕