ហេតុអ្វីគ្មានលុយហើយ ម៉េចមិនសន្សំលុយទិញផ្ទះសម្បែង ម៉េចនៅចាយលើការផឹកស៊ីទៀត

2020-12-30 08:50:00
ចំនួនមតិ 0 | ចំនួនចែករំលែក 0

មនុស្សមួយចំនួន ឃើញការសប្បាយចំពោះមុខសិន ដោយរឿងថ្ងៃស្អែក ទុកស្អែកចាត់ចែង។ ឯខ្លះទៀតគិតវែងឆ្ងាយ បារម្ភច្រើន គិតមុនដល់ទៅរាប់ឆ្នាំ។

កើតមកនៅក្នុងសង្គមបច្ចុប្បន្ន មិនថាអ្នកណា ក៏ដូចអ្នកណា គឺរមែងចង់បានជីវិតមួយដែលសុខស្រួល គ្មានភាពលំបាកច្រើន។ តែសួរថា នៅលើលោកដ៏ធំធេងមួយនេះ មានប៉ុន្មានភាគរយដែលកើតមកគឺនៅក្នុងគ្រួសារអ្នកមានស្រាប់នោះ?

គឺសុទ្ធសឹងតែរកឡើងពីបាតដៃទទេទាំងអស់។ បើមិនប្រឹងរកទេ គឺគ្មានថវិការដើម្បីដោះស្រាយជីវភាពប្រចាំថ្ងៃឡើយ។ តែទន្ទឹមនឹងការព្យាយាមរកលុយដើម្បីផ្គត់ផ្គង់គ្រួសារ ផ្គត់ផ្គង់ខ្លួនឯងនេះ ក៏មនុស្សជាច្រើនយកលុយដែលពិបាករកមួយនេះ ដើម្បីកម្សាន្តអារម្មណ៍ពីការធ្វើការគ្មានថ្ងៃឈប់ផងដែរ។

នៅពេលឃើញដូចនេះ អ្នកដែលមានស្រាប់តែងតែរិះគន់ថា ហេតុអ្វីបើគ្មានលុយបែបនេះហើយ ម្ដេចមិនសន្សំលុយ ទិញផ្ទះ ឬធ្វើអ្វីធំដុំទៅ ម្ដេចនៅចាយកំប៉ិកកំប៉ុកបែបនេះទៀត។ ដល់ពេលណាទើបមានដូចគេដូចឯង។ ខណៈមតិនេះត្រូវ ក៏មានការលើកឡើងថា ប្រសិនបើលុយដែលប្រឹងរកមកហើយ តែមិនប្រើដើម្បីកម្សាន្តអារម្មណ៍ពេលស្មុគទៀតនោះ ទម្រាំតែមានលុយច្រើនដូចគេដូចឯង បែបត្រូវឆ្កួតមនុស្សមួយទាំងមូលហើយក៏មិនដឹង។

ដឹងថា ដំបូន្មានរបស់អ្នកមានទាំងនោះគឺចង់ឲ្យយើងចេះសន្សំសំចៃ ដើម្បីអនាគតល្អវែងឆ្ងាយ ប៉ុន្តែមនុស្សផ្សេងគ្នា មានវិធីចាយលុយផ្សេងគ្នា។ អ្នកខ្លះពូកែសន្សំ ដោយមិនដើរលេងអ្វីសោះក៏អាចធ្វើទៅបាន តែមួយចំនួនទៀត ត្រូវរំសាយអារម្មណ៍ទើបមានកម្លាំងចិត្តធ្វើការបន្តទៀត។

សរុបសេចក្ដីមក ការចាយលុយបែបណា គឺគ្មានខុសគ្មានត្រូវនោះឡើយ គឺអាស្រ័យទៅតាមបុគ្គលនីមួយៗ។ ដូចនេះ បើឃើញគេមិនទាន់សល់លុយ តែដើរលេងក៏កុំបន្ទោសគេថាមិនចេះសន្សំអី ព្រោះនេះគឺជាការរំសាយអារម្មណ៍ដើម្បីបន្តរកចំណូលបន្ថែមរបស់គេ៕

ប្រភព៖ Kenh14 ប្រែសម្រួល៖ Caramel