បញ្ហាទល់លាមក ជាបញ្ហាដែលកើតឡើងលើមនុស្សគ្រប់រូប និងគ្រប់វ័យ។ វាជាបញ្ហាដែលអ្នកជំងឺ តែងតែគិតថាគ្រាន់តែជារឿងធម្មតាប៉ុណ្ណោះ ក៏ប៉ុន្តែការពិតដែលនៅពីខាងក្រោយបញ្ហាមួយនេះគឺមានកត្តា និងមូលហេតុជាច្រើនទៀត។​

ក្នុងករណីខ្លះ ជំងឺនេះត្រូវទាមទារឲ្យមានការពិគ្រោះ និងពិនិត្យស្វែងរកឫសគល់ ដែលបង្កឲ្យមានជាជំងឺនេះកើតឡើងមកបាន តាមរយៈការឆ្លុះក្រពះ និងពោះវៀនធំ ការធ្វើអេកូ និងថតScanner ពោះ និងការធ្វើតេស្តឈាមជាដើម។

ថ្ងៃនេះ កញ្ញានឹងលើកយកបញ្ហាទល់លាមករ៉ាំរ៉ៃ មកបកស្រាយឲ្យអ្នកទាំងអស់គ្នាដឹងពីមូលហេតុបង្ក និងផលវិបាកនៃជំងឺនេះ។

ការទល់លាមក ឬ ការពិបាកបន្ទោរបង់ គឺជាបញ្ហាដែលមនុស្សជាច្រើនតែងតែបានជួបប្រទះនៅក្នុងជីវិតរស់នៅប្រចាំថ្ងៃស្ទើរគ្រប់ៗគ្នា ។ បញ្ហាមួយនេះអាចជាការរំខានដល់សុខភាពទាំងផ្លូវកាយ និងផ្នែកអារម្មណ៍ផងដែរ ។

មូលហេតុដែលអាចបង្កឲ្យមានបញ្ហាទល់លាមកនេះកើតឡើង មានដូចជា៖

• បរិភោគអាហារដែលខ្វះជាតិសរសៃ Fiber
• ផឹកទឹកមិនបានគ្រប់គ្រាន់
• បាត់បង់តុល្យភាពនៃមេរោគល្អ
• ថ្នាំពេទ្យមួយចំនួន
• ញ៉ាំថ្នាំដែលផ្ទុកជាតិកាល់ស្យូម និងជាតិដែក
• ការទទួលទានទឹកដោះគោច្រើនពេក
• ការទទួលទានស្ករច្រើនពេក
• ការពិបាកចិត្ត ការគិតច្រើន
• ខ្វះលំហាត់ប្រាណ
• ញ៉ាំថ្នាំបញ្ចុះច្រើនពេក

តើជំងឺទល់លាមកមានផលវិបាកអ្វីខ្លះ?

ជំងឺទល់លាមកអាចបង្កឲ្យមានផលវិបាកដូចខាងក្រោម៖

• អាចបង្កទៅជាជំងឺឫសដូងបាទ
• អាចធ្វើឲ្យដាច់រហែកភ្នាសរបស់បាត និងបង្កជាការធ្លាក់ឈាម និងមានការឈឺចាប់ពេលបន្ទោរបង់
• បើសិនបើការទល់លាមកនេះក្លាយជារ៉ាំរ៉ៃយូរ វាក៏អាចបណ្តាលឲ្យក្លាយជាបញ្ហាខ្សោយពោះវៀនធំ និងជាការប្រឈមមុខទៅនឹងជំងឺមហារីកពោះវៀនធំផងដែរ ។

តើគួរបរិភោគអាហារប្រភេទណាដើម្បីកាត់បន្ថយ ​និងជួយសម្រួលដល់ការទល់លាមក?

មានអាហារមួយចំនួនដែលអាចជួយសម្រួលដល់ការទល់លាមក។ ប្រភេទអាហារទាំងនោះមាន៖

• គ្រាប់ធញ្ញជាតិ
• បន្លែផ្លែឈើស្រស់
• នំប័ុងស្រូវសាលី ប៉ាស្តាជាដើម។ ក្រៅពីនេះដើម្បីកាត់បន្ថយហានិភ័យនៃការកើតជំងឺទល់លាមក យើងគប្បីកែប្រែរបៀបរស់នៅប្រចាំថ្ងៃ ដោយកាត់បន្ថយស្រ្តេស និងការគិតរឿងពិបាកចិត្តច្រើន និងទទួលទានរបបអាហារត្រឹមត្រូវ ព្រមទាំងធ្វើលំហាត់ប្រាណជាប្រចាំ។

ក្នុងករណីធ្ងន់ធ្ងរដូចជា ការទល់លាមកលើសពី២ថ្ងៃឡើងទៅ មានការស្រកចុះទង្ងន់លឿន និងខុសពីធម្មតា មានការស្លេកស្លាំង មានការធ្លាក់ឈាមពេលបន្ទោរបង់ និងមានការឈឺចុកចាប់ក្នុងពោះរ៉ាំរ៉ៃ គប្បីពិគ្រោះ និងពិនិត្យព្យាបាលជាមួយវេជ្ជបណ្ឌិតឯកទេសជំនាញឲ្យបានទាន់ពេលវេលា។