គន្លឹះស្លៀកពាក់សម្រាប់នារីទៅដើរលេងសមុទ្រ បានទាំងស្អាត ទាំងស្រួលខ្លួន

2018-05-14 05:13:31
ចំនួនមតិ 0 | ចំនួនចែករំលែក 0

ពេលឈប់សម្រាកច្រើនថ្ងៃបែបនេះ កន្លែងដែលគួរនឹកឃើញមុនគេសម្រាប់ទៅលំហែ គឺមាត់សមុទ្រ។ ជាមួយខ្សាច់សក្បុស ផ្ទៃមេឃខៀវស្រងាត់ ពន្លឺព្រះអាទិត្យលឿងឆ្អិនឆ្អៅ បូករួមជាមួយក្លិនសារ៉ាយបក់ពីក្នុងសមុទ្រមក គឺជាក្ដីសុខមួយដែលគ្រប់គ្នាបិទភ្នែកទទួលយកទាំងញញឹមមិនដឹងខ្លួន។ បើអ្នកកំពុងរៀបគម្រោងទៅលេងសមុទ្រ ខាងក្រោមនេះអាចជាគន្លឹះមួយចំនួនដើម្បីនារីៗស្លៀកពាក់បានសក្ដិសមផង និងស្រួលខ្លួនផង។

រ៉ូបសាច់ទន់ៗ ពណ៌ស ឬផ្កាចម្រុះ

រ៉ូបសាច់ទន់ដូចជា សារូ ឬសាច់ក្រណាត់ដែលមានផ្កាចម្រុះគឺស៊ីគ្នាឥតខ្ចោះសម្រាប់ទេសភាពមាត់សមុទ្រ។ ចំណែករ៉ូបពណ៌គួរជ្រើសពណ៌សដើម្បីមើលទៅសក្ដិសមនឹងខ្សាច់ពណ៌ស ហើយអាចលើកសាច់ឱ្យឃើញភ្លឺថ្លាទៀតផង។ ជាមួយរ៉ូបទាំងនេះ អ្នកអាចប្រើស្បែកជើងផ្ទាត់ ស្បែកជើងចម្ពាមក្រវាត់ក្រោយ ឬស្បែកជើងប៉ាតាក៏បាន។

ខោខ្លីជាមួយអាវរលុងៗ

បើអ្នកចូលចិត្តស្លៀកខោ មិនគួរស្លៀកខោវែង ឬរឹបទេ ព្រោះវាធ្វើឱ្យស្បែកក្ដៅ និងគ្មានផាសុកភាព។ គួរជ្រើសរើសខោខ្លីរលុងៗវិញ ជាមួយនឹងអាវសសាច់ក្រណាត់រលុងដែរ ឬអាវសំយេះស្មាក៏បាន។ ក្រៅពីសម្លៀកបំពាក់ អ្នកមិនគួរភ្លេចមួកឆាងម៉ាង និងវ៉ែនតាការពារកម្ដៅថ្ងៃធំៗផងណា៎!