រឿងគួរធ្វើ និងមិនគួរធ្វើ ក្នុងរដូវក្តៅនេះ
- 2024-04-03 08:07:08
- ចំនួនមតិ 0 | ចំនួនចែករំលែក 0
រឿងគួរធ្វើ និងមិនគួរធ្វើ ក្នុងរដូវក្តៅនេះ
រដូវក្តៅនេះ អ្នកអាចនឹងទទួលបានការពិបាកក្នុងខ្លួនបំផុតហើយក៏មានអារម្មណ៍ច្របូកច្របល់ចូលគ្នារវាងរឿងដែលគួរធ្វើ និងរឿងដែលមិនគួរធ្វើ។ បានណែនាំខ្លះៗទាក់ទងនឹងរដូវក្តៅ តើគួរធ្វើអ្វី និងមិនគួរធ្វើអ្វី ខាងក្រោម៖
**១-អ្វីដែលអ្នកគួរធ្វើ **
* ពិនិត្យពណ៌នៃទឹកនោម ត្រូវសង្កេតទៅលើពណ៌នៃទឹកនោម ហើយត្រូវប្រាកដថាទឹកនោមថ្លា តែប្រសិនក្នុងករណីពណ៌ទឹកនោមលឿងល្អក់នោះបញ្ជាក់ថាអ្នកកំពុងជួបបញ្ហាកង្វះជាតិទឹក ហេតុនេះគួរពិសាទឹកឲ្យបានច្រើន និងពិភាក្សាជាមួយគ្រូពេទ្យដើម្បីដឹងពីអាការៈកាន់តែច្បាស់។
ប្រយ័ត្នប្រយែងចំពោះអាហារ រដូវក្តៅ ជារដូវដែលអ្នកត្រូវតែប្រយ័ត្នចំពោះចំណីអាហារព្រោះមេរោគងាយនឹងឆ្លងចូលអាហារ។ត្រូវប្រាកដថាអាហារចម្អិនឲ្យបានល្អ ទុកដាក់បានត្រឹមត្រូវ និងចៀសវាងអាហារផ្អាប មិនស្អាតហើយងាកមកបរិភោគបន្លែ ផ្លែឈើដែលសម្បូរសារធាតុទឹក ដើម្បីឲ្យខ្លួនប្រាណទទួលបានជាតិទឹកគ្រប់គ្រាន់។
ងូតទឹកយ៉ាងហោចណាស់ឲ្យបានពីរ-បីដង ប្រសិនជាអាច អ្នកងូតទឹកយ៉ាងហោចណាស់ឲ្យបាន២-3ដង ព្រោះមិនត្រឹមតែធ្វើឲ្យស្បែកមានសភាពត្រជាក់ទេ ជួយ ការពារការឆ្លងមេរោគដែលបង្កមកពីបរិយាកាសដ៏ក្តៅអាប់អួរផងដែរ។
លាបឡេការពារកម្តៅថ្ងៃ មិនថាអ្នកមិនទម្លាប់លាបយ៉ាងណានោះទេ ចូលដល់រដូវក្តៅបែបនេះត្រូវតែលាបឡេការពារកម្តៅថ្ងៃ ព្រោះកម្តៅខ្លាំងបែបនេះអាចបង្កជាផលវិបាកដល់ស្បែក ហើយអាចបង្កទៅជាមហារីកស្បែក។ បន្ថែមលើសនេះបើមានបញ្ហារលាកស្បែកដោយសារកម្តៅ ផលិតផលប្រទាលកន្ទុយក្រពើអាចបន្ថយអាការៈរលាកបានយ៉ាងល្អ។
**២-អ្វីដែលអ្នកមិនគួរធ្វើ **
មិនត្រូវញុំាអាហារដែលសល់ឬផ្អាប់ អាកាសធាតុក្តៅ ស្អុះស្អាប់ អាហារងាយនឹងជូរ ផ្អូម ប្រសិនបើអ្នកមិនបានទុកដាក់អាហារបានត្រឹមត្រូវ ហើយងាយនឹងឆ្លងជំងឺ ដូចជារាករូស ឬបញ្ហាពោះវៀនជាដើម។
ជៀសអាហារដែលសម្បូរជាតិខ្លាញ់ អាហារចៀន បំពង សុទ្ធតែបង្កផលមិនល្អទៅដល់សុខភាព ។លោកអ្នកគប្បីងាកមកបរិភោគបន្លែផ្លែឈើសំបូរជាតិទឹកឲ្យបានកាន់តែច្រើន។
កុំនៅក្រោមកម្តៅថ្ងៃផ្ទាល់ កុំស្ថិតនៅក្រោមកម្តៅថ្ងៃយូរពេក ព្រោះក្តៅផង ត្រជាក់ផងងាយនឹងឈឺខ្លាំងណាស់។ ពេលចេញទៅក្រៅព្យាយាមពាក់អាវដៃវែង មួក ឆ័ត្រ ឬវ៉ែនតាការពារដើម្បីការពារខ្លួនអ្នកពីកម្តៅផ្ទាល់។
ស្លៀកខោអាវក្រាស់ៗពេក កុំព្យាយាមស្លៀកពាក់ខោអាវក្រាស់ៗ ព្រោះវាអាចធ្វើឲ្យលោកអ្នកកាន់តែអស់ថាមពលដោយសារតែការបែកញើសច្រើនហួសហេតុក្រោមអាកាសធាតុហប់ខ្យល់ អាចធ្វើឲ្យអ្នកឈានដល់ការបាត់បង់ស្មារតីឬសន្លប់បាន។
បន្ទាប់ពីធ្វើការអស់រយៈពេលជាច្រើនម៉ោងហើយនោះ គប្បីសម្រាក និងហូបអាហារ និងទឹកឲ្យបានគ្រប់គ្រាន់ មិនត្រូវបង្ខំបង្ហើយការងារទាំងដឹងថាខ្លួនឯងមិនស្រួលខ្លួននោះទេ ព្រោះលោកអ្នកត្រូវចាំថាសុខភាពជាចម្បង ហើយការពារប្រសើរជាងព្យាបាល។ រដូវក្តៅដូចជាយូរគួរសមដែរ ដូចនេះកុំប្រហែសចំពោះរឿងដែលអ្នកគួរ និងមិនគួរធ្វើនោះ ប្រយ័ត្នប៉ះពាល់ដល់អាយុជីវិតបាន។