គន្លឹះប្រើថ្នាំបញ្ចុះកម្ដៅឲ្យបានត្រឹមត្រូវកុំឲ្យកូនតូចពុលថ្លើម
- 2023-12-03 02:39:58
- ចំនួនមតិ 0 | ចំនួនចែករំលែក 0
គន្លឹះប្រើថ្នាំបញ្ចុះកម្ដៅឲ្យបានត្រឹមត្រូវកុំឲ្យកូនតូចពុលថ្លើម
ការប្រើប្រាស់ថ្នាំបញ្ចុះកម្ដៅ អាចធ្វើឲ្យកូនប្រឈមនឹងបញ្ហាពុលថ្លើមបើសិនជាប៉ាម៉ាក់ឲ្យកូនលេបមិនបានត្រឹមត្រូវ។ លោកវេជ្ជបណ្ឌិត សយ បញ្ញា ឯកទេសកុមារ និងទារក នៃមន្ទីរសម្ភពរ៉ូៃ មានប្រសាសន៍ថាការផ្ដល់ថ្នាំបញ្ចុះកម្ដៅឲ្យកូនត្រូវមានគម្លាតយ៉ាងតិចប្រាំមួយម៉ោង និងត្រូវញ៉ាំឲ្យបានត្រឹមត្រូវតាមទម្ងន់ខ្លួនរបស់កូន។
លោកពន្យល់ថាក្នុងករណីកូនញ៉ាំថ្នាំមិនទាន់បានគ្រប់ប្រាំមួយម៉ោងគិតពីការលេបលើកទីមួយ ហើយកូនចាប់ផ្ដើមក្ដៅខ្លួនឡើងវិញ ក៏មិនគួរផ្ដល់ថ្នាំឲ្យកូនទៀតដែរត្រូវរង់ចាំដល់គ្រប់ប្រាំមួយម៉ោងសិន។ ប៉ុន្តែលោកវេជ្ជបណ្ឌិតថាប៉ាម៉ាក់អាចឲ្យកូនងូតទឹកក្ដៅឧណ្ហៗ ឬប្រើកន្សែងសើមជូតខ្លួនឲ្យកូនដើម្បីបញ្ចុះកម្ដៅសិនបាន។
លោកបន្ថែមថា៖ «ដើម្បីការពារ កាត់បន្ថយកុំឲ្យកុមារវិវត្តទៅមានអាការៈជាពុលថ្លើមក្នុងករណីយើងញ៉ាំថ្នាំប៉ារ៉ាសេតាម៉ុល ឪពុកម្ដាយត្រូវចងចាំថា ទីមួយផ្ដល់ថ្នាំប៉ារ៉ាសេតាម៉ុលយើងត្រូវផ្អែកទៅលើគីឡូកូន មិនផ្អែកលើអាយុរបស់គាត់ទេ ជាទូទៅគ្រូពេទ្យផ្នែករោគកុមារចេញវេជ្ជបញ្ជា ឲ្យប្រើប្រាស់ថ្នាំទៅតាមគីឡូរបស់គាត់ ទីពីរត្រូវចាំថាយើងអាចផ្ដល់គម្លាតពីការផ្ដល់លើកទី១ទៅលើកទី២ហោចណាស់ឲ្យបានប្រាំមួយម៉ោងឲ្យថ្នាំហ្នឹងចេញអស់ពីក្នុងខ្លួនសិន មុននឹងយើងញ៉ាំលើកទីពីរ»។
លោកវេជ្ជបណ្ឌិតបានណែនាំទៀតថាការផ្ដល់ថ្នាំប៉ារ៉ាសេតាម៉ុលឲ្យកូនគឺធ្វើឡើងតែពេលកូនក្ដៅខ្លួន មិនចាំបាច់ឲ្យលេបស្កាត់មុននោះទេ។ លោកបន្តថា៖ «គឺពេលគាត់ក្ដៅខ្លួនលើសពី៣៨អង្សាយើងអាចផ្ដល់ថ្នាំហ្នឹងឲ្យគាត់ដើម្បីបញ្ចុះកម្ដៅ»។
លោកវេជ្ជបណ្ឌិតថាប៉ាម៉ាក់គួរមានចំណេះដឹងខ្លះៗពីការប្រើប្រាស់ថ្នាំប៉ារ៉ាសេតាម៉ុលនេះ ប៉ុន្តែលោកវេជ្ជបណ្ឌិតក៏បានណែនាំដែរថា គ្រប់ករណីដែលកូនក្ដៅខ្លួនត្រូវនាំកូនទៅពិគ្រោះជាមួយគ្រូពេទ្យ ពិសេសគ្រូពេទ្យរោគកុមារអាចធ្វើរោគវិនិច្ឆ័យរកមូលហេតុនៃអាការៈក្ដៅខ្លួនបានត្រឹមត្រូវ និងព្យាបាលបានទាន់ពេលវេលា។
ស្វែងយល់បន្ថែមចុចទីនេះ ស្ដាប់ការបកស្រាយផ្ទាល់!