គាថាមាសទាំង ៧ដែលធ្វើឲ្យជីវិត Ann Thongprasom ពោរពេញដោយជោគជ័យនិងក្ដីសុខ
- 2018-09-12 08:07:04
- ចំនួនមតិ 0 | ចំនួនចែករំលែក 0
គាថាមាសទាំង ៧ដែលធ្វើឲ្យជីវិត Ann Thongprasom ពោរពេញដោយជោគជ័យនិងក្ដីសុខ
មានឈ្មោះជាកំពូលតារាស្រីក្នុងវិស័យសិល្បៈថៃ Ann Thongprasom ក្រៅពីមានរូបរាងស្រស់ស្អាត និងសមត្ថភាពពេញខ្លួនហើយ ថាមពលនៃការធ្វើការរបស់តារារូបនេះក៏មិនដែលថមថយ ដោយស្ទើរតែគ្មាននរណាម្នាក់ ឬអ្វីមួយដែលអាចធ្វើឲ្យនាងចុះចាញ់ និងហត់នឿយងាយៗឡើយ។ ខាងក្រោមនេះគឺជាការចែករំលែករបស់ Ann Thongprasom អំពីរូបមន្តចំនួន ៧ដែលអាចចាត់ទុកថាជាគាថាមាសដែលធ្វើឲ្យជីវិតនាងពោរពេញដោយក្ដីសុខ និងជោគជ័យ៖
១. ស្រលាញ់អ្វីដែលខ្លួនធ្វើ
Ann ដឹងថាខ្លួនមានសំណាងណាស់ដែលបានធ្វើអ្វីដែលខ្លួនស្រលាញ់បំផុត។ ខ្ញុំជឿថា បើយើងស្រលាញ់អ្វី យើងនឹងធ្វើវាបានផលល្អ។ បើយើងធ្វើការចេញពីចិត្ត ទោះបីហត់នឿយប៉ុណ្ណា ក៏យើងមានកម្លាំងក្រោកពីគេងលឿនរាល់ព្រឹកដើម្បីធ្វើវាដែរ។
២. បើធ្វើអ្វីគឺធ្វើអស់ពីកម្លាំងកាយកម្លាំងចិត្ត
ក្នុងការធ្វើការ Ann កំណត់ខ្លួនឯងថា ត្រូវបំពេញតួនាទី និងការងារដែលខ្លួនទទួលបានឲ្យល្អបំផុត និងត្រូវធ្វើដោយអស់ពីកាយពីចិត្តរបស់ខ្លួន។ បើយើងធ្វើអ្វីអស់ពីសមត្ថភាព យើងក៏មិនបាច់ខ្លាចថាអ្នកណាគិតយ៉ាងម៉េចៗឡើយ ហើយលទ្ធផលយ៉ាងណាគឺយើងរីករាយនឹងទទួលយក។
៣. មើលថែរាងកាយ និងផ្លូវចិត្តឲ្យបានរឹងមាំ
សម្រាប់រាងកាយ Ann នឹងព្យាយាមធ្វើឲ្យខ្លួនឯងរឹងមាំបំផុត ដើម្បីមានកម្លាំងធ្វើការពេញដៃពេញជើង។ ខ្ញុំចូលចិត្តលេងយូហ្កាណាស់ ព្រោះគ្រប់ពេលដែលហាត់ គឺមានអារម្មណ៍ថាស្រួលខ្លួន និងធូរស្រាលអារម្មណ៍។ ចំណែកខាងផ្លូវចិត្ត ខ្ញុំគិតថានៅកន្លែងនីមួយៗតែងមានទាំងមនុស្សល្អ និងមនុស្សអាក្រក់ ប៉ុន្តែបើយើងមើលឃើញថាវាជាបច្ច័យខាងក្រៅ ដែលយើងមិនអាចគ្រប់គ្រងបាន យើងក៏ត្រូវត្រលប់មកចាត់ការផ្លូវចិត្តខ្លួនឲ្យរឹងមាំ ដោយការគ្រប់គ្រងអារម្មណ៍ខ្លួនឯងឲ្យបានល្អ មានសតិ ចិត្តត្រជាក់ មិនត្រចៀកស្រាល។
៤. មិនបៀតបៀនអ្នកណា
