ហេតុអីមនុស្សស្រីខ្លាច មិនហ៊ានចាប់ផ្ដើមមុន ទាំងខ្លួនឯងជាអ្នកស្រឡាញ់គេ? សាកអានអត្ថបទនេះ

2018-06-25 05:30:00
ចំនួនមតិ 0 | ចំនួនចែករំលែក 0

ជាមនុស្សស្រីរឹងមាំ និងក្លាហានរស់ក្នុងសម័យទំនើបទៅហើយ ហេតុអីចាំបាច់សម្ងំចាំឲ្យគេរត់មករកយើងទាំងដែលយើងជាអ្នកចាប់អារម្មណ៍គេនោះ?

សុភមង្គលរបស់យើងគឺជាការចាប់ផ្ដើមដោយខ្លួនឯង កុំរង់ចាំនរណាម្នាក់នាំយកវាមកឲ្យអ្នកអី។ បើអ្នកចាប់អារម្មណ៍នឹងបុរសណាម្នាក់ហើយ កុំស្ទាក់ស្ទើរក្នុងការចាប់ផ្ដើមមុនអី ព្រោះមនុស្សស្រីក៏ជាមនុស្សដែរ ហេតុអីមិនអាចរត់ទៅរកអ្វីដែលខ្លួនចង់បាននោះ? ឬមួយក៏ត្រូវអង្គុយបើកភ្នែកឲ្យគេឆក់យកបាត់?

រូបតំណាង

បើអ្នកមិនបញ្ចេញសកម្មភាពអីនោះទេ អ្វីដែលអ្នកចង់បាននោះនឹងត្រូវបាត់បង់យ៉ាងស្ងៀមស្ងាត់បំផុត ហើយពេលនោះអ្នកយំក៏យំមិនចេញដែរ ព្រោះអ្នកខ្លួនឯងជាអ្នកធ្វើឲ្យខ្លួនឯងស្ដាយក្រោយ។

ហេតុអីមនុស្សស្រីគួរតែចាប់ផ្ដើមមុន នៅពេលលង់ស្រឡាញ់បុរសណាម្នាក់?

ចង់បានអី ត្រូវដើរទៅរករបស់នោះ

បើអ្នកស្រែកទឹក អ្នកប្រាកដណាស់ត្រូវដើរទៅរកទឹក ស្នេហាក៏ដូចគ្នា បើអ្នកស្រឡាញ់អ្នកណា អ្នកត្រូវដើរទៅរកម្នាក់នោះ។

រូបតំណាង

មានមនុស្សស្រីជាច្រើនបានដេកកើតទុក្ខ នៅមិនសុខព្រោះមិនព្រមធ្វើអីសោះ ក្រៅពីអង្គុយចាំគេមករក ទាំងដែលខ្លួនឯងជាអ្នកចង់បានគេសោះ។ នេះមកពីអ្នកខ្លាចខ្មាសអៀនហើយឲ្យបន្ទាបតម្លៃខ្លួនឯងទៅតាមពាក្យតៗគ្នារបស់គេ។

អ្នកខ្លាចគេថាអ្នកអន់ពេលអ្នកជាអ្នកចាប់ផ្ដើមមុន អ្នកខ្លាចគេថាជាមនុស្សស្រីចិត្តងាយ នៅពេលអ្នកចាប់ផ្ដើមមុន ប៉ុន្តែតើមនុស្សស្រីជាអ្វីទៅ? ហេតុអីគ្រាន់តែស្រឡាញ់មនុស្សម្នាក់ពិបាកយ៉ាងនេះ?

ហេតុអីអ្នកមិនប្ដូរគំនិតឲ្យល្អជាងនេះទៅ គិតថាមនុស្សស្រីដែលអាចចាប់ផ្ដើមក្នុងការដណ្ដើមអ្វីដែលខ្លួនចង់បាន គឺជាមនុស្សស្រីដែលអស្ចារ្យម្នាក់ ក្លាហានម្នាក់ និងរឹងមាំម្នាក់ ព្រោះនាងមិនមែនចាំតែទេវតាទម្លាក់មកដល់ដៃនាង។

មិនចំណាយពេលវេលាឆ្កួតតែឯងយូរ

បើមិនប្រាប់ បើមិនបង្ហាញសកម្មភាព ២០ ឆ្នាំទៀតក៏អ្នកគ្មានផ្លូវដែរ ហើយអ្នកនឹងត្រូវដេកឆ្កួតចិត្តតែឯង ខណៈគេគ្មានដឹងរឿងអីសោះ។

បើអ្នកមានសកម្មភាព ហើយគេមិនបានតបស្នងវិញនោះ អ្នកនឹងចំណេញពេល ព្រោះមិនចាំបាច់គិតតែឯងដូចមនុស្សឆ្កួតទៀត ហើយជំនួសមកវិញនៅការទន្ទឹងរង់ចាំគេ អ្នកអាចមានសង្ឃឹមទទួលបានគេ នៅពេលអ្នកចាប់ផ្ដើម។

រូបតំណាង

មនុស្សស្រីក៏ជាមនុស្សដែរ ដូច្នេះមិនចាំបាច់ឲ្យគេរត់មករកអ្នក ទាំងគេអត់ដឹងអីសោះទេ បើស្រឡាញ់គេចាប់ផ្ដើមទៅ។ ស្រឡាញ់មនុស្សម្នាក់អត់ខុសទេ ហើយអ្នកនឹងកាន់តែមានមោទនភាពលើខ្លួនឯង ព្រោះអ្នកជានារីក៏ក្លាហានម្នាក់ ដែលមិនសូវមាននារីណាអាចធ្វើបាន៕

ចុចអាន៖លង់ស្រឡាញ់គេខ្លាំង តែដឹងថាគ្មានសង្ឃឹមជួបគ្នា អ្នកអាចប្រើវិធីនេះដកខ្លួនបាន

អត្ថបទ៖ ផេង ផលធិតា