លុយ៤ប្រភេទ ដែលទោះបីជាស្លាប់ក៏មិនគួរប៉ះ បើមិនចង់អន្តរាយដល់ខ្លួន
- 2021-01-04 09:30:00
- ចំនួនមតិ 0 | ចំនួនចែករំលែក 0
លុយ៤ប្រភេទ ដែលទោះបីជាស្លាប់ក៏មិនគួរប៉ះ បើមិនចង់អន្តរាយដល់ខ្លួន
មិនថាទាល់ច្រក ឬអត់លុយយ៉ាងណាក៏ដោយ ក៏អ្នកមិនគួរលាដៃយកលុយទាំងនេះមកដាក់ខ្លួនដែរ ត្បិតមិនត្រឹមតែមិនជួយចម្រើនដល់ខ្លួនទេ គឺអាចនាំទុក្ខដល់ខ្លួនទៀតផង។
១. លុយដែលគេឲ្យខ្ចី
អ្នកមានដឹងទេថា អ្នកដែលហ៊ានឲ្យលុយអ្នកខ្ចី មិនមែនគេធូរធារអ្វីឡើយ តែគេយល់នូវអារម្មណ៍នៅពេលគ្មានលុយនៅក្នុងខ្លួនសោះ។ ដូចនេះហើយ ទោះបីជាមិនធូរខ្លាំង ក៏គេប្រឹងត្បៀតមួយចំណែកឲ្យអ្នកខ្ចីដែរ។ អ្នកមិនគួរសងគុណគេ ដោយសារស៊ីដាច់មិនសងវិញឡើយ។ កុំគិតថាគេមិនបើកមាត់ទារ ហើយគេភ្លេចនោះ គ្រាន់តែគេមិនចង់ធ្វើឲ្យអាក្រក់មើលនោះទេ។ បើអ្នកខ្ចីហើយ មិនសងគេម្ដង អ្នកនឹងលែងមានឱកាសលើកទី២ហើយ។
២. លុយរកបានដោយក្បត់មនសិការខ្លួនឯង
មានលុយតែបើគ្មានទឹកចិត្ត សួរថាមានលុយនោះមានក្ដីសុខ ឬអត់។ មនុស្សម្នាក់ទោះបីជាស្រលាញ់លុយដល់កម្រិតណាក៏គួររកលុយតាមផ្លូវល្អដែរ។ អ្នកដែលរកលុយបានដោយកិបកេងគេ ជិះជាន់គេ មិនយូរមិនឆាប់ លុយនោះគង់តែបាត់ទៅវិញ។ លុយដែលមកលឿន ក៏ចាកចេញទៅវិញដោយប្រញាប់ដែរ។
៣. លុយបានពីបុណ្យសព បុណ្យខ្មោច និងបុណ្យផ្សេងៗ
ទឹកប្រាក់ដែលប្រមូលបានពីការចូលបុណ្យផ្សេងៗ គួរប្រើឲ្យត្រូវជាមួយគោលដៅដែលបានកំណត់មកពីដំបូង។ លុយដែលចូលរួមដើម្បីធ្វើបុណ្យ ហាមដាច់ខាតយកប្រើជាប្រយោជន៍ឯកជន។ កេងចំណេញពីលុយបុណ្យគឺទទួលបាបធ្ងន់បំផុត ទោះបីជាមានយ៉ាងណាក៏ត្រូវរលាយទៅវិញដែរ។
៤. លុយដែលគេផ្ញើឲ្យជួយទុក
គេផ្ញើលុយឲ្យយើងទុក មានន័យថាគេទុកចិត្តយើងមួយរយភាគរយហើយ តែបើយើងនៅដាច់ចិត្តស៊ីលុយគេទៀត មានន័យថាមនុស្សយើងចិត្តដាច់បំផុត រកលេខគ្មានឡើយ។ គេយកមកផ្ញើយើង ព្រោះគេគ្មានទីតាំងសុវត្ថិភាពដើម្បីទុកដាក់ តែបើយើងយកលុយនេះទៀត តើអ្នកគិតថាតម្លៃខ្លួនរបស់អ្នកនឹងធ្លាក់ដល់កម្រិតណា?