ភាពខុសគ្នារវាងមនុស្សល្អពិត និងមនុស្សផ្លែល្វា ល្អតែក្រៅ

2018-06-21 04:52:52
ចំនួនមតិ 0 | ចំនួនចែករំលែក 0

គ្រប់គ្នាប្រហែលជាធ្លាប់ជួបមនុស្សល្អតែពីមុខអ្នកតែក្រោយខ្នងស្អុយរលួយដូចជាផ្លែល្វា។ អំពើទាំងនោះមិនយូរមិនឆាប់គង់តែមានអ្នកដឹងព្រោះមនុស្សល្អពិតនិងមនុស្សល្អក្លែងក្លាយគឺមិនដូចគ្នាទេ។ ចង់ដឹងថាមនុស្សពីរប្រភេទនេះខុសគ្នាយ៉ាងម៉េច មានតែមើលចំណុចខាងក្រោមនេះ៖

១. គោរពមនុស្សគ្រប់គ្នា Vs មើលងាយមនុស្សគ្រប់គ្នា

មនុស្សល្អពិតតែងតែគោរពនិងឱ្យតម្លៃគ្រប់គ្នាជុំវិញខ្លួន។ រីឯមនុស្សលាក់ពុតវិញគោរពតែមនុស្សដែលមានអំណាចនិងមានផលប្រយោជន៍ឱ្យខ្លួន ហើយតែងតែមើលងាយអ្នកគ្រប់គ្នាហើយគិតថាគេមិនដល់ខ្លួន។

២. មិនងាយនឹងបញ្ចេញអារម្មណ៍ Vs ងាយលន់តួអង្វរ

មនុស្សល្អពិតមិនងាយនឹងលន់តួអ្នកណាឡើយ ទោះបីជាក្នុងកាលៈទេសៈណាក៏ដោយ។ គេចូលចិត្តធ្វើអ្វីដែលជាខ្លួនគេដោយមិនគិតពីសម្តីអ្នកដទៃ។ ចំណែកឯមនុស្សល្អលាក់ពុតវិញច្រើនតែខ្វាយខ្វល់ខ្លាចអ្នកដទៃមិនពេញចិត្តខ្លួន ហើយងាយនឹងលន់តួដើម្បីឱ្យគេអាណិតនិងចូលចិត្ត។

៣. ដាក់ខ្លួន Vs អួតអាង

មនុស្សគេល្អពិតមិនដែលនិយាយពីខ្លួនគេ ឬនិយាយពីអ្វីដែលគេមាននិងបានធ្វើនោះទេ។ គេតែងលាក់ទុកម្នាក់ឯង ហើយគិតថារឿងបែបនេះមិនចាំបាច់ប្រាប់ឱ្យគេដឹងទេ។ សម្រាប់មនុស្សល្អក្លែងក្លាយវិញតែងតែអួតប្រាប់គេពីអ្វីដែលខ្លួនមានពេលខ្លះលើសពីការពិត ដើម្បីឱ្យគេចាប់អារម្មណ៍។

៤. និយាយពីមុខ Vs និយាយពីក្រោយ

បើសិនជាមានអ្វីចង់និយាយមនុស្សល្អពិតច្រើននិយាយចំពីមុខដោយមិនលាក់បាំង។ គេអាចនឹងសំដីមិនល្អតែមនុស្សប្រភេទនេះនិយាយពីអ្វីដែលគេមាននៅក្នុងចិត្ត។ ប៉ុន្តែមនុស្សល្អផ្លែល្វាវិញច្រើនតែមានមុខពីរ នៅពីមុខអ្នកគេនិយាយល្អរហូតតែនៅពីក្រោយវិញគេមិនដែលនិយាយល្អនោះទេ។

៥. កាយវិការ Vs សម្តី

មនុស្សល្អពិតខិតខំប្រឹងប្រែងធ្វើឱ្យបានល្អបំផុតជាជាងចំណាយពេលនិយាយនិងសន្យាពីនេះពីនោះ។ រីឯមនុស្សបានតែមាត់គឺជាមនុស្សប្រភេទផ្លែល្វា គេចូលចិត្តសន្យាហើយធ្វើមិនបាននិងមានលេសមិនចេះចប់។

៦. សរសើរ Vs បង្អាប់

មនុស្សគេល្អពិតច្រើនតែសរសើរអ្នកដទៃពីអ្វីដែលគេទទួលបាន។ គេគិតថាគេមិនល្អគ្រប់គ្រាន់ និងត្រូវរៀនពីអ្នកដទៃដើម្បីអភិវឌ្ឍខ្លួន។ ចំណែកមនុស្សផ្លែល្វាតែងតែរិះគន់អ្នកដទៃ ហើយសប្បាយចិត្តពេលឃើញគេបរាជ័យ។