អាកាសធាតុប្រែប្រួលជាញឹកញាប់ មិនថារដូវក្ដៅ រដូវរងារ ឬរដូវភ្លៀងចូលមកម្តងៗឡើយ សុខភាពស្បែកពេញមួយតួខ្លួននឹងមានលក្ខណៈស្ងួតបែកស្រកា ជាពិសេសនោះគឺបញ្ហាសុខភាពបបូរមាត់របស់អ្នក។ ចំពោះបញ្ហាបបូរមាត់ស្ងួតមួយវាកើតឡើងសឹងតែគ្រប់រដូវកាលទៅហើយ នេះមិនមែនគ្រាន់តែជាបញ្ហាដែលបណ្តាលមកពីធាតុអាកាសតែប៉ុណ្ណោះទេ វាក៏អាចបណ្តាលមកពីបញ្ហាមួយចំនួនទៀតនៅក្នុងជីវិតរស់នៅប្រចាំថ្ងៃរបស់អ្នកផងដែរ។

មូលហេតុចម្បងបួនយ៉ាងដែលធ្វើឲ្យបបូរមាត់របស់អ្នកកាន់តែស្ងួតឡើង៖

• ការទម្លាប់លិតបបូរមាត់ ពីព្រោះទឹកមាត់មានផ្ទុកជាតិអាស៊ីតម្យ៉ាងដែលធ្វើឲ្យបបូរមាត់កាន់តែស្ងួតបែកស្រកា
• ការប្រើផលិតផលខុស ឬបណ្តាលមកពីថ្នាំព្យាលជំងឺរបស់អ្នក
• ការប្រើប្រភេទក្រែមបបូរមាត់ (Lips Balm) ជាប្រចាំវាអាចជួយបានតែពីរបីនាទីប៉ុណ្ណោះ តែបើកាន់តែលាបវាកាន់តែធ្វើឲ្យបបូរមាត់កាន់តែស្ងួតលើសដើម
• អ្វីដែលសំខាន់ជាងគេបំផុតនោះគឺអ្នកទទួលទានជាតិទឹកមិនបានគ្រប់គ្រាន់ទៅតាមបរិមាណកំណត់សម្រាប់មួយថ្ងៃៗ

ការប៉ះពាល់នឹងកម្តៅថ្ងៃក៏អាចបណ្តាលឲ្យបបូរមាត់ស្ងួតបែកស្រកាផងដែរ ជាពិសេសនៅពេលអ្នកមានអាយុកាន់តែចាស់ទៅ។ ភាគច្រើននៃក្រែមបបូរមាត់ (Lips Balm) គឺមានផ្ទុកសារធាតុ ប្រេង អាកុល និងសារធាតុគីមីមួយចំនួនទៀតដើម្បីផលិតចេញជាពណ៌នឹងក្លិន។ ដូច្នេះអ្នកត្រូវមានការប្រុងប្រយ័ត្ន និងត្រូវពិនិត្យមើលឲ្យបានដិតដល់មុនពេលទិញប្រើ៕

ចុចអានបន្ត៖ គន្លឹះងាយៗ ៣ យ៉ាងអាចព្យាបាលសក់ជ្រុះ និងសក់ខូចឲ្យបានប្រសើរឡើងវិញតាមបែបធម្មជាតិ