ខំតាមប្រមាញ់ Fan Cheng Cheng រករឿងអាស្រូវ តែអ្នកកាសែតត្រូវចូលសួនវង្វេងទៅវិញ
- 2021-08-03 03:11:00
- ចំនួនមតិ 0 | ចំនួនចែករំលែក 0
ខំតាមប្រមាញ់ Fan Cheng Cheng រករឿងអាស្រូវ តែអ្នកកាសែតត្រូវចូលសួនវង្វេងទៅវិញ
អ្នកគាំទ្រកំពុងគិតថា តារាសម្ដែង និងចម្រៀងល្បីឈ្មោះចិន Fan Cheng Cheng គឺជាតារាកំប្លែង ព្រោះសកម្មភាពរបស់លោកធ្វើឲ្យគេសើចមិនឈប់។
កាលពីថ្ងៃទី ១ ខែសីហាកន្លងទៅនេះ អ្នកកាសែតល្បីឈ្មោះម្នាក់ដែលពូកែខាងប្រមាញ់រូបរបស់បណ្ដាញព័ត៌មាន iFeng បានសម្រេចចិត្តតាមកន្ទុយតារាសម្ដែង និងចម្រៀងវ័យក្មេងល្បីឈ្មោះ Fan Cheng Cheng ក្រោយវិស័យសិល្បៈផ្ទុះរឿងអាស្រូវច្រើនក្នុងរយៈពេលចុងក្រោយ។
តាមសម្ដីរបស់អ្នកកាសែតខាងលើ នៅយប់នេះ ប្រុសស្អាតអាយុ ២១ឆ្នាំមានណាត់ជាមួយមិត្តភ័ក្ដិដើរលេង និងផឹកស្រា ដូចនេះហើយ លោកបានគិតថានេះគឺជាឱកាសដ៏ល្អបំផុតប្រសិនបើលោកតាមដើម្បីជីករករឿងអាស្រូវពីប្រុសស្អាតខាងលើ។
ដោយសារតែផឹកស្រាច្រើនដូចនេះហើយ ពេលចេញមកវិញ ប្អូនប្រុសរបស់តារាសម្ដែងស្រី Fan Bingbing មិនបានបើកឡានខ្លួនឯងទេ គឺបានហៅតៃកុងឡានមកយក។ ចាប់ពីពេលនោះមក លោកបានដើរនៅក្នុងចំណតឡានចុះឡើង ឡើងចុះ។ ចុងបញ្ចប់លោកបានដើរនៅក្នុងចំណតឡាន ធ្វើឲ្យកាសែតវង្វេងដូចនៅក្នុងសួនវង្វេងរហូតដល់ទៅ២ម៉ោង។
ដើមឡើយអ្នកកាសែតស្មានថា ប្រុសស្អាតរូបនេះដឹងថាខ្លួនតាមកន្ទុយលោក ទើបមានចេតនាធ្វើបាបលោកឲ្យវង្វេងវង្វាន់បែបនេះ។ យ៉ាងណាក្ដី នៅពេលឃើញ Fan Cheng Cheng ដើរមិនត្រង់ជួរ ហើយចង់ដួលផង ទើបលោកដឹងថា សិល្បករនេះពិតជាវង្វេងពិតមែន។ កាសែតបន្ថែមថា ខួរក្បាលរបស់លោកសឹងតែផ្ទុះ ឯជើងវិញក៏ដើរលែងចង់រួច ក្រោយដើរក្នុងចំណតឡាន២ម៉ោង។ ទីបំផុត Fan Cheng Cheng ក៏រកបានតៃកុងដែលខ្លួនកុម្ម៉ង់មក ហើយអ្នកកាសែតក៏បានធូរខ្លួនទៅផ្ទះដូចគ្នា ដោយមិនទទួលបានផ្លែផ្កាអ្វីទាំងអស់៕