Janie បញ្ចេញរូបផ្អែមល្ហែមជាមួយអនាគតប្ដីក្មេងលើកទីមួយ ក្រោយធ្លាយដំណឹងរៀបការ

2018-06-11 08:09:50
ចំនួនមតិ 0 | ចំនួនចែករំលែក 0

រយៈពេលប្រហែលពីរសប្ដាហ៍កន្លងទៅ ព័ត៌មានលេចឮអំពីគម្រោងរៀបការរបស់តារាសម្ដែង Janie Tienphosuwan និងគូស្នេហ៍វ័យក្មេង Mickey អតីតប្រុសស្អាតក្នុងកម្មវិធី The Face បានល្បីសុសសាយតែម្ដងលើសារព័ត៌មាន និងបណ្ដាញសង្គមក្នុងប្រទេសថៃ។

ក្រោយពីលេចឮដំណឹងនេះ Janie មិនបានបដិសេធ ឬបកស្រាយអ្វីច្រើនឡើយ បើទោះជាមានអ្នកកាសែតជជែកសួរអំពីជីវិតស្នេហាថ្មីនេះយ៉ាងណាក្ដី ដោយគ្រាន់តែនិយាយថាពេលនេះខ្លួនមានក្ដីសុខចំពោះគ្រប់យ៉ាង ចំណែករឿងផ្សេងនោះគួរតែទៅសួរខាងប្រុសវិញល្អជាង ព្រោះនាងជាខាងស្រីមិនចង់និយាយអ្វីច្រើនទេ។

យ៉ាងណាមិញ នៅព្រឹកថ្ងៃច័ន្ទនេះ តារាសម្ដែងស្រីក្នុងរឿង “ភ្លើងបុណ្យ” បានបង្ហោះរូបគូជាមួយគូស្នេហ៍ខ្លួនលើកដំបូងបន្ទាប់ពីមានព័ត៌មានរៀបការនេះ។ មិនខុសពីសម្ដីដែលនាងបានផ្ដល់សម្ភាស រូបថតពីរសន្លឹកបានបង្ហាញពីស្នាមញញឹមយ៉ាងមានក្ដីសុខរបស់ តារាស្រីវ័យ ៣៦ឆ្នាំ និងគូស្នេហ៍វ័យ ២៤ឆ្នាំ។

ផ្អែកតាមប្រភពព័ត៌មាន តារាទាំងពីរដួង នឹងត្រូវចូលរោងការនៅថ្ងៃទី ១៨ ខែតុលា ឆ្នាំ២០១៨នេះ។ គួរបញ្ជាក់ថា តារាសម្ដែង Janie ធ្លាប់រៀបការម្ដងហើយកាលពីឆ្នាំ២០១៣ ជាមួយស្វាមីវ័យចាស់ជាងខ្លួន ១៣ឆ្នាំ ប៉ុន្តែក៏បានលែងលះវិញក្រោយរៀបការបានមួយឆ្នាំ ៕