អ្នកឧស្សាហ៍ចូលគេងយប់ជ្រៅ គួរទម្លាប់ថែស្បែកមុខដោយវិធីទាំងនេះ

2022-05-12 06:45:00
ចំនួនមតិ 0 | ចំនួនចែករំលែក 0

សម្រាប់អ្នកដែលតែងចូលគេងយប់ជ្រៅ គប្បីមានទម្លាប់ថែរក្សាស្បែកមុខដោយវិធីទាំងនេះ។ ដោយសារតែការចូលគេងយប់ជ្រៅពេក ធ្វើឲ្យមុខឆាប់ចាស់ និងសសម្រស់ងាយធ្លាក់ចុះបំផុត។

១. ប្រើប្រភេទម៉ាសផ្តល់សំណើម

ពេលនៅយប់ៗពេក សមត្ថភាពស្បែកពិបាកនឹងស្រូបយកជាតិសិណើមណាស់ ដែលជាហេតុអ្នកត្រូវស្វែងរកវិធីល្អបំផុតឲ្យទាន់ពេលវេលាដើម្បីបំពេញជាតិទឹកដល់ស្បែក។ អ្នកគួរបិទម៉ាសប្រភេទមានជាតិទឹកច្រើន ឬ Sleeping Mask រួចម៉ាស្សាមុខដើម្បីជម្រុញចរាចរណ៍ឈាមលើស្បែកមុខ។

២. រៀបចំរបបអាហាររបស់អ្នក

អ្នកគួរញ៉ាំការ៉ុត ព្រោះមានផ្ទុកសារធាតុ Pectin ដែលជួយកម្ចាត់សារធាតុគ្រោះថ្នាក់បានលឿន។ លើសពីនេះ សារធាតុប្រឆាំងអុកស៊ីតកម្ម រ៉ាឌីកាល់សេរី ក៏ត្រូវបានគេរកឃើញផងដែរក្នងបន្លែនេះ ក្នុងការទប់ស្កាត់ភាពចាស់ រួមទាំងជួយឲ្យឲ្យស្បែកសភ្លឺថ្លាបាន។ ក្រៅពីនេះ អ្នកគួរញ៉ាំផ្លែត្រសក់ ដែលផ្ទុកអាមីណូអាស៊ីដ ជួយស្បែកលូតលាស់ ពង្រឹងសាច់ដុំ ទប់ទល់នឹងភាពចាស់ កាត់បន្ថយស្នាមជ្រួញ។

មិនទាន់អស់ទេ អ្នកក៏គួរផឹកទឹកក្រូចឆ្មាផងដែរ ព្រោះសម្បូរវីតាមីន B1, B2, សិរីរាង្គអាស៊ីដ អាស៊ីដស៊ីទ្រិច ដែលជួយស្បែកឲ្យសភ្លឺថ្លាស្មើគ្នា និងពន្យារភាពចាស់បានទៀតផង។

៣. លាងសម្អាតស្បែក

ប្រសិនបើស្បែកមានធាតុកខ្វក់ច្រើន វានឹងធ្វើឲ្យរន្ធញើសស្ទះ ដែលជាហេតុស្បែកមិនស្រស់ស្អាត។ ប្រសិនបើអ្នកចង់នៅយប់ៗ តែស្បែកនៅស្រស់ស្អាតដដែរ រឿងសំខាន់គឺអ្នកត្រូវលាងសម្អាតគ្រឿង Makeup ចេញ។ មិនថាទឹកត្រជាក់ ឬទឹកក្តៅ គួរតែយកមកលាងសម្អាតមុខ ព្រោះវាជួយជម្រុញចរន្តឈាមលើស្បែកមុខ កាត់បន្ថយជាតិពុលនិងកាកសំណល់លើស្បែកមុខបាន។

៤. ម៉ាស្សាមុខ

ការម៉ាស្សាគឺជាជំហានសំខាន់បំផុតសម្រាប់មនុស្សស្រី ។ ត្រូវចាំថា ប្រសិនបើអ្នកមិនចង់ឲ្យស្បែកមុខខ្មៅស្រអាប់ដោយសារតែចូលគេងយប់ពេកនោះទេ អ្នកគួរតែរៀនថែទាំស្បែកឲ្យបានដឹតដល់។ អ្នកអាចយកគ្រីម ឬប្រេង ដោយប្រើម្រាមដៃឈ្លីថ្នមៗលើផ្ទៃមុខ ដោយអនុវត្តមុនម៉ោង១២យប់ នោះនឹងជួយឲ្យចរន្តឈាមរត់បានល្អលើស្បែកមុខ។

៥. កុំផឹកភេសជ្ជៈប៉ូវកម្លាំង

ដោយសារតែចង់មានស្មារតីល្អនៅពេលបំពេញការងារដល់យប់ៗ មនុស្សមួយចំនួនបានរើសយកភេសជ្ជៈប៉ូវកម្លាំង ឬកាហ្វេជាដើម តែភេសជ្ជៈទាំងអស់នេះមិនល្អសម្រាប់សុខភាពស្បែកនោះទេ។ អ្នកគួរជំនួសមកវិញ នូវទឹកផ្លែឈើដូចជា ទឹកក្រូច ទឹកត្របែក ឬទឹកម្នាស់ជាដើម ដែលសម្បូរដោយវីតាមីន C ។ ឬមិនអ៊ីចឹងទេ អ្នកគួរផឹកទឹកធម្មតាឲ្យបានច្រើនក៏បាន តែបើអ្នកនៅដល់យប់ៗពេក គួរដាក់ដបទឹកក្តៅឧណ្ឌៗមួយក្បែរខ្លួនជាការល្អប្រសើរ។ មិនត្រឹមល្អចំពោះសុខភាពស្បែកនោះទេ តែក៏ជួយឲ្យគេងឆាប់លក់ផងដែរ៕