ចង់ជោគជ័យ អ្នកត្រូវបង្ខំខ្លួនឯងឲ្យធំធាត់ មិនមែននៅកន្លែងដដែលឡើយ

2018-09-14 08:00:23
ចំនួនមតិ 0 | ចំនួនចែករំលែក 0

មានមនុស្សជាច្រើនតែចង់ប្រាថ្នាថារស់នៅសុខស្រួល មិនចង់ពិបាក មិនចង់នឿយហត់ឡើយ ប៉ុន្តែអ្វីដែលខ្ញុំចង់សួរទៅគេវិញថា តើមានរបស់ណាបានមកដោយមិនចំណាយកម្លាំងទៅយកវាទេ?

បើអ្នកចង់បានជីវិតសុខស្រួល ហេតុមិនព្រមខំ មិនព្រមធ្វើឲ្យខ្លួនឯងលូតលាស់ពីមួយថ្ងៃទៅមួយថ្ងៃទៅ? ឬមួយអ្នកចង់អង្គុយមួយកន្លែងហើយភាពសុខស្រួលនោះហោះមករកអ្នក?

រូបតំណាង

អ្នកធ្លាប់តូចចិត្តនឹងជីវិតខ្លួនឯងអត់ នៅពេលឃើញអ្នកផ្សេងគេមានសេចក្ដីសុខ មានលុយចាយពេញដៃ មានតំណែងខ្ពស់ មានមុខមានមាត់ ខណៈអ្នកគ្មានអីមួយឲ្យធំដុំសោះ។ អ្នកប្រហែលអង្គុយអន់ចិត្តនឹងខ្លួនឯង អ្នកប្រហែលអង្គុយគិតថា ហេតុអីវាសនាគេល្អម្ល៉េះ ហេតុអីគេកើតមកសំណាងម្ល៉េះ? ប៉ុន្តែតើអ្នកមានធ្លាប់គិតអត់ថាទម្រាំគេដើរមកដល់ចំណុចនេះ គេត្រូវឆ្លងកាត់អីខ្លះ គេត្រូវលំបាកអីខ្លះ តស៊ូយ៉ាងម៉េចខ្លះ ឬក៏អត់?

អ្នកត្រូវចាំណា គ្មានអ្នកណាម្នាក់មិនប្រឹងដើរ មិនប្រឹងរត់ អាចដល់គោលដៅដែលគេចង់បាននោះទេ ដូច្នេះគ្រប់គ្នាដែលអ្នកឃើញថាគេជោគជ័យនោះ សុទ្ធតែព្យាយាម តស៊ូណាស់ក្នុងជីវិតរបស់គេ។

បើអ្នកនៅតែមានគំនិតក្មេង ប្រកាន់ចរិតកូនក្មេងក្នុងការធ្វើការនោះ អ្នកគ្មានថ្ងៃជោគជ័យឡើយ។ កូនក្មេងគឺប្រើអារម្មណ៍មកធ្វើការ កូនក្មេងតែងតែចង់នៅកន្លែងដែលសុខស្រួល កូនក្មេងមិនដែលគិតអីបានវែងឆ្ងាយនោះទេ ដូច្នេះបើអ្នកចង់សម្រេចក្ដីស្រមៃអ្នក ត្រូវហ្វឹកហាត់ខ្លួនឯងឲ្យក្លាយជាមនុស្សធំ ឲ្យខ្លួនឯងលូតលាស់ធំធាត់ មិនមែននៅកន្លែងដដែលនោះទេ។

រូបតំណាង

បើខ្លួនឯងមិនព្រមធំធាត់ទេ កុំសួរថាហេតុអីជីវិតអ្នកគ្មានការផ្លាស់ប្ដូរ? បើអ្នកពិតជាចង់ផ្លាស់ប្ដូរទោះចង់ឬមិនចង់អ្នកត្រូវបង្ខំខ្លួនឯងឲ្យផ្លាស់ប្ដូរមុនសិន បន្ទាប់មកគ្រប់យ៉ាងនឹងប្រែប្រួល ហើយអ្នកនឹងមើលឃើញវា។

រៀបចំជីវិតខ្លួនឯងឲ្យបានល្អ មានរបៀបរៀបរយ និងត្រូវបោះជំហានទៅមុខជានិច្ច ព្រោះនៅមានរបស់ជាច្រើនដែលអ្នកត្រូវស្គាល់ ដែលអ្នកត្រូវធ្វើ ដូច្នេះមិនអាចឲ្យជីវិតខ្លួននៅនឹងថ្កល់នោះឡើយ៕

ចុចអាន៖សម្ដីមាសខុងជឺ៖ ឧស្សាហ៍ខុសក្បួន ៥ប្រការដែលប្រឹងយ៉ាងណាក៏នៅតែក្រ

អត្ថបទ៖ ផេង ផលធិតា