ប្រយ័ត្ន! នារីម្នាក់ប៊ិះដាច់សរសៃឈាមខួរក្បាល ព្រោះប្រើទូរសព្ទ២០ម៉ោងជាប់គ្នា

2018-03-21 08:19:59
ចំនួនមតិ 0 | ចំនួនចែករំលែក 0

ប្រភពពីវិបសាយ Asiaone បានរាយការណ៍ថា កាលពីពេលថ្មីៗនេះ នារីម្នាក់ត្រូវទទួលការវះកាត់ខួរក្បាលភ្លាមៗ ក្រោយរកឃើញថាមានដុំឈាមកកក្នុងខួរក្បាល។

នារីម្នាក់នៅប្រទេសចិនបានអង្គុយចុចទូរសព្ទប្រហែល២០ម៉ោងជាប់គ្នា ក្នុងពេលកំពុងធ្វើដំណើរតាមរថភ្លើង ពីខេត្ត Henan ទៅ Guangzhou។ ក្នុងពេលអង្គុយក្នុងរថភ្លើង នាងគិតតែពីឈ្ងោកមើលទូរសព្ទដោយមិនកម្រើក ឬងើបដើរទៅណាឡើយ។ លុះមកដល់ចំណត ជនរងគ្រោះស្រាប់តែអស់កម្លាំងងើបដើរលែងរួច ហើយក៏ត្រូវបានបញ្ជូនមកមន្ទីរពេទ្យសាកលវិទ្យាល័យ Jinan ភ្លាមដើម្បីសង្គ្រោះបន្ទាន់។

តាមការពិនិត្យ ក្រុមគ្រូពេទ្យបានរកឃើញថា នារីរងគ្រោះមានសញ្ញាណនៃជំងឺដាច់សរសៃខួរក្បាល ដោយសារតែរោគសញ្ញាមួយចំនួនគួរឱ្យកត់សម្គាល់ដូចជា និយាយមិនចេញ វង្វេងវង្វាន់ និងកម្រើកមិនបាន។ ក្រោយធ្វើ CT scan និង MRI រួច គ្រូពេទ្យក៏បានរកឃើញថាមានដុំឈាមកកនៅផ្នែកខាងឆ្វេងខួរក្បាលរបស់នាង។ ការវះកាត់ត្រូវធ្វើឡើងភ្លាមៗ ដើម្បីជួយសង្គ្រោះជីវិតនារីរងគ្រោះ ហើយបន្ទាប់ពីចំណាយពេលអស់៣ម៉ោង ដុំឈាមកកទំហំ២ស.ម ក៏ត្រូវបានយកចេញបានសម្រេច។

លោកវេជ្ជបណ្ឌិត Meng អនុប្រធានដេប៉ាត់ម៉ង់ប្រសាទសាស្ត្រនៃមន្ទីរពេទ្យសាកលវិទ្យាល័យ Jinan បានឱ្យដឹងថា នារីខាងលើមានដុំឈាមកកក្នុងខួរក្បាលច្រើនជាង២ដុំឯណោះ។ ស្ថានភាពសុខភាពរបស់នាងពីដើមឡើយ គឺមានសភាពធម្មតា និងមិនដែលមានប្រវត្តិដាច់សរសៃឈាមពីមុនមកឡើយ។

លោកដុកទ័របានព្រមានថា ការឈ្ងោកក្បាលឱនមើលទូរសព្ទយូរនឹងបណ្ដាលឱ្យសរសៃឈាមនៃត្រង់កទៅជាស្ទះ។ ហេតុនេះហើយ បើបន្តយូរទៀត វានឹងទៅជាការកកសរសៃឈាម។ គ្រូពេទ្យជាច្រើនទៀតក៏បានផ្ដល់ការសន្និដ្ឋានស្រដៀងគ្នានេះដែរថា បច្ចុប្បន្ននេះមនុស្សវ័យក្មេងដែលកើតជំងឺដាច់សរសៃឈាមមានការកើនឡើងៗ ដោយសារតែការប្រើទូរសព្ទយូរៗ ។ ដូច្នេះក្នុងពេលប្រើទូរសព្ទត្រូវរកកន្លែងអង្គុយ ឬសម្រួលឥរិយាបថឱ្យបានស្រួលដើម្បីសម្រួលសរសៃឈាមកុំឱ្យស្ទះ៕

ប្រភព៖ Asiaone ប្រែសម្រួល៖ សរ សុគន្ធី