Liu Yifei ត្រូវតារាស្រករក្រោយ Dilraba វ៉ាមុខ ធ្លាក់ខ្លួនជាតារាសម្ដែងដែលមានតម្លៃខ្លួនលំដាប់ B
- 2018-05-22 03:05:26
- ចំនួនមតិ 0 | ចំនួនចែករំលែក 0
Liu Yifei ត្រូវតារាស្រករក្រោយ Dilraba វ៉ាមុខ ធ្លាក់ខ្លួនជាតារាសម្ដែងដែលមានតម្លៃខ្លួនលំដាប់ B
តារាងតម្លៃខ្លួនរបស់តារាសម្ដែងស្រីល្បីឈ្មោះថ្មីបានបង្ហាញឲ្យឃើញថា ទោះបីជាមានកេរ្តិ៍ឈ្មោះជាតារាលំដាប់ A ក្ដី តែតារាសម្ដែងស្រី Liu Yifei ទទួលបានតម្លៃខ្លួនត្រឹមជាលំដាប់ B ប៉ុណ្ណោះ ចាញ់ទាំងតារាស្រករក្រោយផង។
មុននេះបន្តិច បណ្ដាញព័ត៌មានហុងកុងទើបតែបញ្ចេញតារាងតម្លៃខ្លួនរបស់តារាសម្ដែងស្រីដែលស៊ីថ្លៃខ្ពស់បំផុតរបស់ចិន។ នៅក្នុងតារាងនេះ សិល្បការិនីទាំងនេះត្រូវបានបែងចែកចេញជា៣លំដាប់គឺ A, B, និង C។
សម្រាប់តារាស្រីដែលស្ថិតក្នុងលំដាប់ A គឺទទួលបានតម្លៃខ្លួន៨០លានយាន់ (១២,៥លានដុល្លារ) សម្រាប់រឿងមួយ។ ស្រីស្អាតដែលមានឈ្មោះក្នុងតារាងនេះរួមមាន៖ Angelababy, Yang Mi, Fan Bingbing, Zhao li Ying, Sun Li, Zhang Yi Zi និង Dilraba។
សម្រាប់តារាស្រីដែលស្ថិតក្នុងលំដាប់ B ទទួលបាន៧០លានយាន់ (១១លានដុល្លារ) សម្រាប់រឿងមួយ។ អ្នកដែលស្ថិតក្នុងលំដាប់នេះរួមមាន៖ Liu Shishi, Liu Yifei, Liu Tao, Guan Xiaotong និង Coulee Nazha។ រីឯអ្នកដែលស្ថិតនៅក្នុងលំដាប់ C ទទួលបាន ៦០លានយាន់ (៩,៥លានដុល្លារ) សម្រាប់រឿងមួយ។
អ្វីដែលធ្វើឲ្យអ្នកគាំទ្រភ្ញាក់ផ្អើលនោះគឺ ច្រើនឆ្នាំមកនេះ កេរ្តិ៍ឈ្មោះរបស់ សៀវ ឡុងនី Liu Yifei តែងតែត្រូវបានគេចាត់ទុកថាជាតារាជួរមុខជានិច្ច តែពេលនេះបែរជាចាញ់ តារាទើបឡើង Dilraba ទៅវិញ។ យ៉ាងណាក្ដី ទស្សនិកជនបានបញ្ចេញមតិថា ទោះបីជាមានឈ្មោះល្បីខ្លាំងក្ដី តែរាល់ភាពយន្តរបស់ ស្រីស្អាតត្រកូល Liu មិនទាក់ទាញអ្នកមើលច្រើន ដែលជាមូលហេតុនាំឲ្យមានរឿងដូចនេះ៕