អតីតកាលដ៏កម្សត់កម្ររបស់ Lee Sung Kyung រស់នៅបន្ទប់មួយទម្រាំបានដូចសព្វថ្ងៃ

2021-09-20 08:15:00
ចំនួនមតិ 0 | ចំនួនចែករំលែក 0

តារាសម្ដែងស្រីជួរមុខកូរ៉េ Lee Sung Kyung បានឲ្យដឹងថា ក្រោយពេលគ្រួសារនាងរកស៊ីក្ស័យធន នាងត្រូវប្ដូរមករស់នៅក្នុងសំណង់អនាធិបតេយ្យ។

កាលពីថ្ងៃទី ១៨ ខែកញ្ញាកន្លងទៅនេះ បណ្ដាញព័ត៌មាន Biz Korea បានរាយការណ៍ថា នៅក្នុងកម្មវិធី Sere Money Club កាលពីពេលថ្មីៗនេះ តារាសម្ដែងស្រីល្បីឈ្មោះកូរ៉េ Lee Sung Kyung បាននិយាយអំពីពាក្យចចាមអារ៉ាមដែលនាងធំដឹងក្ដី ក្នុងគ្រួសារអភិជន។

តួរឿង Weight Lifting Fairy បានឲ្យដឹងថា៖ កាលពីខ្ញុំអាយុ៤ឆ្នាំ ពុកខ្ញុំបានប្រឹងធ្វើការដើម្បីបើករោងចក្រផ្ទាល់ខ្លួន តែក្រោយមកក៏ឆេះផ្ទះ ធ្វើឲ្យគ្រួសារខ្ញុំក្ស័យធន ហើយត្រូវជំពាក់បំណុលគេជុំទិស។ ពីអាយុ ៤ឆ្នាំ ដល់៧ឆ្នាំ ស្រីស្អាតអាយុ ៣១ឆ្នាំត្រូវរស់នៅក្នុងតំបន់អនាធិបតេយ្យ។ ក្រោយមកទៀត ផ្ទះនាងត្រូវរើចូលនៅក្នុងបន្ទប់ដែលមានទំហំ ២៣ម៉ែត្រការ៉េ។ នាងនៅចាំយ៉ាងច្បាស់ថា មិត្តរួមថ្នាក់បានសួរនាងថា តើគ្រួសារនាងអាចរស់នៅដោយយ៉ាងម៉េចនៅក្នុងបន្ទប់ដ៏តូចនោះ។

ក្រោយពេលចូលសិល្បៈ ដែលចាប់ផ្ដើមចេញពីធ្វើជាតារាម៉ូដែលនោះ នាងបានរ៉ាប់រងបំណុលទាំងអស់ជំនួសឪពុកម្ដាយរបស់ខ្លួន។ ស្រីស្អាតកើតឆ្នាំ ១៩៩០ បានប្រាប់ថា ឪពុកម្ដាយនាងបានយំនៅពេលនាងជួយទំនុកបម្រុងពួកគេ។ នៅពេលនេះ Lee Sung Kyung គឺជាតារាសម្ដែងស្រីជួរមុខកូរ៉េ ដោយមានតម្លៃខ្លួនស្ថិតលំដាប់ A នៅប្រទេសកូរ៉េ៕