Ann ជឿលើកម្មផលច្រើន។ ខ្ញុំជឿថាបើយើងធ្វើអ្វីមិនល្អ រឿងមិនល្អនឹងត្រលប់មករកយើង។ កាលនៅក្មេង ខ្ញុំមានឱកាសតាមយាយទៅស្ដាប់ធម៌ក្នុងវត្តញឹកញាប់ និងត្រូវអានសៀវភៅធម៌ឲ្យលោកយាយស្ដាប់រហូត ហើយលោកយាយក៏និយាយរឿងផ្សេងៗឲ្យស្ដាប់ និងបង្រៀនឲ្យខ្ញុំធ្វើតាម។ ត្បិតតែពេលនេះខ្ញុំមិនសូវបានទៅវត្តញឹកញាប់ដូចមុន ប៉ុន្តែខ្ញុំតែងយកអ្វីដែលខ្លួនបានរៀនសូត្រមកប្រើក្នុងជីវិត ដែលធ្វើឲ្យខ្លួនមានក្ដីសុខច្រើន។
៥. មិនរត់គេចពីការផ្លាស់ប្ដូរ
Ann មិនធ្វើអ្វីដដែលៗយូរឡើយ ថែមទាំងតែងបង្វឹកឲ្យចិត្តខ្លួនទទួលយកការផ្លាស់ប្ដូរ ដែលនឹងកើតឡើងក្នុងអនាគតផង។ អនាគតជីវិតយើងនឹងកាន់តែល្អ ឬកាន់តែលំបាក ក៏យើងមិនដឹង ប៉ុន្តែខ្ញុំជឿថា បើយើងត្រៀមខ្លួនរួចរាល់ក្នុងការប្រឈមជាមួយអ្វីដែលកើតឡើង និងធ្វើវាឲ្យល្អបំផុត វាក៏ប្រៀបដូចជាយើងមានប្រព័ន្ធការពាររឹងមាំមួយដែរ។
៦. មិនបោកប្រាស់អ្នកដទៃ
Ann មិនដែលកុហកអ្នកណាឡើយចំពោះរឿងដែលខ្លួនកើតមកក្នុងគ្រួសារមិនពេញលេញ ជីវភាពក៏លំបាក ព្រោះ Ann ពេញចិត្តដែលបានរស់នៅជាមួយលោកយាយក្នុងផ្ទះតូចៗ។ ប្រសិនបើលោកយាយមិនបានផ្ដល់ការអត់ធ្មត់ ភាពរឹងមាំ និងភាពក្លាហានក្នុងការប្រឈមមុខនឹងការពិតទាំងអស់នេះ ម្ល៉េះ Ann ប្រហែលជាត្រូវដួលយូរហើយ នៅពេលត្រូវប្រឡូកក្នុងសង្គមដែលពោរពេញដោយការតស៊ូប្រកួតប្រជែងបែបនេះ។
៧. ចេះអរគុណក្ដីសុខដែលខ្លួនមាន
Ann ត្រូវអរគុណលោកយាយដែលបានផ្ដល់ជីវិតដ៏មានក្ដីសុខ ដែលជាឬសគល់ដ៏ល្អដែលធ្វើឲ្យខ្ញុំជាខ្ញុំនៅពេលនេះ។ Ann តែងសម្លឹងមើលគ្រប់យ៉ាងជុំវិញខ្លួនថាជាក្ដីសុខ ងាកទៅខាងឆ្វេងដៃបានមើលភាពយន្តក៏មានក្ដីសុខ ងាកទៅខាងស្ដាំដៃបានអានសៀវភៅ ឬនិយាយជាមួយអ្នកដទៃក៏មានក្ដីសុខ ដូច្នេះហើយនៅពេលយើងមានក្ដីសុខ យើងគួរតែអរគុណវាទៅ។ ជីវិតមនុស្សមានច្រើនរសជាតិ ទុក្ខខ្លះសុខខ្លះខុសៗគ្នា ដូច្នេះហើយយើងគួរផ្ដោតលើអ្វីដែលធ្វើឲ្យយើងសុខវិញប្រសើរជាង មិនចាំបាច់យកខ្លួនឯងទៅប្រៀបធៀបជាមួយនឹងអ្នកដទៃ កុំគិតថាខ្លួនឯងខុសពីអ្នកដទៃ នោះចិត្តយើងនឹងអស់ទុក្ខកង្វល់ ហើយនៅពេលចិត្តយើងអស់ទុក្ខកង្វល់ វាក៏ស្មើនឹងមានក្ដីសុខហើយ ៕
ចុចអាន៖
៧មេរៀនជីវិតដែលគ្មានសាលាណាបង្រៀនទាំងអស់ ត្រូវរៀន និងចងចាំដោយខ្លួនឯង
អត្ថបទតឿនសតិ៖ ចង់អ្នកណាមើលងាយអីមើលទៅ កុំឲ្យតែយើងមើលងាយខ្លួនឯង!