កុំចេះតែចង់វះ ថ្លឹងថ្លែងគុណសម្បតិ្ត-គុណវិបត្តិ នៃការសម្រាលកូនដោយធម្មជាតិ និងវះកាត់សិន

2018-07-03 02:40:00
ចំនួនមតិ 0 | ចំនួនចែករំលែក 0

ការសម្រាលដោយវះកាត់ជានិច្ចកាលតែងតែមានផលលំបាកជាងការសម្រាលធម្មតា ប៉ុន្តែទោះដឹងយ៉ាងនេះក្ដីក៏ស្ត្រីមួយចំនួននៅតែសម្រេចចិត្តទទួលយកការសម្រាលដោយវះកាត់នេះដដែល ទោះជាអាចកើតតាមធម្មជាតិបានក៏ដោយ។ ដូច្នេះមុនសម្រេចិត្តយកវិធីណាមួយដើម្បីសម្រាល ស្រ្តីគួរយល់ដឹងឲ្យបានច្បាស់ពីគុណសម្បតិ្ត-គុណវិបត្តិ នៃការសម្រាលកូនដោយធម្មជាតិ និងវះកាត់។

ការសម្រាលដោយធម្មជាតិ

*គុណសម្បត្តិ

ចំពោះម្ដាយ៖ មានពេលច្រើនជាងក្នុងការសម្រេចចិត្តជ្រើសរើសវិធីសម្រាល និងមានពេលច្រើនដើម្បីត្រៀមខ្លួន។ មិនតែប៉ុណ្ណោះ ស្រ្តីមិនចាំបាច់បារម្ភពីការរងផលប៉ះពាល់ ពីថ្នាំស្ពឹក ឬថ្នាំបំបាត់ការឈឺចាប់ដែលបណ្ដាលបាត់បង់រំញោចវិញ្ញាណ ឬធ្វើឲ្យគ្មានទឹកដោះជាដើម។

ការកើតដោយធម្មជាតិធ្វើឲ្យម្ដាយឆាប់មានទឹកដោះ ដោយសារការឲ្យសញ្ញាពីប្រព័ន្ធរាងកាយ។ ជាធម្មតារាងកាយអ្នកនឹងធ្វើការតាមធម្មជាតិ គឺផលិតទឹកដោះក្រោយសម្រាលរួច ឲ្យកូនបៅភ្លាមៗ ម្ដាយមានសុខភាពរឹងមាំ ឆាប់ជារបួស ហើយអាចឆាប់ធ្វើចលនាបានតាមធម្មតា។

ទារក៖ ការសម្រាលធម្មជាតិ អរម៉ូនអង់ដូភីន (endorphin) ដែលបញ្ចេញពីរាងកាយរបស់ម្ដាយនឹងមានឥទ្ធិពលវិជ្ជមានទៅលើសមត្ថភាពរបស់ទារកក្នុងការសម្របខ្លួនទៅជីវិតនៅខាងក្រៅស្បូន។ កើតធម្មជាតិក៏មិនសូវមានការឈឺចាប់ជាងការសម្រាលកូនដោយវះកាត់ដែរ។ មូលហេតុគឺថាការសម្រាលកូនធម្មជាតិជួយពង្រីកសួតឲ្យធំដែលជួយសម្រួលដល់ការដកដង្ហើមទារកបន្ទាប់ពីកំណើត។ ទារកកើតមកភ្លាមអាចដាក់លើទ្រូងម្ដាយ ដើម្បីទទួលភាពកក់ក្ដៅភ្លាម ហើយត្រូវបានបំបៅដោះភ្លាមៗដែរបន្ទាប់ពីកំណើត។

ទោះបីជាមានគុណសម្បត្តិច្រើនមែន តែការសម្រាលធម្មជាតិក៏ប្រឈមដូចជា៖

*គុណវិបត្តិ

ម្ដាយ៖ ម្ដាយអាចប្រឈមនឹងការអស់កម្លាំងខ្លាំងពេក ក្រោយពីប្រឹងកើត។ វិធីសម្រាលនេះក៏មិនសូវសុវត្ថិភាពដែរចំពោះស្ត្រីមានអាងត្រគាកតូច។

កូន៖ ការកើតដោយធម្មជាតិបើសិនជាមានបញ្ហាពាក់កណ្ដាលផ្លូវនឹងពិបាកក្នុងការជួយសង្គ្រោះ។ ព្រោះកាលណាកូនធ្លាក់ដល់មាត់ស្បូន គឺទាមទារត្រូវតែប្រឹងឲ្យកើត ដោយមិនអាចសង្គ្រោះដោយវះបាន។

ការសម្រាលដោយវះកាត់

*គុណសម្បត្តិ

ចំពោះម្ដាយ៖ វិធីសាស្ត្រវះកាត់គឺជាការសង្គ្រោះសម្រាប់ម្ដាយដែលពពោះមានភាពមិនប្រក្រតីដូចជា ទារកមានជំងឺបេះដូង ឬជំងឺផ្សេងៗ សុកពាំងមាត់ស្បូន ដែលមិនអាចកើតដោយធម្មជាតិបាន។ ម៉្យាងទៀត ការសម្រាលដោយវះកាត់គឺលឿនហើយងាយស្រួលដោយពុំចាំបាច់អស់កម្លាំងប្រឹង និងឈឺពោះយូរ។

ចំពោះកូន៖ សុវត្ថិភាពចំពោះទារក ព្រោះសម្រាលលឿន និងមិនបារម្ភខ្លាចបញ្ហាជាប់គាំងដូចកើតធម្មជាតិ។

*គុណវិបត្តិ

ចំពោះម្ដាយ៖ អំឡុងពេលវះម្ដាយត្រូវបានចាក់ថ្នាំស្ពឹក ថ្នាំបំបាត់ភាពឈឺចាប់ ដែលថ្នាំទាំងនោះមានផលប៉ះពាល់ ដូចជាសម្ពាធឈាមធ្លាក់ចុះ របួសស្បូន ឈាមធ្លាក់ច្រើនជាងធម្មតា។

វាអាចបង្កផលប៉ះពាល់ដល់ស្បូនខ្លាំងដូចជារលាក ឆ្លងមេរោគ ឬដំបៅក្លាយជាដើម។

វាក៏បង្កឲ្យគ្មានទឹកដោះផងដែរ។ ដោយសារសម្រាលដោយវះ សុកមិនត្រូវបានធ្លាក់ដោយធម្មជាតិទេគឺត្រូវយកចេញក្នុងពេលវះដែលធ្វើបាត់បង់ឈាមកាន់តែច្រើន។ ម្ដាយស្លេកស្លាំង ក្នុងអាទិត្យដំបូងហូបអីមិនបានឡើយដែលធ្វើឲ្យទ្រុឌទ្រោម ដុនដាប។ មួយវិញទៀតម្ដាយដែលសម្រាលកូនដោយវះកាត់ នៅពេលមានកូនលើកទី២ គឺមានគ្រោះថ្នាក់ប្រឈមខ្ពស់។