លែងរអ៊ូរឿងអស់ភ្លើងច្រើន! នារីវៃឆ្លាត ដឹងវិធីសន្សំសំចៃថ្លៃភ្លើង ដោយវិធីទាំងនេះ
- 2018-04-21 01:59:17
- ចំនួនមតិ 0 | ចំនួនចែករំលែក 0
លែងរអ៊ូរឿងអស់ភ្លើងច្រើន! នារីវៃឆ្លាត ដឹងវិធីសន្សំសំចៃថ្លៃភ្លើង ដោយវិធីទាំងនេះ
ការចំណាយលើថ្លៃអគ្គិសនីគឺជាការលំបាកមួយក្នុងចំណោមការលំបាកផ្សេងទៀតរបស់គ្រួសារ។ ដូច្នេះហើយ នារីដែលជាភរិយា ឬកូនស្រីវៃឆ្លាតគួរដឹងពីវិធីសន្សំសំចៃការប្រើប្រាស់ថាមពលទាំងនោះ ជាពិសេសសម្រាប់ឧបករណ៍អេឡិចត្រូនិចមួយចំនួនមិនគួរដោតចោល២៤ម៉ោងទេ ព្រោះក្រៅពីអាចសន្សំសំចៃថ្លៃភ្លើង វាក៏អាចជួយអ្នកឱ្យចៀសផុតពីគ្រោះថ្នាក់ដោយអគ្គិភ័យបានដែរ។
Laptop
បើកាលណាបញ្ចូលថ្មពេញហើយ គួរដកឌុយចេញពីព្រីភ្លើង ព្រោះវានឹងស៊ីភ្លើងតិចឬច្រើនអាស្រ័យទៅតាមម៉ូដែល Laptop។
ដុំ Wi-Fi
បើអ្នកភ្ជាប់អ៊ីនធឺណិតនៅផ្ទះ អ្នកច្បាស់ជាត្រូវប្រើដុំនេះមិនខាន ហើយវានឹងស៊ីភ្លើងរហូតពេញ២៤ម៉ោង។ ដូច្នេះបើអ្នកមិននៅផ្ទះ ឬពេលយប់គេង គួរតែដកឌុយវាចេញ ដើម្បីអាចសន្សំសំចៃថ្លៃភ្លើងបានខ្លះ។
ប្រដាប់ប្រដាផ្ទះបាយ
ប្រដាប់ប្រដាដូចជា ឆ្នាំដាំបាយ ម៉ាស៊ីនក្រឡុក ប្រដាប់កៀបនំប៉័ង ម៉ាស៊ីនកម្ដៅម្ហូប មិនគួរដោតឌុយចោលរហូតទេ គួរដកចេញក្រោយប្រើរួច។ ទោះបីវាមិនសូវស៊ីភ្លើងដូចឧបករណ៍ដទៃ តែវាអាចបណ្ដាលឱ្យមានអគ្គិភ័យបានដោយប្រការណាមួយ។
ទូរទស្សន៍
ចំណុចនេះ មានមនុស្សតិចណាស់ដែលសុខចិត្តដកឌុយទូរទស្សន៍ចេញ ក្រោយមើលរឿងចប់។ ប៉ុន្តែអ្នកមានដឹងទេថា ឧបករណ៍អេឡិចត្រូនិកប្រភេទនេះ ស៊ីភ្លើងខ្លាំងណាស់ ទោះបីអ្នកចុចបិទវាក៏ដោយ។
ក្រៅពីនេះនៅមានវិធីមួយចំនួនខាងក្រោមទៀតនឹងជួយអ្នកឱ្យប្រើភ្លើងអស់តិច កាត់ថ្លៃចំណាយបានច្រើន៖
បើអ្នកដាក់ម្ហូបក្នុងទូរទឹកកកពេញ វានឹងជួយកាត់បន្ថយថាមពលភ្លើង ជួយឱ្យម្ហូបក្នុងនោះត្រជាក់បានយូរ
ចៀសវាងដាក់ម្ហូបក្ដៅក្នុងទូរទឹកកក ព្រោះវានឹងចូលទៅបញ្ឈប់សីតុណ្ហភាពក្នុងទូរ មិនឱ្យឡើងត្រជាក់
គួរប្រើកង្ហារដែលស្វានជាប់ពិតាន ឬជាប់ជញ្ជាំង ដើម្បីកាត់បន្ថយការប្រើម៉ាស៊ីនត្រជាក់ ព្រោះកង្ហារទាំងនោះស៊ីភ្លើងតិចជាង
ខោអាវដែលបោករួច ត្រូវយកមកហាលក្រោមកម្ដៅថ្ងៃ ព្យាយាមកាត់បន្ថយការប្រើវិធីសម្ងួតដោយម៉ាស៊ីន
ឧស្សាហ៍ហៅជាងមកសម្អាតម៉ាស៊ីនត្រជាក់ហោចណាស់ម្ដងក្នុងមួយឆ្នាំ។ វាអាចជួយឱ្យម៉ាស៊ីនដើរបានល្អ និងមិនប្រើភ្លើងច្រើន៕